1 KORINTUS 8 - Allah Wene Fano Wene Hupla Inane

Tugwi kembu anggo waretarek wene

¹ Hiren he, ”Tugwi kembu anggo waretarek andi re, wene ero yi'nogo iluk ninelu nek,” ikhi lagep andi re, nit futfogo. Mene re, wene a'nogo inelu logolik he, inonggwaregen fogerakhagarek meneat he, afuni inebe inendawi logolik hilingitarek andi nek he, inendawinggen wurigerinafarek andi.

² At ekhe endawimo nen anggikhi logolik he: ”An wene arat nelu,” iluk anggili'logo meneat he, at furogo elu asigin meneat he, oan onggot logolik ili'logo o.

³ A'nogo meneat he, at ekhe nen, Allah ebe endawinggen hundik halok he, Allah nen at andi ebe elu o.

⁴ Tugwi kembu anggo waretarek andi re, tugwi kembu kweangma mene yoma ebe lek meneat, iluk ninelu. Nineisena Allah ebe misigat. Ekhe lego.

⁵ It afuni yoma nen ikhi logolik he, ”Nit he, nineisena oba himbirik welagorek mene ninawesa ebe yi aro,” iluk he, pogoroba mene faget inom, kweangma mene faget inom, ili'lagwi andi. A'nogo agarek andi, inawesa mene hokhorogoat were'ma re, enu werek he, hokhorogoat werego.

⁶ A'nogo meneat he, nit nineisena Allah ebe misigat. Ekhe lek. Yi mene ti mene mondogat aren elalhikhemo re, ninebe at fagerat welago. Andi nen he, ninoe Enupogot Yesus Kristus ebe misigaro. Yi mene ti mene mondogat Allah nen elalhikhe andi, ebe at Yesus nen elalhikhesik, ninebe arenat telninafikhemo nineluk welago.

⁷ Meneat he, wene andi afuni mondogat inelu fuk. It ekhe attagat he, inendawinggen tugwi kembu oba himbirik logolik fogerati lagaukwa andi nen he, hobuk wam tugwi kembu anggo warek mene kurik ninggi logolik, oba eberi'lagwi. Inendawinggen oan logolik nunggunem he, inendawimo weak agarek andi.

⁸ Yi mene ti mene nenggarek mene andi nen Allah oba wo'ninarek lagain lego. Nit ninggi'lek kamo ugun halok he, nongasugun lek. Nen, nogoin halok he, ekhe saburogoin legat.

⁹ Hit hesangge nogoinat meneat he, nunggunem en, it afuni ekhe inendawinggen oan mene weak asinogo iluk he, hinebe hebelogo logoino.

¹⁰ Hat ekhe nen he, wene andi helu logolik o wam tugwi kembu anggo waretarek oba kuluk hebe hu'la'luk nagain halok he, at ekhe endawinggen oan mene nen eilenggen healuk endawimo nen he: ”An ekhe nagain aro,” iluk endawimo kagalasigin lek nogo? Kagala'luk nagain aro.

¹¹ Haren: ”An wene nelu o,” iluk a'nogo hilingisigin andiba, hagailak ekhe endawinggen oan mene faget Kristus wa'lagaikhe meneat he, haren weagetfagain andi.

¹² Hinerugwi hinagaila'lak inendawinggen oan mene ineil salogo weagerinafik, inendawimo kagalhik, ikhi lagep andi re, Kristus ebeat eil salogo hilingiti lagebo.

¹³ Halok he, nenggarek mene andiba nen an nagailak ebe weagetfeinogo iluk at faget he, an wam tugwi kembu anggo warek mene kurik ninggi'lek mondok herakfikhi logogin o.