1 PETRUS 1 - Allah Wene Fano Wene Hupla Inane

Hai warinafikhe wene

^1-2 Nerugwi nagaila'lak. An Petrus, Yesus Kristus nen na yonggo fesikhesik laknobagai wagaikhe mene a'nogo nen, wene yi lisu palogo hit nineisena Allah nen, hinebe attagat wenakhinafikhe mene, yogondak ya elama faget o yi awi ti awi pugulogo lagepsik, o propinsi Pontus inom, Galatia inom, Kapadokia inom, Asia inom, Bitinia inom, afuni inanggelekwe lombok welagepsek mene a'nogo hinoba lakfei wagio. Hinebe Allah nenat endawimo anggaluk wenakhinafikhesik, Yesus Kristus ane hologo hilingiti logouwageluk awe a'ma hinobagagik, amep oba hothinafik, igeluk he ”An nonggwarek nagainafuri asubagaigeluk wokhinafio,” iluk at Areagun en wokhinafikhe andi. Allah obabut fano a'nogo nen fano mene wokhisigik, hinendawinggen hobugalep hambugethinafik, hokhorogo ikhi logouwago.

Hiren he, ”Hobuk Allah nen fano hilingninabigin, iluk hinendawimo hinagaiyek hikhi logogun,” iluk yagaisasikhe wene

³ Ninoe Enupogot Yesus Kristus eisena Allah a'nogoat fogerati logouwok. At Allah ninebe endawi mondogen, Yesus Kristus wa'lagaikhemo nen eluget fesikhe andiba nit ninebe hobuk ninambotkwe ket ta'ninafikhe andi. Ninelugetninafikhemo logolik he, ninendawimo nen, ”Aren, hobuk fanothinabigin, isikhe andi lek asigin lek,” iluk ninendawimo ninagaiyek hikhi lago.

⁴ A'nogo fanotninafunem eise asugun mene andi, fili agi'lek, weak agi'lek, legagi'lek etok mondok logogin mene pogoroba ekhe hit hinobagaikhemo werego.

⁵ Hinendawinggen at Allah oba eberogoat himbirik welagep andi nen, at omameba fethinarek logombik he, hobuk hinebe fanothinabigin mene wurep oba weinamet fagain andi.

⁶ Andi nenat, yogondak ya, Allah nen hinobabut paligeluk ugunem, hinoba yi enggin ti enggin hikhi logolik, elama faget hinendawimo weak ari'logo meneat he, hinendawimo hinagaiyek hikhi logoino o.

⁷ Emas onggo hokho palharek mene andi, ’Fano a? Weaga,’ iluk endu oba obabut palharek andi hak, Allah nen he, ”It inendawinggen an noba eberogoat himbirik werega? Lega,” iluk, enegat asuageluk anggugunem hinoba yi enggin ti enggin hikhi lagep andi. Emas andi re, we tulemat lek asigin meneat he, ebe esin he, hinendawinggen Allah oba eberogoat himbirik welagep andi aro. Hit hinendawinggen at oba himbirik logogun halok he, aren hinobabut palhi logombik Yesus Kristus weinamhogo lakfei wesigin andi sambul, fogethinafik, agaugwethinafik, esinethinafik, igino.

⁸ Hiren attagat, at ebe hineilenggen higi'lek meneat he, ebe hinendawi welagep andi. A'nogo logolik, yogondak ya hineilenggen higi'lek meneat he, hinendawimo nen, ”Hobuk fano mondok hilingninabigin,” iluk hinaneba ninggi'nogo pilingisogo u heat logolik, hinendawimo hinagaiyek hokhorogo hikhi lagep andi.

⁹ Hinendawimo nen he, ”O wurep oba fanotninabuak,” iluk hinendawinggen at oba himbirik logolik, yogondak eisewerek aga lagebaro.

¹⁰ Ninebe fanotninabigin wene andi re, attak it ap Allah ane yagaisikhi lagaukwa mene omanogo nen wene andi fagerat heratik, heinok wanhik, ikhi lagaukwa. A'nogo herati logolik, Allah obabut fano a'nogo nen, ”Fano hilinginafi logogin,” iluk ebe hit fano hilinghinabi'logo andi fagerat oan werek kwelek yagaisikhi lagaukwa andi.

¹¹ A'nogo yagaisikhi lagaukwa andi, at Kristus Areagun inendawimo logolik yagaisikhi logolik he, mel yagaisasikhe: ”Kristus enggin hilik-hilik wa'lasigin. Wa'lasimbigen, hobuk eluk agunem fogerati logogun,” iluk yagaisasikhemo iren ikhi logoligat he, ”Ninggi'nogo hilinglasigin. Mera nen hilinglasigin,” iluk heinok furogo wanhi lagaukwa.

