1 SAMUEL 14 - Allah Wene Fano Wene Hupla Inane

Yonatan ap kain mene welagaikhe wene

¹ Inenggi ekhe sambul he, at Yonatan nen ap alage asikhe waluk nikhi lagaikhe mene andi, mel yagatikhe: ”Nit ap Filistin mene o pos wutfagasik werek oba a'lima wulibuogo,” iluk yaga'luk lagaukwa meneat he, at Yonatan nen he, ”An yi'nogo lageluk,” iluk eisena yagati'legengge lagaikhe.

² O andi sambul he, at Saul agoromi tentara inebe 600 hangge omanogo inom o Gibea nen horokhogoat o Migron andoma e delima eroma werek kwelek lagaukwa.

³ (Andi sambul, su enu efod ap Allah eisewerek logolik, labetarek mene a'nogo ap Ahitub amlogo enu Ahiya andi nen labe'luk lagaikhesik welagaikhe. Ahitub amlogore abo Ikabod Pinehas agailak a'nogo amlogo, nen Pinehas andi re, ap Eli Allah eisewerek o Silo welagaikhe mene a'nogo amlogo.) Nen at Yonatan andoma nen lagaikhe andi, it ap tentara mene omanogo inonggorat welagaukwa.

⁴ At Yonatan a'nogo o ap Filistin mene nen o pos wuri'mo omanogo lageluk he, o tomkwe helep sili ebe pire wi-wolong ugunem honggolekwe nen lagaikhe. Helep sili isa pire andem enu lombok he, ekhe Bozes, nen, ekhe enu Sene ikhi lagaukwa.

⁵ Nen helep sili andem abel poikwe utara fikhit he elokhe o Mikhmas higit welagaikhe, nen maikwe selatan fikhit he, elokhe o Geba higit welagaikhe.

⁶ Were'ma andikwe louwogeluk laga logolik, at Yonatan nen he, agot alage mene a'nogoba mel yagatikhe: ”Nineisena Tuhan he ap inebe hokhorogo halok ogo, nen endebat halok ogo, elok inomamet fisa hagenego. Enggere Aren omame wo'nisagain anggikhi lagi hilingi'mo re, nit ap Filistin mene Allah ane inonggot mene inawi pos wuri'mo andoma louwogo,” iluk yagatikhe.

⁷ A'nogo yagatikhemo re, ap alage a'nogo nen he, ”Haren yi'nogo, ti'nogo hilingisuok igin halok he, an nen io nek igin o,” iluk yagatikhe.

⁸ A'nogo yagatikhemo, at Yonatan nen he, ”Fano. Nit elikwe wulibi lambik he, ap Filistin mene nen ninebe ineilenggen nisoageluk inugisogoin o.

⁹ A'nogo inugisugunem, iren he, nit hit hinoba wagu halogen wesubagaigen he, andem logoni, iluk ugu halok he, nit elikwe wulibi lagi'lek kamo uogo.

¹⁰ A'nogo meneat he, iren he, hit he, nit ninoba we'ni, iluk yaganisugu halok, nineisena Tuhan nen it inebe nit ninenggiba arat fikhemo higi, iluk ninendawi wenggelasigin andi nen he, nit it inoba logoin o,” iluk yagatikhe.

¹¹ A'nogo yagatikhesik, it inebe ap Filistin mene o pos kagalek welagaikharek oba a'nogo were'ma inugisasukwama re, it ap Filistin mene nen mel isukwa: ”Yethani, ap Ibrani mene inebe helep anggwe folelekwe hinago weregengge wulibi wagaikhasik a'li,” iluk isukwa.

¹² A'nogo isukwasik, Yonatan amingmingengge a'nogo emberek inane hokhorogo wolisikhi logolik mel yagaisasukwa: ”Niren ekhe yagahisogoin enggere, wulibi wesimbik lagai we'ni o,” iluk yagaisasukwa. A'nogo yagaisasukwama, at Yonatan nen agot alage mene a'nogoba mel yagatikhe: ”Nineisena Tuhan nen it inebe nit Israel mene ninenggiba fikhemo andi nen he, nombo'ne eme o,” iluk yagatikhe.

