1 SAMUEL 12 - Allah Wene Fano Wene Hupla Inane

At Samuel en, ”An arat lagain,” iluk yagaisasikhe wene

¹ A'nogo hilingitukwasigen, at Samuel en afuni Israel mene mondogat mel yagaisasikhe: ”An nen hiren kino yaganetep mene omanogo mondogat hinane hologo hit faget hinoe raja arat menfigi o.

² Yethani, an nebe alageba nen pikhit yogondak huli fethinarek logolik, nagainafuri taginafi mene arat inalue agaikhasik hinom welagep yi. Andi nen he, an yogondak arat yaman agarik, nesi helel mondogat wulife andi, o yogondak huli nen he, ap an nen menfigi mene yi nen fethinarek logogin o.

³ Yogondak he, hit hinelokhoma mendek welagi yi! Enggere an nen weak ekhe hilingiti halok he, nineisena Tuhan eilhanem inom, ap hinoe raja Aren wenagaisogo wokhisikhe mene inom ineilhanem, yi'nogo hilingite iluk wene noba feni o. An nen hit hinanggo sapi inom, keledai inom, nenggi abisak wanhi mene ekhe werek nogo? Neranen wene ekhe lalhinafik, mep lagik-lagokhogo ekhe hilinghinafik, wene pilingiti logolik, an it werekwe asuagaluk, uang onggo wo'netunem ekhe wanhik, igirek mene ekhe werek nogo? Ekhe a'nogo hilingitimo halok, ambotkwe wogisagen he, yagane'ni o,” iluk yagaisasikhe.

⁴ A'nogo yagaisasikhemo, it afuni omanogo nen he, ”Nineisena, haren heranen wene lalninafik, mep lagik-lagokhogo hilingninafik, yi mene ti mene nit mene heligik, ikhi lagen mondok lego,” iluk yagatukwa.

⁵ A'nogo yagatukwama, at Samuel en he, ”Hiren he, haren weak endebat ekhe hilingiti'lek, iluk egep andi, nineisena Tuhan inom, Aren hinoe raja wenagaisogo wokhisikhe mene inom, o yogondak yiba emberek ineilhanem egebo,” iluk yagaisasikhe. A'nogo yagaisasikhemo, iren he, ”Eberogoat egen. Nineisena Tuhan eilhanem ogo o,” iluk yagatukwa.

⁶ A'nogo yagatukwama, at Samuel en wene ekhe mel yagaisasikheat: ”Nineisena Tuhan nen Musa Harun emberek wenaginafikhesik, hit hinombalak o Mesir en woginarek wulibi wagaikhe o.

⁷ Andi nen he, yogondak hinebe an nen nineisena Tuhan eilhanem wene ekhe hinoba fugunemen lobagaigen he, lagubo. Nineisena Tuhan obabut fano nen hit hinombalak hinom faget hilingiri'lago mene andi mondogat hinendawimo eberek logoino o.

⁸ At Yakub againafuri inom o Mesir lagaukwama, afuni Mesir mene nen inoba enggin-fenggin hokhorogo fikhi lagaukwama, iren he, Nineisena, telninabin o, iluk ayonggo fikhi lagaukwama, At nineisena Tuhan nen he, Musa Harun emberek inayonggo fuluk inoba lakfisasikhe. A'nogo lakfisasikhemo, it emberegen hinombalak o Mesir en woginarek o yoma femhogo logouwageluk halogo fisasikhe andi.

⁹ A'nogo meneat he, iren nineisena Tuhan Allah oba inonggoret fuluk welagaukwa. A'nogo welagaukwa andi nen, Aren, ap tentara Hazor mene inoe Panglima Sisera a'nogo inom, afuni Filistin mene inom, afuni Moab mene inoe raja nen inom, mabenetfisaluk inoasuagaluk herakfisasikhe andi.

¹⁰ A'nogo herakfisasikhemo, it weak hilingitukwa mene nineisena Tuhan fakhogo yagatukwasik, Allah ayonggo fikhi logolik mel yagatukwa: ”Nit hat herakfagaluk wulifosik tugwi kembu Baal mene inom, Dewa Asytoret inom, fogerato andi re, weagat hilingito o, nineisena. Weak a'nogo hilingito meneat he, nit ninaselei mene nen ninoasinogo iluk telninabino o, nineisena. Telninafen halok, nit Hat hamu hobaget enek hilingiti logogun o,” iluk yagatukwa andi.