¹² Heinok wanhunem, at Allah nen he, ”Wene andi re, hit hinonggwarek faget he, lego. It hobuk oan mene faget hilingiti lagebo,” iluk hit fagerat isikhe. A'nogo yagaisasikhesik welagaikhesigen, hobuk Allah Areagun pogoroba nen pelakfei wagaikhemo, it ap fano wene Yesus Kristus hilingitikhe wene a'nogo yagahisoageluk hinanggele'ma logolik yogondak fakhogo yagahisili'lagwi ebe andi faget ikhi lagaukwa andi. Wene andi, it malaikat Allah nen yonggo pelakfisa wagarek mene omanogo nen he, ”Eige, nit wene andi furogo ninelu a'lo e,” iluk anggagarek.

Allah faget tegelek mondok logouwageluk komorinafikhe wene

¹³ Andi nen wene andi futfuluk he, kwe fungusek louwogeluk inobakhe hele ninghogo homatarek andi hak, hinobabut hebelogo, hinendawinggen wenggelogo logoino. A'nogo logolik hinendawimo nen he, ”Allah nen Yesus Kristus ebe weinamhogo lakfei wagunem fano mene wo'nisa wesigino,” iluk hinendawinggen at oba lakfuluk oba eberek mondok logoino o.

¹⁴ Hit attagat he, wene andi hinonggot logolik, yi mene ti mene hinamolo nen hinendawinggen en nunggunem hilingiti lagagip andi, hobuk he, hinobabut andi mene wanhup. Yenggerugwi nen ineisenalak inane hologo logolik higithogo hilingitarek andi hak, hit Allah ane hinesanggo hologo higithogo hilingiti logoino.

^15-16 At Allah nen he, ”An nobabut weak hilingiti'lek tegelek mondok welagirek andi nen, hit ogo re, an faget hinobabut tegelek mondok logoino o,” iluk isikhemo lisu palogo fesukwa andi nen, hiren yi mene ti mene hilingiti logolik, hinobabut at Allah hinayonggo fesikhe mene obabut hanggeat tegelek mondok logolik hilingiti logoino o.

¹⁷ At Allah obabut he, afuni inagap oba nek eilenggen isaluk, ekhe elokhoma fisigik, ekhe ambotma fisigik, ikherek lego. We, inobabut hilingitarek lombok higithogoat wene inoba figik, kotik, ikherek andi nen, hiren he, ”Allah nineisena,” iluk ayonggo fikhi logolik, kweangma yoma elama faget hinebe ap pok hak logolik, at ebe hinailorogo hilingiti logoino o.

¹⁸ Attak he, hinambu hinombalak hilingiti lagaukwa andi hak, it inobabut waganogo legasigin mene faget tulemat alemarogo hilingiti lagagip andi nen, hinenggi hele warek hak were'ma, Allah nen hinebe hinonggo palogo telhinafikhe andi hineluaro. Onggo andi re, legasigin mene emas oba, perak oba hinonggo palhinafikhe fuk.

¹⁹ Athe, onggo hokho meneba palogo telhinafikheo. Wam domba eak weak meneba fuk, we, domba eak mondok fano mene Allah faget amep wulagaisogo waresu hak, at Kristus amep wulagaisogo wa'lagaikhe andiba, hinonggo palogo telhinafikhe andi.

²⁰ Kristus, Allah nen kweang pogot oan elalhi'lek logolik, endawimo nen anggaluk ayonggo fesikhesik welagaikhesigen, ebe yogondak o wurep oba hit faget weinamhogo lakfei wagaikhemo hinebe telhinafikhe andi.

²¹ Ebe wa'lagaikhemo Allah nen eluget fembik fogerati logouwageluk menfesikhemo, hinendawinggen Allahba eberogoat himbiret fuluk, ”Hobuk aren fanotninabigin,” iluk oba eberek welagep andi.

²² Ebe wene andi hinesanggo holhi logolik, hinendawimo nen weak mene horogo lakfisaluk, hinerugwi hinagaila'lak Allah againafuri mene eberogoat hinendawirogo hilingiti lagep andi, hinom hundik mondok logolik nendawi-hendawirogo hilingiti logoino o.

²³ Allah nen hobuk takhinafikhe andi, afuni wa'lagaikharek mene nen taginafarek andi hak takhinafikhe fuk. We, Allah eluk mondok logolik ane lek agi'lek logogin meneba takhinafikhe o.

²⁴ Andi nen, Allah ane mel iluk lisu palek werek hak: ”Afuni mondogat inebe re, e engga hangge aro. Fano iluk fogerinafarek andi, e enggen fogeratarek andi hak fogerinafarek. Engga puk agik, enggen lologo pigik, ikherek andi.

²⁵ Mene re, ninoe Enupogot ane andi etok mondok logogin o,” iluk isikhemo lisu palogo fesukwa andi. At ane andi ebe re, niren Fano Wene yagahisogorek mene andi aro.