¹³ A'nogo yagatikhesik, at Yonatan agot alage mene a'nogo ombo'nerogo re pililo lagasikhe. A'nogo lagasikhesik Yonatan a'nogo wulibi waga logolik it afuni Filistin mene omanogo enggi nen tamukhigik pelakfisilik lagunem he, agot alage at asikhe waluk nikhi lagaikhe mene a'nogo nen hobuk ombo'ne lagakhi logolik inebe pinggi inoarik lagasikhe.

¹⁴ Inenggi attak kwi lagaukwa mene andiba re, at Yonatan inom agot alage mene a'nogo inomen he ap inebe 20 nen o kweang unggut enggaminogo huli heale'ma andoma nen inoatukwa.

¹⁵ A'nogo inoatukwa andi nen, ap tentara Filistin mene mondogat, inebe hokhorogo o tenda mene wurogo welagaukwa mene inom, o leimo welagaukwa mene inom, inebe endebat pos kagalek welagaukwa mene omanogo inom, it ap fenakwe afuni inangge hesangge telharek mene omanogo inom, inailo mondogen inoagelekwe abolok isikhe. Kweang ogo re, abolok isikheat. Andi re At Allah nenat a'nogo hilingitikhemo youk hokho mene lagaukwasik inoagelekwe abolok isikhe andi.

Ap Filistin mene mabenet fisasukwasik inoatukwa wene

¹⁶ A'nogo agu kwelek, ap Saul agoromi tentara o Gibea afuni Benyamin mene inaiba andoma ap Filistin mene kugunem iluk kagalek welagaukwaba andoma nen ineilenggen yethasukwa re, ap Filistin mene omanogo inobakheindok palagaikhesik heise hesangge-pesangge pugulhunem yerisasukwa.

¹⁷ A'nogo yerisasukwasik, at Saul en agoromi tentara mene mel yagaisasikhe: ”Ninebe miren welago iluk wenaginabimbik he, inebe lek mene heraginabini o,” iluk yagaisasikhe. A'nogo yagaisasikhemo, lomborinabik lagaukwa mene re, at Yonatan agot asikhe waluk nikhi lagaikhe mene a'nogo emberek inebe lek welagaikhe.

¹⁸ Inebe a'nogo legen, o andi sambul he ap imam Ahiya afuni Israel mene inelokhoma su ap Allah eisewerek mene nen labetarek mene enu efod andi waluk wagaikhesik were'ma at Saul en he, ”Su efod ari waluk eme o,” iluk yagatikhe.

¹⁹ At Saul en ap Allah eisewerek mene wene a'nogo yagatu kwelek aremnogo re, ap Filistin mene inawi tenda wuri'mo omanogo re inane anggiluk kwelagaisogo inailo mene nek kwela'lagaikhe mo re, at Saul en ap Allah eisewerek mene a'nogo mel yagatikhe: ”Niren he nineisena Tuhan oba, yi'nogo hilingi'ni iluk yaganisoageluk kino u re elo'lek aga andi!” iluk yagatikhe.

²⁰ A'nogo yaga'luk, at Saul agoromi tentara mene inom welagaukwa mene omanogo re ambineat siakhogo weim yafarek oba lagaukwasik, yerisasukwa re, it ap Filistin mene omanogo it-it inom tilik aga logolik, karok weim yafarek meneba wat-wat arik lagunem yerisasukwa.

²¹ A'nogo hilingitu kwelek, it ap Ibrani mene afuni Filistin mene inaiba welagaukwa mene omanogo re it ap tentara Filistin mene inom wagaukwa menere, hobuk inambotkwe Saul inom, Yonatan inom, lambuk i wagaukwa.