¹¹ A'nogo yagatukwama, At nineisena Tuhan nen he, hit telhinabuageluk attak-attak he Gideon ayonggo fesikhe, ombo'ne re, Barak, ombo'ne re, Yefta, nen wurep oba re an, ninayonggo fuluk hinoba lakninobagai waga laga andi. A'nogo la'ninobagai wagunem, nit andi ninebe lombogen hit hinaselei mene nen hinoasuogoluk ugunem telhinabik wagunem fano lioksek welagep andi.

¹² A'nogo meneat he, it afuni Amon mene inoe raja Nahas nen hinoasigiluk ugunem hasigipsik he, Allah nit nineisena Tuhan logogin ninabit, iluk herakfisaluk he, mel yaganetigip andi: Nit he ap raja mene nen melalninafu werek aple ninamolo,” iluk yaganetigip.

¹³ Halok he, yogondak yethani, hiren hinoe raja wenagaisogo fakhegep a'nogo re, ebe yi. Nineisena Tuhan kino yagatepma re, Aren wokhisikhe andi.

¹⁴ Hit inom, hinoe raja yi inom, nineisena Tuhan Allah legeisogo fikhi logolik, At ebe agaukhogo hinebe At amingmingengge hilinglasimbik, aren komothinafikhe wene andi sagalogo herakfisigi'lek hologo hilingiti logogun halok he, hinendawimo hinagaiyek hikhi logogun o.

¹⁵ Meneat he, hiren nineisena Tuhan ane hologo hilingiti'lek, we sagalogo hilingiti logogun halok he, hit inom hinoe raja wenagaisogo fegep mene ari inom he, hineisena Tuhan he aselei mene higit logogun o.

¹⁶ Yogondak he, wene yi hinesanggo fanorogo holini. Nineisena Tuhan nen elalin mene hit hinelokhoma hokhorogo hilingisigin a'naga futfobagaigen he, hineilenggen fanorogo logoni!

¹⁷ O yogondak hibi mondok meneat he, an nen samban oba nineisena Tuhan yagasigin mene onggo re, Aren unggunggu ane pakhogo lakfei wesimbik, meiso pelabi wesigin. A'nogo pelabi wagunem hineilenggen hambik, hiren he, Nit ninoe raja ekhe menfogoin ninamolo, iluk kino yagato a'nogo re weagat hilingitoma higi, iluk futfogoin o,” iluk yagaisasikhe.

¹⁸ A'nogo yagaisasikhesik he, at Samuel en samban isikhemo re ineisena Tuhan nen o andi sambul unggunggu ane pakhogo meiso pelabi wagaikhe. A'nogo pelabi wagaikhemo, it afuni omanogo mondogaren Tuhan inom, Samuel inom, inoba inailo hokho mene agaukwa.

¹⁹ A'nogo inailo hokhorogo agaukwasik, Samuel mel yagatukwa: ”Neisena. Nit ninebe wa'lago hanogo iluk, heisena Tuhan Allahba ayonggo feino. Nit attak weak hilingitugu mene were'ma re, hobuk ninoe raja ekhe menfeinogoluk yagaheto mene andi inomat weak hilingitoma aro, iluk arat futfogo o, neisena,” iluk yagatukwa.

²⁰ A'nogo yagatukwama, at Samuel en he, ”Hinailo agubo. Hiren weak a'nogo mondogat hilingitep meneat he, hinebe nineisena Tuhan herakfisaluk wulifi'lek hinendawinggen misigat a'luk, At faget enek hilingitu mondok logoino o.

²¹ Hiren At ebe herakfisaluk, tugwi kembu ebe lek mene andi faget, aren telhinafik, lebethisigik, ikhi logogin iluk hinendawinggen oba himbiret fuluk at faget hilingirik laga logogubo.

²² At nineisena Tuhan onggwaregen he, It An nonggwarek nagainafuri asuagaluk woginafi, iluk onggwarek enu hombuk palogo isikhemo re, hit herakhinobagagin mondok lego.

²³ Nen, an nebe re, hit faget samban igi'lek, nineisena Tuhan ane sagalogo herakfisaluk an weak hilingisigin he, nabiro. At he, hiren yi mene ti mene fano higithogo hilingiti logobagaigiluk an nen wene yagahisugu mondok logogin o.

²⁴ Hit he, nineisena Tuhan agaukhogo, hinendawinggen misigat a'luk, hinebe at oba lombokhogo amingmingenggeat logolik, At faget enek hilingiti logoino o. Aren hit faget mondok hokhorogo hilingite mene andi eberek mondok logoino o.

²⁵ A'nogo meneat he, hit inom, hinoe raja inom, weak enek hilingirik laga logogun halok he, hinebe wolelenggen tagalogo leget hinobagagin o,” iluk yagaisasikhe.