1 SAMUEL 11 - Allah Wene Fano Wene Hupla Inane

Saul en ap Amon mene mabenet fisasikhe wene

¹ Hobuk afuni Amon mene inoe enupogot enu Nahas en agoromi tentara mene woginarek afuni o Gilead kota Yabes andoma mene o larogo inoasuogoluk isikhe. A'nogo isikhemo, it ap o Yabesh mene nen Nahas wene yi'nogo yagatukwa: ”Nit hit ninom hundik fano logouwogoluk wene ninom wat-wat uluk he, nit hit hinawe a'ma logolik hinane hologo logogun o,” iluk yagatukwa.

² Yagatukwama, at Nahas nen he, ”Yi'nogo hilingisugun halok enek he, ninom wene elok wat-wat ugun o: Hit afuni Israel mene mondogaren he, nit ninebe inabit higi, iluk inenggali asuageluk, hit hinebe lombok hineilenggen pikhitkwe hemelogo lakfisigi halok enek he, ninom wene elok wat-wat ugun o,” iluk yagaisasikhe.

³ A'nogo yagaisasikhemo, afuni o Yabesh mene inogogwi nen he, at Nahas mel yagatukwa: ”Nit ninenggi 7 hari wo'nisamo niren afuni Israel mene inailokwe yonggo mondogat lakfisilik lagunemen, afuni ekhe nen, hit lebethisogoin ninabit, iluk yaganisugu halok he, nit hat hawea'ma logogun iluk yagahesuogen he, hilingi'ni iluk yaganisan o,” iluk yagatukwa.

⁴ A'nogo yagatukwasik, ap ekhe inayonggo fesukwa mene omanogo yonggo o Gibea at Saul werek oba a'nogo wagaukwa. Wagaukwasik, weim abok a'nogo yagaisasukwama, it afuni inesanggo holhukwasik, inailo nen inane hokhorogo le agaukwa.

⁵ A'nogo le agunem aremnogoat, at Saul eabumo nen anggo sapi waluk wagaikhesik he, mel yagaisasikhe: ”Afuni mondogat le aga lagep oma re, wene ekhe weregen a?” iluk heinok wogisasikhemo, iren he, weim abok ap Yabesh mene nen yonggo wagaikhe mene a'nogo yagatukwa.

⁶ A'nogo yagatunem aremnogoat, at Saul Allah Areagun endawimo peterogo kwisikhemo, at a'mage hokhorogo lagasikhesik,

⁷ anggo sapi ebe pire mene wanhikhesik warogo senggelhikhesik he, sik-pikhogo palhigik fesikhe. A'nogo palhigik fesikhesik, afuni Israel mene inailokwe mondogat lakfikhi logolik mel yagaisoagaluk wene warogo lakfisasikhemo, iren he, mel yagaisasukwa: ”Saul en he, sa nen an Samuel nemberek weim yabi lagunem ninom logoin lek halok he, anggo sapi yi'nogoat palugun o, iluk ikhe,” iluk yagaisasukwa. A'nogo yagaisasukwama, ap Israel mene nineisena Tuhan nen hilingisigin andi inailo nen he, ap ekhe kamo igi'lek felelenghogo inom weim yabi louwogeluk isukwa.

⁸ A'nogo isukwama, inebe o Bezek andoma andogorogo fisasukwasik, inebe inenggi wenaginafukwa. A'nogo wenaginafunem, ap Israel mene inebe 300.000 nen hilinglagaikhe, nen it ap Yehuda mene inebe 30.000 nen hilinglagaikhe.

⁹ A'nogo wenagaisogo fisasukwasik, ap o Yabes nen weim yonggo lakfisa wagaukwa mene omanogo wene yi'nogo warogo lakfisasukwa: ”Ohealekwe mo aganhan agu kwelek, telhinabi wesugun aga, iluk yagaisano o,” iluk wene warogo lakfisasukwama lagaukwasik, yagaisasukwama afuni o Yabes mene wene andi inesanggo holhukwasik he, inendawimo inagaiyek hokhorogo agaukwa.

¹⁰ A'nogo inendawimo inagaiyek agaukwasik, iren he, ap Nahas mel yagatukwa: ”Ohealek halok nit hat hane hologo hawe a'ma logogun, iluk yagahesugun o. A'nogo yagaheto halogen, hat hendawimo nen hilingninabigin anggegen hagat hilingninabinogo,” iluk yagatukwa.

¹¹ A'nogo yagatukwasik were'ma, ohealek huberat siakhogo re at Saul agoromi tentara mene esa henagan logalogo fisasikhesik, o hil mogolhu kwelek, ap tentara Amon mene inawi tenda wurogo welagaukwaba tulem andoma pin talogo kwisukwa. Kwisukwasik o oan yanggothigi'lek werek kwelek at Saul agoromi tentara omanogo nen mabenet fisasukwasik inebe inoatukwa. A'nogo hilingitu aple nen, it ap Amon mene poloksek wulifukwa mene andoma re tel-fol ikhi logolik he inebe pirendek mangothigik misikwe wilibu re elo'lek agaikhe.

¹² A'nogo inoatukwasik, ap Israel mene nen Samuel mel yagatukwa: ”Ap attak inane ikhi logolik Saul he raja logou lek hak, iluk inane ailo legengge isukwa mene omanogo re koma werek? Niren it inebe pinggi inoasuageluk nineisena haren wo'nisa mene hilingiten agwi,” iluk isukwa.

¹³ A'nogo yagatukwa meneat he, at Saul en he, mel yagaisasikhe: ”O yogondak nineisena Tuhan nen againafuri Israel mene telninafemo re, it andi inebe misigat halok ekhe inoasugun mondok lego,” iluk yagaisasikhe.

¹⁴ A'nogo yagaisasikhemo, at Samuel en he, mel yagaisasikhe: ”Nit ninebe mondogat o Gilgal lambik Saul nit ninoe raja arat logouwago, iluk hombuk paluogen he, louwogo,” iluk yagaisasikhe.

¹⁵ A'nogo yagaisasikhemo, it mondogat o Gilgal wagaukwasik, o Allah fogeratarek oba andoma nen Allah nen lambulinabuagaluk at faget wam warogo noleti logolik, ”Saul nit ninoe raja arat logouwak,” iluk it afuni Israel mene inebe mondogat Saul inomen wene andi faget seni isatukwa.