²² A'nogo hilingitukwama, afuni nen he, ”Ap Filistin mene omanogo heise hela lagaikha,” iluk it ap Israel mene afuni Efrayim mene inaiba tom oba hinago welagaukwa mene yagaisasukwama inesanggo holhukwasik he, Saul lak inom lambuk i wagaukwasik he, ap Filistin mene omanogo mugisasukwa.

²³ A'nogo muginarek laga logolik, inoarik-inoarik o Bet-Awen abel elikwe andoma fisa lagaukwa. Andi sambul he, nineisena Tuhan nen afuni Israel mene telinafikhe andi.

Weim a'nogo yafukwasik oba nen wene hilinglaga lagaikhe wene

²⁴ At Saul en he, ”An naselei mene wene na mage inoba figi mene inebe inoati'lek oan logolik, ap sa nen sumburu yi mene ti mene ekhe nagain halok, Allah nen homan fouwago,” iluk Allah enuba hombuk palhikhemo nogo nen he, ap Israel mene nen ap Filistin mene muginarek lagaukwa andi sambul, lingge inukhogo sumburu yi mene ti mene nele nen inomame mondok lek agaikhe.

²⁵ A'nogo muginarek laga lagaukwasik, it inebe mondogat enggama ekhe kin amusu ekhema-ekhema mondok hokhorogo were'ma andoma lagaukwa.

²⁶ A'nogo meneat he, at Saul en, ”Allah nen homan fisoago,” iluk isikhe mene a'nogo inoba asinogoluk inailo nen he, inebe mondogaren kin amusu andi ekhe nasukwa mondok lek.

²⁷ A'nogo meneat he, at Yonatan enek he, eisena nen ap Israel mene homan inoba fesikhe mene andi yagatikhe le'ma onggot welagaikhe andi nen he, sige waluk lagaikhe mene andiba kin awiba polologo wanhikhesik he, nasikhemo oba weak-weagat hambuk isikhesik he, ebenagaik omame agaikhe.

²⁸ A'nogo nasikhemo, ap tentara omanogo mene ekhe nen he, mel yagatikhe: ”Nit mondogat sumburu nele nen ninomame mondok lek agosik ninggi'nogo hilingisu heat hilingninafe o. A'nogo meneat he, hat heisena nen Allah nen nit weaget ninabuageluk At enu hombuk palogo yi'nogo yaganisikhe: Sa nen o yogondak yiba sumburu yi mene ti mene ekhe nagain halok, Allah nen homan fouwago, iluk yaganisikhe,” iluk yagatikhe.

²⁹ A'nogo yagatikhemo, at Yonatan nen he mel isikhe, ”An neisena nen nit ninunggulenu mene ninoba wene andi ikhere obabut weak mene yaganisikhemo higi. Kwela'nean! An kin amusu endebat ekhe ninggirik oba nen he, noba mondok hambuk ikhemo welagi yi.

³⁰ Niren ninaselei mene andi inoati logolik yi mene ti mene hugulengge telho mene andi ekhe nani, iluk yaganiselepma re, ap Filistin mene inebe hokhorogoat inoa'lo o,” iluk yagatikhe.

³¹ O andi sambul ap Israel mene nen it Filistin mene inom, o Mikhmas nen o Ayalon huli yabik mondok lagaukwama nogo nen he, inomame mondok lek agaikhe.

³² A'nogo hilinglagaikhemo, yi mene ti mene selei mene inangge hugulengge wanhukwa mene inenggi abisak helikhi logolik inane hokhorogo sagalhukwa. A'nogo sagalhukwasik, wam domba inom, sapi hokhondek mene inom, eagwi mene inom, wanhukwasik o andoma nenat warogo senggelhukwasik he, mep inom mondogat nasukwa.

³³ A'nogo nasukwama, it ap ekhe nen Saul mel yagatukwa: ”Ap wam senggelek amep werek kwelek nengga andi nineisena Tuhan ane sagalogo weagat hilingita o,” iluk yagatukwa. A'nogo yagatukwama, at Saul en he, ”Nineisena Allah oba lomborogo logou fuk yoma ri!” iluk ane kwe isikhe. A'nogo isikhesik, mel yagaisasikhe, ”Helep hokho mene ari limbilogo ya fei we'ni o,” iluk isikhe.

