1 PETRUS 2 - Allah Wene Fano Wene Hupla Inane

”Yesus ebe helep o tik watarek andi hangge aro,” iluk yagaisasikhe wene

¹ Andi nen, hit weak hilingiti lagep mene andi mondogat herakfisaluk logoino o. Afuni ekhe lalinafik, hinendawinggen pire hilingitik, wene palhik, hinera nen afuni ekhe inabok weak palhik, ikhi lagep andi, herakfisikhi logoino o.

^2-3 Yi mene ti mene enduk mikhaluk, fano agarek andi hak, ninoe Enupogot obabut fano hikhi lagep andi nen he, omalik ket tago mene eilak nele nen nunggu mondok welagaikharek andi hak, wene fano wene hinendawinggen andiba wurik asumo fanothinabuagaluk, wene andiat wanhu mondok logoino o.

⁴ At ebe helep hangge eluk welagarek mene iluk he, oba we'no. Afuni nen he, ”Helep andi weak,” iluk hebisasukwa meneat he, Allah nen he, ”Helep yi mondok fano meneat,” iluk wenagaisogo esinet fesikhe.

⁵ A'nogo fesikhemo, hit hinebe helep eluk welagarek andi mene hangge logolik, at oba we'nio. At oba wagunem, Allah nen he, at onggwarek awi wurogo hinobagauwak. At awi wuri'mo, hinebe Allah eiseweregat Yesus Kristus hinom hundik logolik, Allah endawimo fanorogo anggo wareti logou hak, hinendawinggen wogeti logoino o.

⁶ Wene andi faget Allah nen mel isikhe: ”An nen, helep fano mondok mene wenagaisogo o Sion andoma o tik ekhe warogo figi yi hani! Hit afuni hinebe lombok hinendawinggen at oba himbirik logogun halok he, hinenggali hogoin lego,” iluk isikhemo lisu palogo fesukwa andi.

⁷ Hit hinendawinggen at oba eberogoat himbirik werek mene nen he, ”At fano mondok,” iluk futfikhi lagep andi. Meneat he, it ekhe inendawinggen at oba himbiret figi'lek mene faget enek he, mel isikhe: ”It ap tukang o helep mene wutarek mene nen, o ebe wuti logolik he, Helep yi weak, iluk herakfisasukwa mene andi obuleat ya'lagama o,” iluk isikhe.

⁸ Nen, ekhe mel isikhe: ”Afuni helep andiba ineisok a'lip silukhogo waraluk, talorogo laga logoguno,” iluk isikhe. A'nogo talorogo laga logogun andi re, iren fano wene andi, ”Eberogoat,” iluk futfogoin lek andi nen, Allah nen anggasikhe hagat, warili'lagwi andi.

⁹ Mene re, hit enek he, ”At Allah nen fano hilingninabi'logo,” iluk abok yagaisilik loageluk, hinebe o mum oba were'ma, at ebe elalinat selek mondok welagarek oba wesuageluk hinayonggo fesikhesik, hirat againafuri asuageluk wenakhinafik, at ebe eisewerek kaindek logouwageluk menhinobagagik hinunggulenu at onggwarek unggulenu mene salogo hinobagagik.” Nonggwarek nagainafuri,” iluk hinebe wokhinafik, isikhe andi.

¹⁰ Hit attak he, Allah againafuri mene welagagip lek, meneat he, yogondak hinebe Allah againafuri eberogoat agebo. Nen, attak hiren he, ”Allah nen ninebe endawi werek,” iluk hinonggot welagagip meneat he, yogondak ”Ninebe Allah endawi nen wo'ninafikhemo welago,” iluk hinelu agebo.

”Hinobabut Allah amingmingengge logolik, yi'nogo hilingiti logoino,” iluk yagaisasikhe wene

¹¹ Nerugwi nagaila'lak. Hinebe nendawi e. Hit hinebe ap pogat afuni inawilokwe pugulogo laluk andoma logolik he, yi mene ti mene hinendawimo nen kagalogo lagai wagunem, hinendawinggen en nunggunem namolo anggikhi lagep mene andi re, selei mene nen inoatarek andi hak hinebe weagethinabigeluk, hinendawimo nen kagalogo lagai wagarek mene andi herakfisikhi logobagaigeluk yagahisikhi lagi andi o.

¹² It afuni endakwe mene Allah inonggot mene hinom logolik, iren he, hit weak hilingiti lagep mene halok, ”It weak hilingiri'lagwi o,” iluk hinabok weak ikhi logoligat he, hit hinobabut fano hilingitunem ineilenggen hisikhi logombik he, afuni nen at Allah ebe hobuk wagunem fogerasuageluk hit hinobabut higithogo hilingiti logoino o.

