1 KORINTUS 6 - Allah Wene Fano Wene Hupla Inane

”Allah againafuri mene ekhe wene inoba werek halok, afuni Allah ane inonggot mene inayonggo fogoin lek,” iluk yagaisasikhe wene

¹ Hit Allah againafuri mene, hit-hit hat ekhe nen at ekhe wene oba fegen halok he, Allah againafuri mene nen pilingetfuluk wene andi oba figik, kotik, uageluk inayonggo figi'lek, it afuni weak hilingiri'lagwi mene inayonggo fikhi lagep andi nenahalok, hinenggali lega?

² Hobuk Allah againafuri nen afuni kweangma mene yoma wene inoba figik, kotik, ugun andi hinonggot nogo? A'nogo ugun halok, wene endebat mene andi re, hiren pilingetfulugen wene inoba figik, kotik, ugun lek nogo?

³ Nirenat, it malaikat Allah nen yonggo pelakfisa wagarek mene omanogo nen, wene inoba figik, kotik, ugun andi hinonggot nogo? Halok he, nit kweangma yoma logolik, afuni wene yi wene ti wene faget inoba agunem niren pilingetfuluk wene inoba figik, kotik, ugun lek nogo? ugun aro.

⁴ Wene a'nogo mene hinoba aga halok he, pilingetfuluk wene hinoba figik, kotik, uageluk sani inayonggo fikhi lagep. Nit Allah againafuri nen he, ”It andi inobabut weak,” iluk ogorek mene andi inayonggo fikhi lageba?

⁵ Hinenggali wati lagi o. Hit hinerugwi hinagaila'lak hinom, hat ekhe nen at ekhe wene oba fegen halok he, ap Allah amlogo endawimo mondok kagalek logolik wene pilingisogo legetfagain mene misigagun ekhe lek nogo? Werek anggigi.

⁶ Meneat he, hat ekhe nen hagailak ekhe wene oba fuluk he, afuni inendawinggen Allahba himbiret figi'lek mene nen pilingisogo wene oba figik, kotik, uagen iluk inayonggo fikhi lagen andi.

⁷ Hit-hit hinerugwi hinagaila'lak hinom meneat he, hinom wene-wene mondok welagep andi nen lebeleget fakhikhi lagebo. Hit he, weak hilinghinafu kwelek hinafe morogo logoumo weaga? Weagethinafu kwelek herakfisaluk logoumo re, fano o.

⁸ Hit he, hinerugwi hinagaila'lak hinom meneat he, weagerinafik, alemarinafik, ikhi lagep andi.

⁹ Afuni weak hilingiri'lagwi mene Allah awe a'ma fisikhere'ma andi eisewerek asugun lego, iluk he, hinonggot nogo? Hinonggwaregen lalagubo. Pailak fakfisagarek mene inom, tugwi kembu oba himbirik logolik fogeratarek mene inom, ap inagagwi mene pailak fakfisagarek mene inom, aben hemi fakfisagarek hak it ap-ap fakfisagarek mene inom,

¹⁰ yogot wanharek mene inom, inami'mik weak hilingitarek mene inom, amusu lugulugwi paluogeluk nenggarek mene a'nogo nunggu mondok welagaikharek mene inom, inane puk weak wenagisagarek mene inom, inenggi abisak wanharek mene inom, it afuni a'nogo hilingitarek mene andi mondogat Allah awe a'ma fisikhere'ma andi eisewerek asugun mondok lego.

¹¹ Attak hit ekhe a'nogo hilingiti lagagip meneat he, yogondak he, Allah nen hinendawimo fano sobalogo hinobagaikhesik, hinebe at onggwarek faget fakhasikhemo welagebo. Wene hinoba welagaikhe mene andi, nineisena Allah Areagun nen ninoe Enupogot Yesus Kristus enuba, korogo wokhasikhesik Allah hinom hinambotkwe hunogo hinobagaikhemo welagebo.

”Hinebe Allah faget fisaluk fano hilingiti logoin o,” iluk yagaisasikhe wene

¹² Hit mene ekhe nen ikhi logolik he, ”An yi mene ti mene hesanggeat hilingisigin enek,” iluk ili'logo meneat he, an nendawimo nen he, yi mene ti mene mondogat andi nen fanorinabigin enek fuk. Yi mene ti mene andi omame a'luk, andi mene nen an nebe awe a'ma nobagagin he, nabiro.

¹³ It ekhe nen yi'nogo agaregat: ”Nenggarek mene andi ninalabut faget. Nen, ninalabut andi nenggarek mene faget,” iluk agarek. A'nogo agarek meneat he, pireat he, at Allah nen hobuk legetfagain werego. Allah nen, ninebe yi re, pailak fakfisikhi logouwageluk weinamet ninafikhe fuk. Athe, ninoe Enupogot fagerat weinamet ninafikhe andi. Ninebe yi eisewerek he, ninoe Enupogot werego.

¹⁴ Allah nen he, ninoe Enupogot wa'lagaikhemo nen eluget fesikhe hak, at omameba, nit ninelugetninabiginaro.

¹⁵ Nit ninebe yi re, Kristus enggi eisok hangge welago, iluk hinonggot nogo? Halok, ninebe Kristus enggi eisok welago andi mene waganogo, hemi inobabut yanani mene andi inom hunisugun nogo? Mondok lego.

¹⁶ It ap hemi inobabut yanani mene andi inom huni'luk he, inebe misigat agaikharek, iluk he, hinonggot nogo? Allah nen ikhi logolik, ”It inebe pire meneat he, hobuk misigat hilingla'luk logogun o,” iluk isikhemo lisu palogo fesukwama werek andi.

¹⁷ Nit ninebe faget a'nogo hilinglagorek meneat he, ninoe Enupogot ninom huni'luk he, at ninom ninendawinggen misigat agorek andi.

¹⁸ Pailak fakfisagarek andi mene fakfisikhi logoinogo iluk, heise pugulhi logoino o. Yi weak ti weak hilingitarek andi re, inebe endakwe yiat hilingitarek. Meneat he, pailak fakfisagarek andi nek he, inonggwarek inebeat weaget fakhagarek andi.

¹⁹ Hiren he, ”Allah nen, Areagun wo'nisasikhemo, ninebe at awi wurik welago,” iluk he, hinonggot nogo? Hinebe hinonggwarek eisewerek fuk. Allah eisewerego.

²⁰ Allah nen he, hinebe onggo arat katokhogo palogo wokhinafikhemo welagep andi nen he, hinebe abirengge Allah faget fisaluk at enek fogerati logoni o.