³⁴ A'nogo yagaisasikhesik he, it wene waluk wagaukwa mene omanogo inoba wene ekhe mel yagaisasikheat: ”Nineisena Tuhan ane sagalogo wam ekhe mep inom ninggi logolik weak hilingisinogo iluk, it ap tentara mondogen inanggo sapi inom, domba inom, ya waluk wesimbik, warogo senggelogo helep yiba fembik yoma nenat nogoin enggere, waluk wesuagen yagaisobagaigen he, inoba yagaisilik lani o,” iluk yagaisasikhemo, yagaisa lagaukwama re, o hubanggo andi sambul, ap tentara mene mondogat selei mene inanggo hugulengge wanhukwa mene omanogo waluk wagaukwasik he, andoma nen warogo senggelhukwa.

³⁵ A'nogo senggelhukwama, at Saul en wam, yi mene ti mene nineisena Tuhan faget noleti logogun oba mezbah attak-attak wutikhe andi.

³⁶ A'nogo wutikhesik, at Saul en agoromi tentara omanogo inoba mel yagaisasikhe: ”Weim pin kwi lambik afuni Filistin mene inoasi louwogo. Lambik he, hup inukhogo hugulengge wanhi logombik he, huli o wei ugunemen he, inebe mondok felelenghogo inoa'no o,” iluk yagaisasikhemo, iren he, ”Haren, yi'nogo hilingisuok, iluk egen halok he, fano nego,” iluk yagatukwa. A'nogo isukwa meneat he, ap Allah eisewerek mene a'nogo nen mel yagatikhe: ”Nit Allah nen yaganisoageluk, attak anema wanuogo,” iluk yagatikhe.

³⁷ A'nogo yagatikhemo at Saul en he, Allah mel yagatikhe: ”An ap Filistin mene inoasigiluk weim layoga? Haren it inebe nit Israel mene ninenggiba fagain a? Lega,” iluk heinok wokhasikhe meneat he, andi sambul at Allah nen he, ”Yi'nogo hilingi'no,” iluk onggo yagati'lek kamo isikhe.

³⁸ A'nogo kamo isikhe andi nen at Saul en ap tentara inogogwi mene inoba yagaisasikhe: ”Hit hinebe mondogat andoget ha wesimbik o yogondak he, sa nen ekhe weak hilingitemo iluk hera'ni o.

³⁹ A'nogo heratunem, ap ekhe nen a, athe an namlogo Yonatan ebe nen a, weak hilingitemo halok, ebe mondok wasuageluk, nineisena Tuhan Eluk Mondok welagarek mene nen telninafe mene a'nogo enu hombuk palogo yagahisigi o,” iluk yagaisasikhe meneat he, inebe mondogat inailo nen onggo ekhe isukwa mondok lek.

⁴⁰ Inane a'nogo igi'lek kamo isukwama, at Saul en it mondogat mel yagaisasikhe: ”Hit hinebe mondogat oma mendek logoino, nen an namlogo Yonatan nemberek yoma mendek logogun,” iluk yagaisasikhemo, iren he, ”Haren, yi'nogo hilingisumo nek he, fano, iluk anggegen mene andi hilingisuogo,” iluk yagatukwa.

⁴¹ A'nogo isukwama, at Saul en samban Allah mel yagatikhe: ”Nit afuni Israel mene nineisena Allah, o yogondak he, wene onggo yaganeten lek andi nenahalok? Neisena, Hat honggwarek hagalep yaba nen wene onggo yaganom o. An nen he a? Namlogo Yonatan nen he a, weak hilingitoma halok wene onggo helep Urim yiba nen yagane'no o. Mene re, hagainafuri Israel mene nen weak hilingitama halok, wene onggo helep Tumim yiba nen yagane'no o,” iluk yagatikhemo, Allah nen he, ”Weak hilingitepma,” iluk wene at Saul Yonatan emberek inoba figik, nen it tentara mene mondogat, ”It weak hilingiti'lek,” iluk inoba kotik, isikhe.

