1 KORINTUS 4 - Allah Wene Fano Wene Hupla Inane

”Nit Kristus amingmingengge logolik yi'nogo hilingiti lago,” iluk yagaisasikhe wene

¹ Hiren nit faget he, ”It inebe Kristus amingmingengge logolik, Allah endawimo anggikherek awene afuni kweangma inonggot kwe yagaisilik nikharek mene o,” iluk futninobagakhi logoino.

² It ap kaindek inagarek yi mene ti mene it inamingmingengge mene inenggiba logouwageluk inobabut palogo nen, inobabut lenurek mene halogat fisagarek.

³ Mene re, an nen a'nogo hilingitunem, hiren he a? It ekhe nen he a, ikhi logolik, ”At higit hilingiri'logo he a? Weak hilingiri'logo he a,” iluk nanema wo'neogoin he, elo'lek anggikhi lagi. Nen, an nonggwaregen igin ogo re, elo'legaro.

⁴ An nonggwaregen, ”Weak ekhe hilingiti'lek,” iluk anggikhi lagi andiba, wene noba koragain legaro. We, at ninoe Enupogot ebe wesimbik enek he wene noba figik, kotik, igin o.

⁵ Andi nen he, aren wene afuni inoba figik, kotik, igin andi sambul oan asi wagi'lek werek kwelek, hiren it ekhe wene inoba figik, kotik, ugun mondok lego. We, at ninoe Enupogot ebe wesimbigen he, afuni nen hubanggo hinagaisogo hilingiri'lagwi mene sele'mat figik, yi'nogo hilingisugun, iluk anggaluk inendawimo sebelek werek mene andi fakhogo figik, i wesigin andi nenangorogo logogun o. A'nogo fakhogo fugunem, Allah nen he, fano hilingita mene inebe lombok fogerinabu meneat fogerinabigin o.

⁶ Nerugwi nagaila'lak. An wene yagahisigi andi re, hit ekhe nen he, ”Hit hinoe andi elo'lek hak mene re nit ninoe yi nek he mondok fano,” iluk fogerakhanogoluk yagahisigi. A'nogo fogerakhogoin lek iluk, mel agarek anggigi: ”Wene Allah ane lisu palek werek kwelek oba mangorogo ekhe ugun lego,” iluk agarek a'nogo futfobagaigeluk, nit Apolos nemberek ninoba lirogo yagahisigi andi.

⁷ ”It ekhe andi elo'lek hak, mene re an enek he mondok fano, ikhi logoino,” iluk sa nen yagahisasikhemo ikhi lagep? Hit hinagarek yi mene ti mene helikhi lagep andi, Allah nenat wokhisikherek lek nogo? Arenat wokhisikherego. A'nogo wokhisugunem helikhi lagep meneat he, hiren elalhep mene hangge hinonggwaregen fogerakhikhi lagep andi nenahalok?

⁸ Hit yi mene ti mene arat helegep higi. Arat kain akhegep higi. Nit kembu werek kwelek, hit enek he, hinenupogot arat akhegep higi. Hit a'nogo hinenupogot a'lepma, nit ninomat ninenupogot logoilo e. Meneat he, lego.

⁹ Nit andi re, afuni inapsiri mene afuni ineilhanem sele'ma inebe horoget fisaluk inenggali warogo inoatarek andi hak, nit Allah nen ninayonggo fesikhesik lakninobagai wagaikhemo wagagu mene andi, afuni inom, malaikat inom, ineilhanem a'nogoat hilingninabi'lagwi o.

¹⁰ Nit he, Kristus faget ninebe kembu werek kwelek he, hit enek he, Kristus hinom hundik logolik hinendawimo kagalek welagep higi. Nit sebelek werek kwelek, hit enek he, hinomame werek welagep higi. Nit inendawimo sebelninobagagu kwelek he, hit enek he, fogethinabi'lagwi higi.

¹¹ Nit o fageat a'lima nen yogondak huli, sumburu inom, i inom, neleat welagorek. A'nogo logolik, ninasu legat were'ma yei ninoatu kwelek, ninaiba le'ma, o yi awi ti awi nikhi lago.

¹² A'nogo nikhi logolik, yi mene ti mene heluogeluk, yabu ninenggiba nen, ninomamerogo waganogo helogorek. Afuni nen homan ninobagagunem niren agaugwerinafik, yi weak ti weak hilingninafunem, ninafe morogo welagik,

¹³ ninabok weak palhunem, ninane liokhogo yagaisigik, ogorek. A'nogo hilingiti lagoba nen, o fagearen yogondak huli afuni yoma mondogaren he, ologoilong wulakfisagarek hak, nit a'nogoat hilingninafuat werek.

¹⁴ An nen lisu palhi lagi yi re, hit hinenggali wasigeluk palhi lagi fuk. We, hit hinebe an nebe nagainafuri mene hak nendawi logolik komothinafi lagi o.

¹⁵ Hit Kristus hinom hundik were'ma re, ap wene yagahisili'lagwi mene inebe 10.000 hokhorogoat werek meneat he, hineisena re, hokhorogo fuk. We, inagainafuri taginafarek hak, an nenat wene fano wene andi yagahisa wagagisik Kristus Yesus hinom hunogo hinobagasigimo welagep andiba, hineisena nalegat agagisik welagi o.

¹⁶ Andi nenat, ”An nobabut wanini o,” iluk nane ninghogo komothinafi lagi o.

¹⁷ Hit an nobabut wanubagaigen iluk, namlogo Timotius, nonggwaregen tati mene hak ebe nendawi mene hinoba lakfei wagi andi. Athe, ninoe Enupogot emberek hundik logolik, at faget obabut lenurogo hilingiterek mene hinoba wesimbik he, mel yagahisagain: ”At Paulus Kristus emberek hundik logolik, it Allah againafuri o yi awi ti awi andogotarek mene at onggwarek hilingiterek mene obabut wanuageluk, yi'nogo yagaisikherek,” iluk hinendawimo wenggelogo yagahisa wesigin o.

¹⁸ An hit hinoba wesigin lek iluk he, hit ekhe fena nen hinonggwaregen fogerakhikhi lagep andi.

¹⁹ A'nogo meneat he, ninoe Enupogot endawimo anggalugen, ”Fano, lan,” iluk yaganete halok he, an hinoba weak-weagat wesigin o. Wesimbik he, it ekhe fogerakhili'lagwi mene andi, inane ugun mene nesanggo holigin fuk. We, inomame werega? Lega, iluk inobabut paligin o.

²⁰ Andi re, ”Allah awe a'ma welago,” iluk, inaneba ugun halok, enegat agarek fuk. We, inomamerogo hilingiti logogun halok enegat agarego.

²¹ Mene re, an hit hinoba yei waluk wesu hak, wesimbik, nane ninghogo yagahisa wesigin hinamolo a? Athe, nane liokhogo hinebe nendawirogo yagahisa wesigin hinamolo a. Hiren ki hak hinamolo anggegep.