1 SAMUEL 10 - Allah Wene Fano Wene Hupla Inane

¹ A'nogo yagatikhemo, kamo isikhemo re, at Samuel en minyak zaitun amusu i oak oba hinago mene wanhikhesik he, Saul unggul oba kweisalogo watfesikhesik, hai ambe saluk wati logolik mel yagatikhe: ”Nineisena Tuhan nen At againafuri inoe raja logouwageluk menhobagaikhe o. Andi nen he, hat At againafuri inoe raja logolik he, afuni it inaselei mene nen ferinarek logoinogo iluk haren ferinarek logogin o. Haren he, Neisena Tuhan nen at againafuri inoe raja logolik ferinarek logouwagaluk eberogoat mennobagaikhemo, iluk enegat asuagaluk yi'nogo hilinglagunem hagain a'naga.

² Yogondak haren an nobagaluk lambik hilingitunemen, ap inebe pire mene afuni Benyamin mene inaiba o Zelzah, he Rahel salhukwaba andem hinom ambi asugun a'naga. A'nogo ambi asimbik, iren he, mel yagahesugun: Wam keledai longgoikhemo hat herarik lagen a'nogo arat heratasik, heisena endawimo siok ikhesik werek meneat he, hat hebe faget endawi firik logolik: An ninggi'nogo hilingisigin oba namlogo nemberek ambi asugun e, iluk ugu werego, iluk yagahesugun a'naga,” iluk yagatikhe.

³ A'nogo yagatikhesik, ekhe mel yagatikheat: ”Andoma nen pikhit laga logombik, o Tabor e Allah fogeratarek mene eroma andoma lagain hak he, ap inebe henagan mene o Betel en wam Allah faget warogo nolesuogeluk wagunem hinom ambi asugun a'naga. It andem at ekhe re, wam kambing eagwi henagan mene waluk, nen ekhe re, roti ebe henagan meneat waluk, at ekhe re, anggur enggen amusu iwak wam agap oba hilingik meneba hinagongge waluk wagunem ambi asugun a'naga.

⁴ Ambi asimbik iren he, hat hai wathafik, sumburu roti mene pire hat helagain obaat heloageluk wokhetik, ugun a'naga.

⁵ A'nogo hilingi'luk he, hat hebe o Gibea tom Allah andom oba ap Filistin mene inawi su mene wuri'mo andoma lagain a'naga. Lambik, kwe o kota kwagarek oba andem lagain hak he, ap Allah ane yagaisagarek mene esa logalek ekhe o tom oba wam Allah faget warogo noletarek oba andoma nen pi waga logolik, wuni lagik-wagik watik, a'mit sup igik, yi pinggong ti pinggong inom, gitar magendek mene inom, iwak sogoloak hangge inenggi nen watarek mene inom, seruling hulenggen hakhogo watarek mene inom, gitar hokho mene inom, anethilik pi wagunem hinom ambi asugun a'naga.

⁶ A'nogo ambi asimbik andi sambul, nineisena Tuhan Areagun hat hendawimo peterogo kugunem he, hat he it inanggele'ma kwimbik hinom ami'mit sup igik, wuni lagik-wagik watik, igin o. A'nogo hilingitunem he, hat hobabut ket mene hilingisogo hobagaumo hunogoat hilinglasigin a'naga o.

⁷ A'nogo mondogat hilinglagunem hegen halok he, Allah hat setharek mondok logogin andi nen, haren he, Fano yi'nogo hilingisugun, iluk anggegen halok he, andiat hilingi'no o.

⁸ An nebe wesimbigen he, wam Allah faget warogo noletik, Allah ninom hobuk lambulninabuagaluk waretik, haren hilingisigin mene yagahetik, igiluk wesiginmo re, hat o Gilgal lambik an ye'narek henggi 7 nen logoino o,” iluk yagatikhe.

⁹ A'nogo yagatikhemo, at Saul Samuel herakfuluk lagunem aremnogoat, Allah nen Saul obabut ket hunogoat mene wogotikhe. Nen, at Samuel en wene yagatikhe hagat, o andi sambul mondogat hilinglagaikhe.

¹⁰ A'nogo hilinglagaikhe andi, at Saul amingmingengge a'nogo emberek o Gibea wagaukwa hak he, it ap Allah ane yagaisagarek mene esa logalek a'nogo inom ambi agaukwa. A'nogo ambi agunem, Allah Areagun at Saul endawimo peterogo kwisikhesik, it ap Allah ane yagaisagarek mene inom inane ami'mit suphogo wuni lagik-wagik watukwa.

¹¹ A'nogo watukwama, it afuni at Saul obabut inelu mene nen obabut enegat palhukwasik he, it-it mel isukwa: ”Ap Kish amlogo ari obabut yogondak ninggi'nogo hilinglaga anggegep? At ebe Allah ane yagaisikherek mene hilinglaga nogo?” iluk it ekhe nen ekhe inoba heinok wogisigik, isukwa.

¹² A'nogo isukwama, ap misik ekhe andem welagaikhe mene nen heinok wogisikhi logolik he, ”Ap nabi andoma re ningginik mene? Nen hiren anggikhi logolik he it andi ineisena re sa anggegep? Iren kogalek wene ikhi logolik, at Saul ogore nabi nogo a? iluk isukwa a'nogo ero re andiba.

¹³ A'nogo isukwama, at Saul wuni ami'mit suphogo lagik-wagik wa'luk he, o tom oba yi mene ti mene Allah faget noletarek oba andoma lagasikhe.

