1 PETRUS 5 - Allah Wene Fano Wene Hupla Inane

”Allah againafuri yi'nogo kwelaginarek logoino,” iluk yagaisasikhe wene

¹ Hit Allah againafuri kwelaginarek welagep andi hak, an a'nogoat kwelaginarek welagirek mene nen ekhe komothinabik. At Kristus oba yi enggin ti enggin hilik-hilik wa'lagaikhe andi, an neilenggen hasigi. Nen, hobuk Allah nen ebe weinamhogo lakfei wesigin andi wagunem, afuni nen fogerasugun sambul andi, an ninomat fogerasugun aro. An nane liokhogo komothinabik.

² Allah nen he, ”An nagainafuri wam domba hangge yi'nogo kwelaginarek logoino,” iluk hinayonggo fesikhe hagat kwelaginarek logoino. Kwelaginarek logolik, hinonggwarek hinabit werek kwelegat, afuni ekhe nen, inane ninghogo yagahisugunem kwelaginarek welagik, nen, hinendawimo nen, ”Onggo ekhe wo nisoak,” iluk anggikhi logolik kwelaginarek welagik, ikhi logogubo. Athe, we, hinendawimo hinagaiyekhogo kwelaginarek logoino o.

³ Allah againafuri kwelaginarek logouwageluk sumburogo wokhisasikhe andi kwelaginarek logolik, hinebe kain hak logolik, set kwil-kwalhogo hilinginafi logogup. We, hit fano hilingitunem ineilenggen hisaluk hinobabut waganogo hilingiti logouwageluk, fano hilingiti logoino.

⁴ A'nogo hilingitu were'ma re, ninoe anggo eisewerek a'nogo wesimbik he, ”Fano mondok hilingiti lagepma,” iluk sa awewerek-sa awewerek lagunem onggo kware-kware ikfisagarek andi hak fogeratu mondok logogun mene wokhisagain o.

⁵ Nen, andi hagat he, hit ap alage nagoromi. It ekhe nen Allah aneba mel isukwa: ”Afuni inonggwaregen fogerakhugunem, Allah nen inoasigeluk abit isikherego. Meneat he, inonggwarek inendawinggen sebelek logogun halok, endawirinaferego,” iluk lisu palogo fesukwama werek andi nen, hiren inaluendek inawe a'ma kuluk inane hologo hilingiti logoino o. A'nogo hilingiti logolik hit mondogat he, hinonggwaregen fogerakhigi'lek inawe a'ma logolik, hit ekhe nen it ekhe inamingmingengge welagik, iren hit hinamingmingengge welagik, ikhi logolik lebet-lebet ikhi logoino o.

⁶ A'nogoat, Allah nen hobuk hinenuwerek menhinobagauwageluk, yogondak ya hinonggwaregen fogerakhigi'lek, at enggi omame werek mene awe a'ma kuluk hinendawinggen sebelogo logolik hilingiti logoino o.

⁷ At Allah re hit hinebe fethinarek mondok werek andi nen, hiren yi mene ti mene faget hinendawimo menenei uan horok ebeti lagep mene andi herakfisaluk, at oba nek wogeti logoino.

⁸ At Iblis, hinom weak mene a'nogo nen, mene singa aik anini mene nen yi mene ti mene haumhogo nageluk ane kwe agan herarik nikherek andi hak, ”Sa hak weagetfagain,” iluk herakhinabik nikho andi, hinebe hebelogo hineilenggen fanorogo logoino o.

⁹ A'nogo logolik, hinendawimo nen, ”Ninerugwi ninagaila'lak o yi awi ti awi andoma yi enggin ti enggin hili'lagwi hagat hikhi lago,” iluk, at Iblis wagunem, ane holhi'lek herakfisaluk hinendawinggen Allah oba eberogoat himbiret fuluk ninghogo mendek logoino o.

¹⁰ Were'ma, at Allah ebe fogeratu mondok logogun andi hak, hit Kristus hinom hundik were'ma hinomat fogethinafu logouwageluk hinayonggo fesikhemo, yogondak ya endebat enek hinoba yi enggin ti enggin hikhi logombik, hobuk at obabut fano mondok a'nogo nen, katokhogo hilinghinafik, hinendawinggen wurigetfigik, hinomamethinafik, hambugethinafik, igino.

¹¹ Yi mene ti mene mondogat at alegat eise logolik fisogo mondok logouwak, iluk, ”Amin,” igi andi.

Wene wurep kobokhogo hai warinafikhe wene

¹² An nen wene horogat andi komorogo hinoba lakfei wesigeluk he, lisu paluageluk an nagot Allah amlogo Silas andi obabut humbunse'ma higirik he, ayonggo figimo lisu yi palhemo hinoba lakfei wagi andi. Allah obabut fano nen hilingninabi'logo mene ebe yiat iluk, an nelu logolik eberogoat yagahisigi o. Halok, hinendawinggen andibaat himbirik logolik, ninghogo mendek logoino, iluk wene lisu palogo hinoba lakfei wagi andi.

¹³ Hinerugwi hinagaila'lak Allah againafuri aren wenaginafikhe mene o Babylon yoma welagaikharek mene nen hai wathinafik, namlogo Markus nen hai wathinafik, aga o.

¹⁴ Nen, hit-hit nendawi-hendawirogo hai hinambe saluk wat-wat ilik lano o. Allah nen hit Kristus hinom hundik mene halok hinebe mondogat hinendawinggen hambukhogo fethinarek logouwago.