1 KORINTUS 7 - Allah Wene Fano Wene Hupla Inane

Hemi ap waganek welagaikharek wene

¹ Hiren wene lisu palogo noba lakfei wagep a'nogo, onggo yagahisago. Aben he, hemi wanhi'lek alage weat logogun fano.

² Meneat he, pailak hilingiti logoinogo iluk he, ap inagagwi lombok waganek welagik, hemi inaguni lombok waganek welagik, ugun o.

³ Inaguni nen he, inagagwi lombok, nen, inagagwi nen he, inaguni lombok, inom nogo ikhi logouwago.

⁴ Nen, hemi inebe re, inonggwarek eisewerek fuk. Inaguniat eisewerego. Nen, ap inebe a'nogoat he, inonggwarek eisewerek fuk. Inagagwiat eisewerego.

⁵ Halok he, hemi ap hinom nogo ikhi logogun. Heksek logogubo. Samban uogeluk halok he, yi'nogo ugun: ”Elama faget weat logouwok,” iluk weneane hinom imbigen, samban ikhi logombik he, hobuk hinom lambukhogo logoino. Hinendawinggen sebelugun elo'lek andi nen, Iblis nen hinendawimo kagalinogo iluk he, hinom lambukhogo logogun andi.

⁶ Wene yagahisigi andi re, nane ninghogo yagahisigi fuk. We, komothinafi o.

⁷ Afuni mondogat he, an hemi lek weat welagirek hak logoumo re, fano, iluk anggigirek meneat he, at Allah nen he, ninobabut lombok, at ekhe obabut hunogoat, at ekhe obabut hunogoat, wo'nisasikhe andi nenat he, a'nogo elo'lego.

⁸ Hit ap ekhe, hinagagwi lek mene inom, hit helimenggerugwi mene inom, hemi sogwe mene inom, an welagirek hagat logoumo re, fano, iluk yagahisigi andi.

⁹ Hinendawinggen sebelu elo'lek aga halok he, hinagagwi lombok, hinaguni lombok, woginafi logoino. Hinoba aigage lagagunem hesanggeat fakfisamo re, weago. Hinaguni lombok, hinagagwi lombok, waganek logoumo re, fano.

¹⁰ Nen, hit ap ekhe, hinagagwi werek mene inom, hit hemi ekhe hinaguni werek mene inom, an nen komothinabigin o. Mene re, an nen fuk. Ninoe Enupogoren komothinabigin o. Hit hemi hinaguni herakfisaluk he, taukhogo wulifubo.

¹¹ Hat he ekhe hagun herakfisaluk wulifen halok he, ap ekhe wanhi'lek weat logoino. Weat logogin elo'lek aga halok he, hagun attak mene andiat wanino. Nen, hit ap ogo re, hinagagwi herakfisagubaro.

¹² Hit ekhe faget, wene ninoe Enupogoren igi'lek mene, an nenat yagahisago. Hat ap Allah amlogo mene nen, hagwe endawinggen Kristus oba himbiret figi'lek mene waganek welagen mene, aren he, ”Nagun nemberek lambukhogo logogun,” iluk anggikherek halok he, fano. Haren, hagwe andi hebisagain mondok lego.

¹³ Nen, hat he Allah a'logo mene nen, hagun endawinggen Kristus oba himbiret figi'lek mene waganek welagen mene, at ap andi nen he, ”Nagwe nemberek lambukhogo logogun,” iluk anggikherek halok he, hagun andi herakfisaluk taukhogo wulibigin mondok lego.

¹⁴ At he Allah a'logo mene nen, agun endawinggen Kristus oba himbiret figi'lek mene, waganek emberek fano lambukhogo welagaikharek andiba, agwe nen agun ebe Allah faget fisili'logo. Nen, andi hak at ap Allah amlogo mene nen, agwe endawinggen Kristus oba himbiret figi'lek mene waganek emberek fano lambukhogo welagaikharek andiba, agun en agwe ebe Allah faget fisili'logoat. A'nogo inebe Allah faget fisigi'lek logoilepma re, hinagainafuri inebe Allah meneat he, endakwe mene logoilebo.

