1 SAMUEL 1 - Allah Wene Fano Wene Hupla Inane

Ap Elkana againafuri inom o Silo logolik hilingitukwa wene

¹ Ap misik ekhe enu re Elkana welagaikhe, nen at ebe unggulenu Efraim mene, awi re o Efraim tom oba o kota Rama andoma welagaikhe, hun Elkana ebe re ap Yeroham amlogo, hun Elihu omba, arigini'mo re at andi re it ap Tohu inap it Suf mene andi nen akhogo tagomangge mene welagaikhe.

² Ap Elkana andi agagwi inebe pire. Inenu re, Hana inom, Penina inom. At Penina eagwi taginafi lagaikhe meneat he, at Hana nek he, eagwi lek welagaikhe.

³ A'nogo logolik, at Elkana re nineisena Tuhan Allah omame hokho mene a'nogo fogeratik, wam warogo noletik, igiluk tahun hundik-hundik o Rama nen o Silo waga lagaikhe. O Silo andoma Allah eisewerek mene re, ap Eli againafuri Hofni inom, Pinehas inom welagaukwa.

⁴ A'nogo were'ma at Elkana nen wam warogo Allah noleti lagaikhe andi mene ebe lombok noleti logolik, wam senggelek fenakwe, he Penina eagwi mondogat inom inebe lombok wogisikhi lagaikhe.

⁵ A'nogo meneat he, at he Hana nek he, Tuhan nen omalik ekhe wogeti lagaikhe lek andi nen, we at faget enek endebat wogeti lagaikhe. A'nogo wogeti lagaikhe meneat he, at Elkana nen, he Hana andi endawi hundik mondok welagaikhe.

⁶ A'nogo werek kwelek, At nineisena Tuhan nen at Hana omalik wogetikhe lek andi nen, ege Penina nen ane asegen waganogo wenagetu mondok were'ma, endawinggen warugu mondok welagaikhe.

⁷ A'nogo hilingiti lagaukwa andi re, yi tahun ti tahun nineisena Tuhan awi wuri'mo we'luk, he Penina nen ege Hana enggali warogo wene nek wenagetu were'ma re, aren an a'nogo hilingnobagakhi logolik sebelogo nobagali'lago oma re nabiragi, iluk sumburu ninggi'lek le nek agu mondok welagaikhe.

⁸ A'nogo nek hundik-handik hilingitu logolik, at Elkana nen agwe Hanaba heinok yi'nogo wokhasikhe, ”Hat he ninggi'nogo nen le nek agu mondok welagen nogo? Nenahalok sumburu ninggi'lek hendawimo heiselogo nek welagen? Hat hagainafuri ap mene nek inebe 10 nen logoilepma mene ogore, it werek kwelek meneat he, an enek he hendawinggen tulemhogo logoilen lega? A'nogo hilingnarek logoilen o,” iluk yagatikhe.

He Hana nen ap Eli eilhanem samban isikhe wene

^9-10 Inenggi ekhe sambul he, at Elkana againafuri inom, wam inom, yi mene ti mene inom, o Silo Tuhan awi wuri'mo omanogo nen nasukwasik he, nasukwaba aremnogo nen at Hana a'nogo siakhogo menlagaikhesik, endawimo mondok weak agaikhesik endawi ane tuk-tuk le aga logolik he eisena Tuhan oba samban isikhe. Andi sambul he, ap Eli Allah eisewerek mene andi ebe nineisena Tuhan awi kweba horokhogo aremnogo kursi ba hurek welagaikhe.

¹¹ Werek kwelek, at Hana nen samban Allahba wene yi'nogo waretikhe: ”Neisena Tuhan Homame Mondok Hokho mene a'nogo nen an hamingmingengge heilenggen wo'nabin o, neisena. An hamingmingengge yi mondok weak welagi andi heilenggen neambik hera'nobagagi'lek, noba ebe'no o, neisena. Haren an neak ap ekhe wo'neten halok, an nen at andi ebe hat faget mondok logouwageluk ambotkwe wokhesigin o, neisena. Nen, at ebe ta'laga halok, esi re palhi'lek herakfikhi logogiluk wene watheti o, neisena,” iluk yagatikhe.

¹² At Hana a'nogo samban aninurogoat ugu were'ma, at Eli Hana ambeba eilenggen kumuti lagaikhe.

¹³ At Hana samban ane igi'lek endawimo nen ikhi logolik, ambe nek lebeti lagaikhe andi nen, at Eli endawimo nen he, ”He andi anggur amusu ninggesigen lugulugwi agasik hilingiri'lago higi,” iluk anggasikhe.

¹⁴ A'nogo anggasikhesik, mel yagatikhe: ”Hat o yoma nen lugulugwi palu lek meneat palhendik hilingiti lagen yoma ri! Anggur amusu hobuk ekhe inom nagun o,” iluk yagatikhe.

