1 PETRUS 3 - Allah Wene Fano Wene Hupla Inane

Hemi ap inagagwi inaguni inom inobabut hilingiti logogun wene

^1-2 Andi hak, hit hemi ekhe hinaguni Allah ane wanhi'lek mene hinane yagaisogoin oba fuk. We, hinobabut hineil lomborogo hinaguni inane hologo hilingitunem, iren ineilenggen hisaluk, Allah werekwe we'luk ane wanuageluk, hinonggwarek hinaguni lombok inawe a'ma kuluk inane hologo hilingiti logoino o.

³ Hinoba fanorogo, hinagap endakwe mene faget wanhi logogup. Andi re, hinesi lalhik, hinalilingge emas mene wanhik, su fano onggo hokho mene labetik, ikhi logogubo.

⁴ Athe, hinoba fanorogo re, hinendawinggen faget hinago mene andi wanhi logoino. Andi re, hinobabut mondok logogin mene enago welagik, lioksek welagik, ikhi logoino o. Hinobabut Allah eilhanem a'nogo hilingitunem, at endawimo nen fano mondok anggikherek he andi aro.

⁵ Attagat it hemi Allah a'logomi mene inendawinggen Allahba himbirik logolik, inoba fanorogo a'nogoat inaguni lombok inawe a'ma logolik inane hologo hilingiti lagaukwa.

⁶ At he Sara a'nogoat agun Abraham awe a'ma logolik ane hologo hilingiti logolik, hai he, ”I, noe,” iluk hai wati lagaikhe. Hit yogondak ogo re, afuni nen hinailo asuageluk hilingitunem hinailo agi'lek fano hilingiti lagep halok he, at Sara eagwiat welagebo.

⁷ Nen, hit ap ogo re, Allah obabut fano nen hinagagwi hinom higithogoat hineluk mondok logouwageluk eisewerek hinobagaikhemo welagep andi nen, hit samban ugunem Allah nen hinane esanggo holhi'lek kamo inogo iluk, hinagagwi hinom fano logolik, hinendawimo nen he, ”Hemi inomame lek,” iluk futfuluk, hinane agaukhogo yagaisigik, hinendawirinafik, ikhi logoino o.”

”Hinerugwi hinagaila'lak hinom nendawi-hendawirogo hilingiti logoino,” iluk yagaisasikhe wene

⁸ Wene andi wurep kobokhogo mel yagahisak. Hit hinebe mondogat hinendawimo nen he, ”Ninebe Allah againafuri ninerugwi ninagaila'lak ninom,” iluk, hinendawinggen hundik logolik, hinendawimo misigat mene anggigik, hinendawinggen misigat mene ebetik, ikhi logoino. A'nogo ikhi logolik, hinonggwaregen fogerakhigi'lek, hinendawinggen seberogo logolik, hit-hit nendawi-hendawirogo hilingiti logoino.

⁹ Afuni ekhe nen hit weak hilinghinafunem, hiren onggo weagerinafubo. Nen, inane asegen weak wokhinafunem hiren onggo hinane asegen wogisagubaro. Onggo re, Allah nen inebe fanorinabuageluk, ayonggo fikhi logoino. Hobuk aren fano mene wokhisageluk hinayonggo fesikhe andi nen, hiren onggo fano mene yagaisikhi logoino.

^10-12 Wene andi faget mel isukwa: ”Afuni inobabut nineisena Enupogot endawimo amolo anggikherek mene higithogo hilingiri'lagwi mene halok, At eilenggen inoba logolik, samban ugunem inane esanggo holherego. Meneat he, it weak hilingiri'lagwi mene halok, elokhe age warisikherego, andi nen he, sa nen, An neluk ekhe inom logoile iluk, hundik-handigat fano mene nek hilinglagunem hikhi logoile, iluk logou amolo halok he, amelinggen oba nen weak wene igi'lek welagik, ambeba nen eranenat afuni ekhe lalinafi'lek welagik, weak mene ambotma herakfisaluk fano mene nek hilingitik, obabut afuni ekhe inom lambulogo fano welagaikharek andi mene esinet fuluk omamerogo hilingirik lagik, ikhi logouwago,” iluk Allah aneba lisu palogo fesukwa.

¹³ Hit he, fano hilingiti logouwogeluk anggilukhogo hilingiti lagep halok he, sa nen weagethinabigin nogo? Weagethinabigin lego.

¹⁴ Meneat he, higithogo hilingitunem weagethinafa halok, yi enggin ti enggin hikhi logolik, hinendawimo hinagaiyek hikhi logoino. Hinailo asuageluk hilinghinafunem, hinailo a'luk hinendawimo menenei uan horok ebetubo.

¹⁵ Hiren he, Kristus agaugwerati logolik, ”Ninoe Enupogot aro,” iluk hinendawinggen oba nen fogerati logoino. Fogeratunem, it ekhe nen heinok hinoba wokhisikhi logolik he, ”Fano asigin, iluk oba eberek welagep andi nenahalok,” iluk yagahisugunem he, onggo wene furogo yagaisogoin mene hinendawimo eberek mondok logolik,

¹⁶ hinane liokhogo hai warogo yagaisikhi logoino. A'nogo yagaisikhi logolik, hinendawimo nen he, ”An wene noba selego,” iluk anggikhi logolik, Kristus hinom hundik logolik, fano hilingitunem, afuni nen hinabok weak palugun mene andi ineilenggen hisaluk inenggali asuguno.

¹⁷ Hit weak hilingitunem hinoba yi enggin ti enggin hinobabut oba fikhi logogun halok weak. Meneat he, hiren fano hilingitunem, Allah nen, ”It yi enggin ti enggin hoak,” iluk anggikhe halok enek he, fano o.

¹⁸ Nit afuni weak hilingitorek andi faget ninenggi elugun oba, at Kristus hobuk wa'lagi'lek logoigeluk misigam fagerat katokhogo wa'lagaikhe. Ninebe Allah oba wo'ninarek lageluk he, at obabut higit hilingiterek mene nen, nit ninobabut weak hilingitorek mene faget wa'lagaikhe andi. Ebe nit afuni mene andi watukwama wa'lagaikhe meneat he, areagun mene andi Allah nen eluget fesikhe andi.

¹⁹ Eluget fesikhemo re, it ekhe inareagun hele warek were'ma omanogo wene yagaisa lagaikhe.

²⁰ Inareagun andi inebe re, attagat at Nuh nen kapal wutu kwelek, Allah obabut fano nen kwelaginarek werek kwelegat he, wene wanhi'lek herakfisaluk weak hilingitu mondok were'ma i fu nen inoatikhemo wa'lagaukwa mene andi. A'nogo inoatu kwelegat he, it ekhe e so elema kuluk welagaukwa mene, inebe 8 en endebat i fu andiba telinafikhe andi.

²¹ It iba telinafikhe andi walse'ma, nit yogondak ima pogorek andiba telninaferego. Iba telninaferek andi re, ima pelakninafunem ninagap i andiba sobalagarek andiba telninaferek fuk. Athe, ninendawinggen oba nen wene ninoba selek asuageluk Allah ayonggo fugunem, Yesus Kristus wa'lagaikhesik eluk agaikhe andiba telninaferego.

²² At ebe eluk agaikhesik he, pogoroba lagasikhesik, Allah era'lu kain logolik, malaikat Allah nen yonggo pelakfisa wagarek mene omanogo inom, inogogwi kaindek mene inom, inomame hokho mene inom, ferinarek welagarego.