⁴² A'nogo yagatikhemo, at Saul en he, ”Tuhan, Namlogo Yonatan nen weak hilingite a? An nen weak hilingiti a. furogo yaganisan o, neisena,” iluk yagatikhemo, Aren he, ”Yonatan nen weak hilingitemo o,” iluk yagatikhe.

⁴³ A'nogo yagatikhemo, at Saul en Yonatan mel yagatikhe: ”Haren ninggi'nogo hilingitenma,” iluk yagatikhemo, at Yonatan nen he, ”An narige wurep oba kin amusu endebat ekhe wanhirik ninggiri'mo o, neisena. Andi nen he, noasumo re, fano aro,” iluk yagatikhe.

⁴⁴ A'nogo yagatikhemo, at Saul en he, ”Namlogo e. An nen hat hoasuageluk wene hoba figi'lek halok, nineisena Tuhan nen an wene enggin mene noba fouwago,” iluk yagatikhe.

⁴⁵ A'nogo meneat he, it afuni omanogo nen Saul mel yagatukwa: ”At Yonatan nen ap Filistin mene inoatemo ninomame ago meneat he, at ebe wasuageluk wene oba fogoin nogo? Mondok elo'lego. Weim yogondak he, nineisena Tuhan nen Yonatan omame wogotemo, at omame aga andi nen he, at ebe watik, oba endebat ekhe weaget figik, ugun mondok lek u hak he, esi ungguloa'ma misigat halok ekhe longgot fogoin mondok lego, iluk nineisena Tuhan enu hombuk palogo ogo o,” iluk yagatukwa. At Yonatan wene oba fuluk wa'lep mene, it afuni nen a'nogo telhukwa andi.

⁴⁶ A'nogo hilinglagaikhemo, at Saul en ap Filistin mene hobuk muginarek lagi'lek andi nen, it inambotkwe inaiba lagaukwa.

At Saul kain logolik weim yafik, againafuri taginafik, ikhi lagaikhe wene

⁴⁷ At Saul afuni Israel mene inoe raja agaikhesik logolik he, afuni Israel inaselei mene o ekhema-ekhema welagaukwa mene inom weim hokhorogo yafi lagaikhe. Selei mene andi re, ap Moab mene inom, Amon mene inom, Edom mene inom, afuni Zoba mene inogogwi raja-raja inom, Filistin mene inom, yafi lagaukwa. Weim ekhema-ekhema yafi logolik he, at Saul maben agi'lek omame nek aga lagaikhe.

⁴⁸ At he ebe mondok ambong si-serek logolik he ailo nen iget figi'lek kwi laga logolik, afuni Amalek mene sebelogo fisigik, it afuni Israel mene ap inane nen ninghogo inangge telharek mene inenggiba nen lologo fisigik, ikhi lagaikhe.

⁴⁹ At Saul againafuri ap inenu re, Yonatan inom, Yiswi inom, Malkisua inom, andem. Nen, a'logomi manggusa mene enu re, Merab, nen ombo'ne mene enu re, Mikhal.

⁵⁰ Agwe re, ap Ahimaas a'logo enu re, Ahinoam. Nen, Saul agoromi tentara mene inoe kain he, at Saul agailak, Ner amlogo Apner andi.

⁵¹ At Saul eisena re Kish, nen Apner eisena re Ner, nen it andem ineisena re, Abiel andi.

⁵² At Saul ebe eluk logolik, ap Filistin mene inom weim mondok aniniweak yafi lagaikhe. A'nogo yafi lagaikhe andi nen, ap ekhe ailo lek omame hokho logolik weim yafu halok he, at Saul en eil fene-fene at agoromi tentara mene asuageluk weak-weak woginafi lagaikhe.