¹⁵ A'nogo yagatikhe meneat he, at Hana nen mel yagatikhe, ”Neisena. An anggur amusu ninggi'legat. Nen, lugulugwi paluogeluk nenggarek mene ekhe ninggi'legaro. We, an nendawimo mondok weak logolik, nendawinggen warikhi lagi mene andi mondogat pilingisogo nineisena Tuhan yagati lagi o, neisena.

¹⁶ Hat hendawimo nen he, ”He yi yanani hilingirik nikherek mene higi, iluk hendawimo anggagun o. An weak welagi andi nen nendawimo weak agarik, samban yi'nogo ikhi lagi o, neisena,” iluk yagatikhe.

¹⁷ A'nogo yagatikhemo, at Eli nen he, ”Allah afuni Israel mene nineisena a'nogo nen hane esanggo holhimbik haren kino yagaten mene andi wokhesuago. Andi nen he, hendawimo fanorogoat haiba lano,” iluk yagatikhe.

¹⁸ A'nogo yagatikhemo, at Hana nen Eli yagati logolik he, ”Neisena, an hamingmingengge hendawitnafi logoino o,” iluk yaga'luk he, sumburu nagaluk wagaikhesik endawimo fano logolik oba heanerogo nasikhe.

Samuel ebe ta'lagaikhemo Tuhan wogetukwa wene

¹⁹ A'nogo naluk nogo isukwasik, at Elkana againafuri inom ohealegat siakhogo ineluk agaukwasik, nineisena Tuhan fogera'luk inambotkwe o Rama lagaukwa. Lagaukwasik, at Elkana agwe Hana emberek nogo isukwama, Hana nen Tuhan oba kino yagatikhe mene a'nogo ane esanggo holhikhesik wogetikhe.

²⁰ A'nogo wogotikhemo, omalik a'ma agaikhesik he, eak ap takhasikhe. Takhasikhesik, mel isikhe, ”An neisena Tuhan kino yagatimo neak wo'nete,” iluk isikhesik enu Samuel salhikhe.

²¹ A'nogo salfuluk, at Elkana againafuri inomen, ”Tahun welagosi'mo,” iluk wam Tuhan faget warogo nolesuogeluk o Silo wagaikharek oba arat asi wagaikhe. Wam a'nogo warogo Allah noleti logolik, Allah onggwarek faget wam abirengge ekhe warogo nolesigin iluk wene attak waretikhe mene a'nogo higithogo nolesigiluk wagaikhe.

²² A'nogo wesigiluk ugunem, at Hana enggi andi sambul enek he kamo igiluk, agun mel yagatikhe: ”An neak Samuel eilak arat palhu halok enek he, ebe nineisena Tuhan awi wuri'mo mondok logouwagaluk waluk lagain enggere, kamo igin o,” iluk yagatikhe.

²³ A'nogo yagatikhemo, at Elkana nen yagati logolik, ”Fano, a'nogo anggegen halok he, hilingisin o. Omalik ari eilak paligin oba arat asi wagu halogen, lanogen he oloba kamo in o. Haren yi'nogo hilingisigin, iluk nineisena Tuhan wene wareten mene andi eberogoat hilingi'nogo,” iluk yagatikhe. A'nogo yagatikhemo, at Hana oloba kamo isikhesik were'ma nen omalik a'nogo eilak arat paligin oba horok asi wagaikhe.

²⁴ A'nogo asi wagaikhemo, at Samuel a'nogo eilak palogo fesukwasik he, ebe yenggerek magema, agaisa nen waluk Tuhan awi wuri'mo o Silo wagaukwa. A'nogo waluk waga logolik, wam sapi ai mene ebe umur 3 tahun sebelek mene inom, gandum enggen 10 kilo mene inom, iwak wam agap mene hilingik meneba i anggur amusu ambem hetokhogo hinago mene inom, waluk wagaukwa.

²⁵ A'nogo waluk wagaukwasik, wam sapi a'nogo warogo senggelhukwasik he, Samuel ebe Eli oba waluk kwisukwa.

²⁶ Kwisukwasik, Hana nen Eli mel yagatikhe: ”Neisena. An nebe futnobagegen a? An nebe re, ya mendek logolik neisena Tuhan samban oba kino yagatunem, hat heilenggen tomok neasigin mene a'nogo o.

^27-28 An neak yi re, neisena Tuhan samban oba kino yagatigi a'nogo, Aren nane esanggo holhesik, wo'netemo nen he, omalik yi ebe Tuhan onggwarek faget mondok logouwageluk wogosigilugen waluk wagi o,” iluk yagatikhe. A'nogo mondogat hilingitukwasik, iren Tuhan fogeratukwa.