1 KORINTUS 9 - Allah Wene Fano Wene Hupla Inane

Allah nen afuni inayonggo fesikhe mene lombok hilingiti logogun wene

¹ An nale'ma welagirek lek nogo? At Allah nen nayonggo fuluk laknobagai wagaikhe lek nogo? Ninoe Enupogot Yesus ebe an neilenggen higi'lek nogo? Ninoe Enupogot nemberek hundik logolik hilingiti mene, hinebe welagep andi lek nogo?

² It afuni ekhe nen an faget ikhi logolik he: ”At Paulus Kristus nen ayonggo figi'lego,” iluk ugu halok he, hit he, a'nogo ugun lek. An nayonggo fuluk laknobagai wagaikhemo wagagi iluk he, hit hinebe ninoe Enupogot hinom hundik welagep andiba enegat futnobagagun o.

³ Afuni nen nabok weak ugu kwelek, an nen yi'nogo yagaisikhi lagi:

⁴ ”An Allah eabu hilingitirek andi faget, nenggi onggo sumburu wo'netik, i wo'netik, ugunem, helagain lek nogo? Helagain aro.

⁵ Nen, it ap ekhe Allah nen inayonggo fuluk lakfisa wagaikhe mene inom, ninoe Enupogot agoromi ombo'ne mene inom, at Petrus inom, inagagwi woginarek nikho andi hak, an enek he, nagwe Allah a'logo mene waluk nikhi logogin lek nogo?

⁶ I a, athe, it andi yabu wanhi'lek weat werek kwelek, an Barnabas nemberek ninalegat enek yi mene ti mene ninenggiba nen set kwil-kwalhogo hilingi'lugen herakfisogoin anggegep?

⁷ Ap tentara inogogwi kaindegen inagoromi weim yabuageluk inayonggo fugunem, it inonggwaregen inenggi onggo heragaisogo ekhe yafarek nogo? Lego. Nen, it ekhe nen anggur awi yakfuluk he, enggen itunem ekhe inonggwarek nenggarek lek nogo? I a, athe, it ekhe inanggo domba hokhorogoat fisogo logolik he, eilak amusu ekhe inonggwarek nenggarek lek nogo? Nenggaregaro,” iluk yagaisikhi lagi.

⁸ An wene igi andi re, nit afuni nen hilingitorek mene oba lirogo igi meneat he, ebe Allah nen komotninafikhe wene a'nogoba andi emberek higit igi'lek nogo? Isikhemo nenat igi o.

⁹ Wene Allah nen komotninafikhe mene a'nogoba, at Musa nen mel yagaisasikhe: ”Afuni nen wam sapi eisogen gandum agap lilibuk warogo enggen ibiluageluk fuluk he, enggen ekhe at nanogo iluk, ambe hele warogo homasigin lego. Ekhe noageluk herakfikhi logoino,” iluk yagaisasikhe andi, at Allah nen wam sapi andi endawinggen hundigen isikhe nogo? Lego.

¹⁰ Nit afuni nen yabu wanhik, enggen palhik, ikhi logolik he: ”An ekhe nagain o,” iluk ninendawimo ninagaiyek hikhi logolik yabu wanhik, enggen palhik, ogorek andi nen, wene andi nit fagerat isikhemo lisu palek werego.

¹¹ Awi yatarek hak he, wene hinendawimo awi yakfesugu andi. Nen, ebe tasu hak he, hiren yi mene ti mene kweangma mene wo'nisamo re, andi hokho nogo? Lego. Higithogo wo'nisagain mene aro.

¹² Hiren, it ekhe mene a'nogo wogisogoin higirat halok he, nit ebe eisewerek mene ekhe wo'nisogoin lek nogo? ”Wo'nisogoin higiraro,” iluk yagahisikhi lagi. A'nogo meneat he, nit ekhe wo'nisoageluk ikhi lago lek. Fano wene Kristus hilingitikhe wene andi, niren yagaisilik nugunem anggwe palinogo iluk he, yi mene ti mene ekhe wo'nisogoin iluk igi'lek ninafe morogo herakfisikhi lago.

¹³ It ap Allah awi wurik eisewerek logolik yabu andoma hilingiti logolik, inamburu re, Allah aiba mene nenggarek iluk he, hinonggot nogo? Nen, Allah anggo ware'luk endu noletarek oba noleti logolik a'nogoat fena kurogo it nenggarek iluk he, hinonggot nogo?

¹⁴ Andi hagat he, at ninoe Enupogoren komotninafi logolik he: ”It afuni nen fano wene yagaisilik lagunem he, it ekhe nen fano wene andi alisikhogo inamburu melagisogoin aro,” iluk isikhe andi.