^13-15 At Allah nen he, hiren yi'nogo hilingiti logouwageluk endawimo anggasikhe. Afuni inendawinggen lek mene nen wene inonggot logolik ili'lagwi andi, inenggali a'luk inane lek asuageluk, hit hinobabut fano hilingiti logouwageluk anggasikhe andi nen he, ninoe Enupogot faget, afuni nen pemerintah mene kain logouwageluk menfisasukwa mene andi, inebe mondogat inawe a'ma kuluk inane hologo hilingiti logoino o. A'nogo hilingiti logolik, Kaisar pemerintah mene inoe kain andi inom, aren it gubernur lak afuni weak hilingitunem wene inoba figik, fano hilingitunem fogerinafik, hilingiti logouwageluk inayonggo fuluk lakfisa wagarek mene andi inom, inane hologo hilingiti logoino o.

¹⁶ A'nogo logolik, hiren he, ”Nit weak mene awe a'ma were'ma, Allah nen hele fikhalogo ninale'ma ninobagaikhemo welago,” iluk, weak ekhe hinagaisogo hilingiti logogup. We, hinobabut Allah amingmingengge logolik hilingisugun mene higithogoat hilingiti logoino o.

¹⁷ Afuni mondogat hinendawi nek logolik hinane agaukhogo yagaisikhi logoino o. A'nogo yagaisikhi logolik, hinerugwi hinagaila'lak Allah againafuri mene ekhe hinendawinggen hundik logoino o. Logolik he, Allah ebe hinailorogo welagik, nen, at Kaisar pemerintah mene inoe kain andi agaugweratik ikhi logoino o.

”Hiren Kristus obabut wanugun,” iluk yagaisasikhe wene

¹⁸ Hit ekhe hinogogwi inamingmingengge welagep mene andi, it inawe a'ma logolik inobabut fano lioksek mene faget enek hinailorogo inane hologo hilingiti logogun fuk. Athe, inobabut weak mene inomat hinailorogo inane hologo hilingiti logoino.

¹⁹ Hiren weak ekhe hilingiti'le'maat he, hinogogwi nen yi enggin ti enggin hilinghinafu kwelek, hinendawimo nen he, ”Allah endawimo amolo mene hilingisugun,” iluk futfuluk hinafe morogo logogun halok he, aren fanothinabigino.

²⁰ Meneat he, hiren weak hilingisugun oba, onggo yei hinoatu kwelek hinafe morogo logogun halok, fogethinabugun nogo? Lego. Hinobaburenat uguno. Meneat he fano hilingitunem, yi enggin ti enggin hilinghinafu kwelegat hinafe morogo logogun halok he, Allah obabut fano nen fanothinabigin aro.

²¹ At Kristus ebe hit faget yi enggin ti enggin hilik-hilik wa'lagaikhe andi nen, hit ogo re, at obabut waganogo yi enggin ti enggin hoagelugat Allah nen hinayonggo fesikhe andi.

²² Aren he, ”Weak ekhe hilingiti'legat. Nen, eranen ugunem, afuni ekhe inesanggo holhi'legaro.”

²³ Afuni nen inane asegen weak wokhugu kwelegat, aren onggo ane asegen wogisigi'legat. Iren yi enggin ti enggin hilingitu kwelegat, aren, ”An hobuk onggo ekhe hinoasigin,” iluk yagaisikhi lagaikhe legat. Athe, ”We, Allah nen wene inoba figik, kotik, higithogo igin sambul werego,” iluk, at enggiba fuluk, ane onggo igi'lek kamo ikhi lagaikhe.

²⁴ Nit ninobabut weak hilingiti lagagu mene andi, afuni wa'la'luk yi mene ti mene hilingitarek lek andi hak, nit weak mene herakfisaluk, nineluk logolik Allah amolo mene hilingiti logouwageluk, nit weak hilingiti lagagu mene korogo, at Kristus oba fakhasikhemo, ebe eba menogo fuluk watukwa andi. At ebe hit faget oumo agambut telerogo watukwa andiba, hit fanothinafikhe andi.

²⁵ Hit attak he, wam domba kwe nong asi lagarek andi hak, nong asi laga lagagip meneat he, yogondak at Allah nen, ap hinebe fethinarek logolik kwelakhinarek welagarek mene oba hinambotkwe wokhinarek hinobagai wagama welagebo.