¹⁵ At ap endawinggen Kristus oba himbiret figi'lek mene andi agwe herakfisikhe halok he, herakfisoagaro. Nen, at he endawinggen Kristus oba himbiret figi'lek mene andi agun herakfisaluk taukhogo wulife halok he, wulibuagaro. Allah nen he, ninendawinggen hambukhogo fano logouwageluk ninayonggo fesikhe andi nen he, a'nogo hilingisugun halok, wene hinoba fagain lego.

¹⁶ Hat he yi, hendawimo nen he, ”Hobuk nagun teligin elo'lek asigin,” iluk anggikhi lagen a? Ninggi'nogo nen helu. Hat ap yi, hendawimo nen he, ”Hobuk nagwe teligin elo'lek asigin,” iluk anggikhi lagen a? Ninggi'nogo nen helu.

”Allah nen ninebe lombok ninayonggo fesikhe higithogo hilingiti logogun,” iluk yagaisasikhe wene

¹⁷ Hit he, Allah nen hinebe lombok hinayonggo fugunem he, ninoe Enupogoren he: ”Hat ekhe yi'nogo logoino. Nen, hat ekhe ti'nogo logoino,” iluk yagahisasikhe hagat logoino. A'nogo logouwageluk, an nen Allah againafuri o yi awi ti awi andogotarek mene mondogat komorinafirego.

¹⁸ At ekhe agap enggalimo mene arat palek were'ma, Allah nen ayonggo fesikhesi'mo hobuk agap pale'lek mene hak asigeluk ekhe hilingisigin elo'lego. Nen, at ekhe re, agap enggalimo mene pale'lek were'ma Allah nen ayonggo fesikheba nen, hobuk agap a'nogo paligin legaro.

¹⁹ Inagap inenggalimo mene a'nogo palek logogun inom, pale'lek logogun inom, andi esin fuk. Lego. Ebe esin he, Allah ane hologo hilingiti logogun andi aro.

²⁰ Afuni inebe lombok Allah nen inayonggo fugunem welagaukwa hagat logouwago.

²¹ Hat ekhe, afuni inamingmingengge were'ma Allah nen hayonggo fesikhe halok he, ”An yi'nogo welagi mene,” iluk, andi faget menenei ebetun. Hobuk he, hale'ma hobagauwageluk halok he, ”Nabit,” ugun. ”Andi fano,” iluk hale'maat a'no.

²² At ekhe afuni inamingmingengge were'ma re, ninoe Enupogoren ayonggo fesikhemo emberek hundik logolik he, at agot ale'maat agasik werek. Nen, at ekhe re, ale'ma were'ma ayonggo fesikhemo, ninoe Enupogot amingmingenggeat agasik werego.

²³ Hit hinebe Allah nen onggo mondok katokhogo palogo wokhinafikhemo andi nen he, afuni inamingmingengge agubo.

²⁴ Halok he, nerugwi nagaila'lak. Hit hinebe lombok Allah nen hinayonggo fugunem welagagip hagat, Allah hinom hundik logolik a'nogoat logoino o.

Ap inagagwi lek mene inom, hemi inaguni lek mene inom, faget isikhe wene

²⁵ Wene helime yenggerugwi silerik mene faget he, ”Yi'nogo hilingiti logoino,” iluk ninoe Enupogoren komotninafi'lek meneat he, wene an nendawimo anggikhi lagi mene yi yagahisak. Nane yagahisagain yi re, hit hinendawimo nen he, ”Allah nen Paulus ebe endawi nen wanhikhemo obabut humbun mene nen yaganisikhe andi eberogoat,” iluk hinendawimo anggano o.

²⁶ Nit o yogondak weak welago yaba logolik he, ninebe lombok welago hak logogun o, iluk anggikhi lagi.

²⁷ Hit ap ekhe hinagagwi werek mene halok, lologo herakfisuogeluk hilingitubo. Nen, hit ekhe hinagagwi lek mene halok, hemi woginabuogeluk heraginafubo.

