1 PETRUS 4 - Allah Wene Fano Wene Hupla Inane

”Hinobabut ket mene hilinglasimbik, yi'nogo hilingiti logoino,” iluk yagaisasikhe wene

¹ Afuni yi enggin ti enggin haluk, inebe wa'la'luk, hobuk weak hilingiti logogun lek andi nen, at Kristus yi enggin ti enggin hilik-hilik ebe wa'lagaikhe andi hak, hit ogo re, afuni sing ikhaluk inebe hebelogo welagaikharek andi hak, at Kristus obabut waganogo, yi enggin ti enggin hikhi logolik hinomamerogo logoino o.

² Andi nen hiren he, afuni yi mene ti mene inamolo nen inendawinggen en ninggerek andi mene herakfisaluk, huli yogondak huli nen he, hineluk logolik Allah endawimo amolo anggikherek mene andi higithogo hilingiti logoino o.

³ Hit attak he, hinobabut it afuni Allah ane inonggot mene nen inendawimo anggaluk hilingitarek andi hak, arat hilingiti logolik he, weak hinenggali legat hilingitik, hinendawinggen en nunggunem pailak fakfisigik, pailak fakhinobagauwageluk hilingitik, enggen amusu weak mene naluk hinendawinggen lek hilingitik, seni naluk hesangge-pesangge hilingitik, amusu weak mene andi hinoba lagolegat ninggik, tugwi kembu endawimo weak asinogo iluk, fogerasu lek mene fogeratik, ikhi lagagip andi.

⁴ Meneat he, yogondak hit hinobabut it weak inamolorogo mondok hilingirik, lagaikharek andi hak hinom hilingiti'lek kamo ikhi lagep andi nen, hit hinabok weak pali'lagwi andi.

⁵ Meneat he, at Allah nen, afuni ineluk mene inom, wa'lagaukwa mene inom, inanema waganogo wene inoba figik, kotik, igeluk endawimo anggikhesik werek. A'nogo wene inoba fugunem, iren, wene inoba koruogeluk, ”Nit yi'nogo hilingiti lagagu, ti'nogo hilingiti lagagu,” iluk yagatunem elo'lek asigin weregaro.

⁶ Andi nenat, it afuni wa'lagaukwa mene andi, Allah nen nit afuni mondogat wene ninoba figik, kotik, ikherek andi hak inoba fesikhemo, inebe wa'lagaukwa meneat he, at Allah endawimo anggasikheba inareagun eluk welagarek andi hak ineluk logouwageluk, at Kristus nen fano wene yagaisa lagaikhe andi.

”Hit-hit hinobabut ket mene yanggulik laga logoino,” iluk yagaisasikhe wene

⁷ Yi mene ti mene mondogat wurep oba hilinglasigin mene horogat asi waga iluk, samban ikhi logouwogeluk, hinendawinggen sebelek logolik, hinobabut hebelogo logoino.

⁸ Wene esin hangge re, hit-hit nendawi-hendawirogo hilingiti logolik, ekhe nen ekhe weagetfagain mene sebelogo mondok legetfogoin andi nen, hit-hit hinerugwi hinagaila'lak hinom nendawi-hendawirogo mondok hilingiti logoino o.

⁹ Hinerugwi hinagaila'lak hinom, hit ekhe nen it ekhe inaiba lagik, iren hit hinaiba wagik, ikhi logolik, inebe woginabik he, hinendawimo nen, ”Nabire,” iluk anggigi'lek woginafi logoino.

¹⁰ At Allah obabut fano nen, ninebe lombok ninobabut hunogo tomok wo'nisasikhe higithogoat, hinebe lombogen andi mene fano eise logolik, hit-hit lebet-lebet ikhi logoino o.

¹¹ A'nogo ikhi logolik, Yesus Kristus hinom hundik logolik hilingitunem, it afuni ekhe nen Allah fogerati logouwageluk, hit ekhe nen wene yagaisikhi logolik, Allah aneat yagaisigik, hit ekhe nen it ekhe leberisikhi logolik, Allah omame wo'nisikherek andibaat leberisigik, ikhi logoino. A'nogo hilingiti logolik, Yesus omame hokho etok mondok welagarek mene a'nogo fogeratu logouwogeluk, ”Amin,” igi andi.

”Hinebe Kristus againafuri andi nen, hinoba yi enggin ti enggin agarek andi,” iluk yagaisasikhe wene

¹² Nerugwi nagaila'lak. Hinebe nendawi e. Endu aik hagarek andi hak, Allah nen he, hinobabut paligeluk yi enggin ti enggin hinoba agunem, hinendawimo nen he, ”Yi hunogoat hogorek lek mene ninoba ari'logo,” iluk anggagubo.

¹³ At Allah nen Kristus ebe weinamhogo lakfei wagunem, fogerasugun andi sambul, wagunem hinendawimo hinagaiyek hokhorogo anggouwogeluk hinendawimo nen he, ”At Kristus oba yi enggin ti enggin hilik-hilik wa'lagaikhe hak, nit at ninom hundik logolik a'nogoat hikhi lago,” iluk hinendawimo hinagaiyek hikhi logoino.

¹⁴ Afuni ekhe nen at Kristus faget wenakhisugu halok he, hinendawimo nen he, ”Allah Areagun fogeratarek mene a'nogo ninoba louk ikhemo welago,” iluk hinendawimo hinagaiyek anggikhi logoino o.

¹⁵ Meneat he, it ekhe nen afuni inoatik, yogot wanhik, weak hilingitik, it ekhe inawene mene talambogengge hilingitik, ugunem, yi enggin ti enggin inoba agarek andi hak, hit a'nogo hilingitunem hinoba asinogo.

¹⁶ Meneat he afuni ekhe nen, ”Hat Kristus agot, hebe Kristen mene,” iluk yi enggin ti enggin hilinghinafa halok, hinenggali agubo.” We, an Kristus agot halogat at enu mene an nenu salogo yaganeri'lagwi andi fano aro,” iluk Allah fogerati logoino.

¹⁷ Allah nen ninanema waganogo wene ninoba figik, kotik, igin andi arat horogat asi waga. A'nogo hilingiti logolik he, nit Allah againafuri mene tak ninanema waganogo wene ninoba figik, kotik, igin halok, hobuk it afuni ekhe Allah ane fano wene wanhi'lek mene ninggi'nogo hilinginabigin anggegep.

¹⁸ Afuni nen Allah aneba mel isukwa: ”Afuni higithogo hilingiri'lagwi mene, Allah nen telinabigin lek hangge were'ma, telinabigin andi nen, it Allah ebe inendawimo sebelfuluk weak hilingiri'lagwi mene andi ninggi'nogo hilinginabigin anggegep,” iluk lisu palogo fesukwa.

¹⁹ Hit Allah endawimo anggasikheba at hinoba yi enggin ti enggin a'nogo hikhi lagep halok he, hinendawimo nen he, ”At ninebe elalninafikhe mene andiat oba himbirik logogun he, fano,” iluk hinendawinggen at oba eberogoat himbirik logolik hinobabut fano hilingiti logoino.