¹⁴ A'nogo lagagunem, at Saul eisena agot a'nogo nen eilenggen isasikhesik, it heinok wogisikhi logolik, hit he koma nen wagep? Iluk heinok wogisasikhemo, iren onggo yagati logolik he, ”Nit he wam keledai longgo ikhe mene herarik lago mene re legen he, Samuel oba lagosigen wago o,” iluk yagatikhe.

¹⁵ A'nogo yagatikhemo, aren he, ”Wene ninggi'nogo yagahisikhe,” iluk heinok wogisasikhe.

¹⁶ Heinok wogisasikhemo, at Saul en he, ”At Samuel en he, wam longgoikhe mene andi arat herata, iluk yaganisikhe o,” iluk yagatikhe. A'nogo yagatikhe meneat he, aren he, ”At Samuel en an nebe raja logouwagaluk mennobaikhemo wagi o,” iluk eisena agot a'nogoba yagati'lek endawimo kamo isikhe.

Saul wenagaisogo raja menfesukwa wene

¹⁷ A'nogo isukwasik oba nen, at Samuel en afuni Israel mene mondogat o Mizpa andogosi wesuagaluk wolisasikhemo wagaukwama re, yi'nogo yagaisasikhe:

¹⁸ ”Nit afuni Israel mene nineisena Tuhan Allah nen he, wene mel ikhe: An nen hit hinebe afuni Mesir mene nen inomameba fethinarek were'ma telogo wokhinarek wulibi wagagisik he, afuni inunggulenu hunogoat mene nen yi enggin ti enggin hilinghinafunem telhinafi lagi andi.

¹⁹ An nen hit yi enggin ti enggin a'nogo hikhi logolik mondok weak were'ma telhinafi lagi meneat he, An nen hit hinoe raja yi logouwak, iluk wenagaisogo wokhisoageluk, An hineisena Allah nebe hinabiren heraknobagagep andi. Halok he, hit hinunggulenu lombok logalhigik, hineisok erokwe lombok logalhigik, An hineisena Tuhan neilhanem andogosi we'ni o, iluk yagahisikhe,” iluk yagaisasikhe.

²⁰ A'nogo yagaisasikhesik, afuni Israel mene inunggulenu lombok mondogat tegelogo elokhoma asi wesuagaluk yagaisasikhemo wagaukwama re, Allah nen wenatikhe mene a'nogo re, it inunggulenu Benyamin mene inoba agaikhe.

²¹ A'nogo hilinglagaikhemo, it inunggulenu Benyamin mene a'nogo akhogo hilingik mene higithogo elokhoma asi we'ni, iluk yagaisasikhemo wagaukwama re, it hun Matri eisok erokwe mene tegelogo wenaginafikhe. Andi nen kobokhogo re it hun Matri eisok erokwe mene ap mene nek elokhoma asi wagunem he at Saul hun Kish amlogo a'nogo agaikhe. A'nogo agaikhemo iren Saul ebe heratukwaba nen he at ebe andoma welagaikhe lek.

²² A'nogo legen he, it afuni omanogo nen nineisena Tuhan mel yagatukwa: ”Nineisena, ap Haren wenaten mene andi ebe yoma werega? Lega,” iluk heinok wokhasukwama aren he, ”At Saul ebere sunggwe andogorogo fegep oba ambotma andoma hinago werek a'naga o,” iluk yagaisasikhe.

²³ A'nogo yagaisasikhemo, it ap ekhe nen weak-weagat Saul hondosi lagaukwasik he, afuni inanggele'ma fei wagaukwa. Fei wagaukwama, at Saul afuni omanogo inanggele'ma menlagaikhe mene re, it ap fenakwe mondogat inoagese re, omolobene agaikhe. Meneat he, at enek he, oagese mondok uan agaikhe.

²⁴ A'nogo hilinglagaikhemo, at Samuel en he, afuni omanogo mel yagaisasikhe: ”Ap nineisena Tuhan nen wenagaisogo menfikhe mene ebere yi aro. Nit ap Israel mene mondogat at ninom higit mene ekhe lego,” iluk yagaisasikhe. A'nogo yagaisasikhemo, it afuni omanogo mondogat inane ami'mit suphogo re, ”Wa, wa, wa, ninoe kain henupogot hat aro,” iluk elokhe wanhukwa.

²⁵ A'nogo elokhe wanhukwama, at Samuel en Saul eise logolik hilingiti logogin mene afuni omanogo yagaisasikhesik he, lisu palogo o Allah onggwarek awi wuri'mo obalik hore'ma a'nogo fesikhe. A'nogo arat hilingi'luk he, afuni omanogo mondogat inawilokwe lombok inambotkwe loageluk lakfisasikhe.

²⁶ A'nogo lakfisasikhemo lagu kwelek, at Saul ogore, aiba o Gibea laga logolik, ap inebe fenakwe inobabut mondok hibilik-hebelek mene nek Tuhan nen inendawimo hilingfesikhemo inom lagaukwa.

²⁷ A'nogo meneat he, it ap fena ekhe inobabut weak mene nen ikhi logolik he, ”Ap yi nen nit faget elok tegelninafi logogin anggegeba?” iluk isukwa. A'nogo isukwasik andi nen he, Saul inendawimo seramet fesukwasik, yi mene ti mene endawimo fanorogo ekhe wogoti'lek halolot fisasukwama re, at Saul en ogo eilenggen isigi'lek fukhanggo hilingitikhe.