²⁸ Mene re, hit aben hinagagwi helegep halok he, andi weak hilingitep iluk ugun lego. Nen, hit helime yenggerugwi silerik mene nen hinaguni helegep halok he, andi weak hilingitep ugun legaro. Meneat he, woginabimbik, yi enggin ti enggin hogoin andi nen he, a'nogo hegep hanogoluk igi o.

²⁹ Nerugwi nagaila'lak. Yogondak he, o wurep oba asi lagosik welago. O yaba logolik he, ap inagagwi waganek mene andi, waganek lek mene hak logouwak, iluk anggigirigen yagahisigi o.

³⁰ Afuni ekhe le ari'lagwi mene halok he, le ari'lagwi lek mene hak logouwak. Nen, it ekhe inendawimo inagaiyek hili'lagwi mene halok he, inagaiyek hili'lagwi lek mene hak logouwak. Nen, it ekhe yi mene ti mene onggo palogo helili'lagwi mene andi, eise agi'lek mene hak logouwak.

³¹ Nen, it ekhe kweangma yi mene ti mene helagarek mene andi, heligi'lek mene hak logouwak. A'nogo igi andi re, yi mene ti mene kweangma welagarek mene mondogat arat lek ari'logo andi nen igi o.

³² Hit he, hemi faget, ap faget, hinendawimo menenei ebeti'lek logobagaigen iluk yagahisigi o. A'nogo igi andi re, ap inagagwi lek mene nen he, ninoe Enupogot endawimo fano asuageluk, at faget esinet fuluk inendawimo ebetarego.

³³ A'nogo meneat he, ap inagagwi waganek mene andi re, inagagwi inendawimo fano asuageluk, yi mene ti mene kweangma mene esinet fuluk inendawimo ebetarego.

³⁴ A'nogo ebeti logolik he, inendawinggen pire agarek andi. Helime yenggerugwi inaguni lek silerik mene andi re, inebe inom, inendawinggen inom, ninoe Enupogot faget logouwogeluk he, at faget esinet fuluk inendawimo ebetarek andi. Mene re, it hemi inaguni werek mene andi re, inaguni inendawimo fano asuageluk, it faget yi mene ti mene kweangma mene esinet fuluk inendawimo ebetarek andi.

³⁵ Wene a'nogo yagahisigi andi re, wam kombi eiselogo fagarek hak, ”Yi mene hilingisugun lek. Ti mene hilingisugun lek,” iluk wene palhi fuk. We, hit fano asuageluk yagahisigi o. Halok, hit he, hinendawinggen we mene oba ebeti'legat, ninoe Enupogot faget higithogo fanorogo hilingitu mondok logobagaigeluk igi.

³⁶ Ap ekhe nen helenggerek silerik mene emberek wenago logolik, endawimo nen he: ”An yi'nogo weak welagi. He andi ebe wanigin o,” iluk oba aigage lagaikhe halok he, at endawimo a'nogo anggikhesi'mo re, he ebe wanuago o. A'nogo wanigin andi weak fuk. Fano o.

³⁷ Mene re, at ekhe, afuni ekhe nen endawimo kagalhunem he, onggwarek endawinggen wurigat logolik, endawinggen onggwaregen sebelogo nen: ”Lego. An nagwe nemberek wenago mene andi, a'nogoat logouwak,” iluk endawimo anggikhe halok he, andi fano mondok.

³⁸ Aben helenggerek silerik mene emberek wenago mene wanhe halok he, andi fano meneat he, wanhi'lek kamo ikhe halok he, andi fano mondogo.

³⁹ It hemi re, inaguni inebe ineluk werek kwelek, ap hunogo mene ekhe woginabugun lego. We, inaguni inebe wa'lagu halogat, inendawimo inamolo anggili'lagwi mene woginabugun. Menere hesanggeat woginabugun lek. We, ninoe Enupogot inom hundik mene halok woginabugun o.

⁴⁰ A'nogo woginabugun meneat he, wanhi'lek weat logoumo re, inendawimo fano logogun anggikhi lagi o. A'nogo anggikhi lagi andi re, Allah Areagun nendawimo logolik anggikhi lagi.