1 KORINTUS 5 - Allah Wene Fano Wene Hupla Inane

Ap ekhe eisena agwe mene wanhikhemo, Paulus nen komorinafikhe wene

¹ Afuni nen, ap hit mene ekhe he wanu lek mene wanhesik werek iluk abok ikhi logolik yaganetama nesanggo holhi o. It afuni Allah ane inonggot mene nen a'nogo hilingitarek lek mene, ap andi eisena agwe mene wanhesik werek andi.

² A'nogo hilingitu kwelegat he, hit fogerakhikhi lagep andi ri! Hit hilingisugun he, hinendawimo weak a'luk, ap weak hilingite mene andi, wulakfisa mene hinom lambukhogo welagep andi.

^3-4 An nebe yatma welagi mene re, nendawinggen hit ninom seberogo welago hangge o. Andi nen, nebe ninom logolik u hak he, ninoe Enupogot Yesus enu hombuk palogo re, at ap weak hilingite mene andi wene oba figimo werego. Halok he, hit misi'mo andogotunem, an nendawinggen ninom welago hangge andi nen, ninoe Enupogot Yesus omameba, yi'nogo hilingi'no.

⁵ Ap andi endawinggen ninoe Enupogot wesigin andi sambul waga logolik teluagen he, yogondak ebe Iblis nen weagetfouwageluk, at Iblis at wogo'no.

⁶ Afuni nen inane lagakhogo ikhi logolik, ”Enggen sumburu roti mene fisuageluk elonggoma pelafarek mene endebat elonggoma pelabumo nen, roti ebe mondogat fiterego,” iluk agarek a'nogo hinonggot nogo? Hinelu logolik fogerakhikhi lagep andi fano fuk. Weago.

⁷ Afuni Yahudi mene seni Paskah ninggi logolik, domba wam warogo, enggen roti fisuageluk elonggoma pelafarek mene wulakfisaluk, fiti'lek mene nek nenggarek hak hilingi'no. Ninanggo domba wasu hak, Kristus nit faget arat watukwa andi nen he, hinebe roti ket fiti'lek mene agepsik welagep hak eberogoat asubagaigen, enggen roti fisuageluk pelafarek mene attak mene wulakfisagarek hak, weak hilingiti lagep mene andi horogo herakfisano o.

⁸ Halok he, seni Paskah ninggi logolik, enggen roti fisuageluk elonggoma pelafarek mene pelafi'lek mene nenggarek hak, nit weak hilingitik, pailak fakfisigik, ikhi logogun lego. We, ninendawinggen misigat logolik, eberogoat mene nek hilingiti logouwogo.

⁹ An nen attagat wene lisu palogo hinoba lakfei waga logolik he, mel yagahisasigi anggigi: ”Hit he, it afuni pailak fakfisili'lagwi mene hinom lambukhogo logogubo,” iluk yagahisasigi o.

¹⁰ A'nogo yagahisasigi andi re, it afuni Allah ane inonggot logolik pailak fakfisagarek mene inom, inami'mik weak hilingitarek mene inom, lalinafarek mene inom, tugwi kembu oba himbirik logolik fogeratarek mene inom, it andi faget yagahisasigi lego. It a'nogo hilingitarek mene hinom logogun lek, iluk ilema re, it afuni kweangma mene yoma mondok herakfisaluk wilibilebo.

¹¹ A'nogo yagahisasigi andi re, wene ebe yi'nogo. At ekhe nen ikhi logolik he: ”An hinagailak Allah amlogo aro,” iluk ikhi logoligat he, pailak fakfisigik, ami'mik weak hilingitik, tugwi kembu oba himbirik logolik fogeratik, ane puk weak wenagisigik, amusu lugulugwi paluogeluk nenggarek a'nogo mene nunggu mondok welagik, afuni lalinafik, ikherek andi hangge mene inebe hinom lambukhogo logogun legat, sumburu hinom ninggi logogun legat, iluk yagahisasigi anggigi.

^12-13 It afuni Allah ane inonggot mene wene an nen inoba fagain nogo? Lego. We, Allah nen inoba fagain werego. Allah ane lisu palogo fikhi logolik he, mel isukwa: ”At ekhe hinanggele'ma logolik weak hilingiri'logo mene andi, wulakfisano,” iluk isikhemo lisu palogo fesukwama werek andi nen he, ap ekhe hit Allah againafuri hinom andogoti lagep mene nen weak hilingite halok, hiren wene oba fogoin lek nogo? Fogoin aro.