¹⁵ A'nogo isikhe meneat he, an he, fano wene alisikhogo a'nogo wanhi'lek welagirek. An faget a'nogo wo'nesuageluk wene yi lisu palogo lakfei wagi fuk. An a'nogo wo'nesuageluk hilingiti'lek welagi iluk he, fogerakhikhi lagi mene yi re, at ekhe nen nane sebelogo fagain he, nabit. An nebe wa'lasumo re, fano.

¹⁶ Fano wene yagaisilik nigirek andi re, yagaisagain meneat yagaisilik nigirek andi nen he, fogerakhagain mondok lego. Yagaisigi'lek kamo umo re, eige. Nonggwarek nebe weaget lagi hanogo o.

¹⁷ An a'nogo yagaisilik nikhi lagi andi, an nendawimo nen kagalogo yagaisilik nikhi logoilema re, nenggi onggo wonetunem, helikhi logoile o. Mene re, an nendawimo nen kagale'lek were'ma, Allah nen nayonggo fuluk eisewerek nobagaikhe andi nen onggo lek yagaisilik nikhi lagi andi.

¹⁸ Halok he, an nenggi onggo nena mene wo'nesugun. Andi re, ebe yi. Onggo wo'nesu hak, fano wene andi onggo lek weat yagaisilik nikhi logolik nendawimo fano welagi andi. A'nogo yagaisugunem he, onggo wo'nesu higit meneat he, a'nogo ekhe wo'netunem heligi'lek welagirek andi fano.

¹⁹ An he, afuni inamingmingengge welagi fuk. Nale'ma welagi meneat he, afuni inebe hokhorogoat Kristus faget woginabigeluk he, afuni mondogat inamingmingengge a'luk nigirego.

²⁰ Afuni Yahudi mene Kristus faget woginabigeluk he, an nobabut Yahudi mene inobabut waganogo hilingiti lagi. Nen, afuni wene Allah nen komotninafikhe wene at Musa nen yagaisasikhe wene a'nogo, an hologo logogin lek meneat he, it ekhe hologo welagaikharek mene Kristus faget woginabigeluk he, an noabaut wene andi nesanggo hologo welagirek mene hangge hilingiti lagi o.

²¹ Nen, it ekhe wene Allah nen komotninafikhe wene at Musa nen yagaisasikhe wene andi, inesanggo holharek lek mene ekhe Kristus faget woginabigeluk he, an noabaut wene andi holhi'lek hangge welagi aro. Andi re, an wene Kristus nen komotninafikhe wene andi hologo mondok logolik he, wene Allah nen komotninafikhe wene andi an holhi'lek welagirek fuk. Hologo welagiregaro.

²² It afuni inendawinggen oan mene Kristus faget woginabigeluk he, an nobabut he, nendawinggen oan mene hangge welagi. It afuni mondogat inobabut hilingitarek lombok hilingiti lagi andi re, it mene ekhe telinabigeluk a'nogo hilingiti lagi o.

²³ An it afuni mondogat inobabut a'nogo waganogo hilingiti lagi andi re, it ninom fano mene eisewerek asuageluk fano wene andi fagerat hilingiti lagi o.

²⁴ Sa awewerek-sa awewerek louwogeluk he, inebe logoin mene andi, inebe mondogat lagaikharek meneat he, misik agun tak lagunem onggo fano mene wogotarek iluk hinonggot nogo? Andi hagat, onggo fano mene wokhisoageluk he, fungusek hinomamerogo laga logoino o.

²⁵ Inebe lombok walhogoin iluk he fik foukhogo hilingfuluk funget hagarek a'nogo hilingitarek andi re, we onggo elama lek asigin mene faget helogoin iluk hilingitarek meneat he, nirenek he onggo mahkota weak asigin lek mene hela logoin iluk tegelhi lago o.

²⁶ Andi nenat, an laga lagi andi re, ka lagain he, hesanggeat laga lagi fuk. Nelokhe tukum laga lagi o. Andi hagat he, afuni inenggi yinggilogo at ekhe nen ekhe watik, ekhe nen ekhe watik, ikhi logolik alemarogo ekhema inoatarek lek andi hak, an we hesanggeat hilingiti lagi fuk.

²⁷ It afuni ekhe fano asuageluk fano wene yagaisilik nikhi lagi meneat he, nonggwarek heraknobagaumo nongagi hanogoluk, nonggwaregen nebe wara hak, nendawinggen ninghogo sebeligik, afuni inawe a'ma logolik inane hologo welagaikharek hak, an nebe nane awe a'ma logoigeluk komorigik, ikhi lagi o.