1 KORINTUS 2 - Allah Wene Fano Wene Hupla Inane

Yesus ebe eba menfuluk watukwa wene

¹ Nerugwi nagaila'lak. Allah ane andi endawimo hinago were'ma, afuni kweangma mene nen inonggot mene andi, an nen fakhogo yagahisa wagagi andi re, an nane fano igiregen, nendawinggen kagalegen, yagahisa wagagi lego.

² An hit ninom logolik he, nendawimo nen wene we mene ebeti'lek, we, at Yesus Kristus faget ebeti logolik, esin he, at ebe eba menfuluk watukwa wene andiat ebesigin o, iluk nendawimo anggasigi.

³ Nendawimo a'nogo anggasigisik ebeti logolik, an nonggwarek nebe lebelegatma nailo nen noagelekwe lei'-leigat hinoba wagagisik welagagi anggigi.

⁴ A'nogo logolik he, afuni inawene an nendawinggen kagalegen, nane fano nen, ninghogo yagahisasigi lego. We, at Allah Areagun omameba yagahisasigimo, ebe agaikhemo re hineilenggen hasigip.

⁵ A'nogo yagahisasigi andi re, hit hinendawinggen afuni inendawimo kagalek mene andi inoba himbiret fuluk welagi'lek, we, Allah omame werek iluk, at oba himbiret fuluk hinendawinggen at oba himbiret fobagaigeluk yagahisasigi andi.

”Allah endawimo kagalek welagaikhe mene andi nen, fakhogo yaganisikherek,” iluk yagaisasikhe wene

⁶ It afuni inendawinggen wurik mene halogat, wene wurik mene andi inendawimo kagalogo yagaisogorego. A'nogo yagaisogorek andi re, it afuni kweangma mene yoma, inawene mene lek. Inogogwi kaindek inebe hobuk legasugun mene o yogondak werek yoma, inawene kagalek wene legaro.

⁷ Wene andi Allah endawimo kagalek wene hinago welagaikhe mene fakhogo yagaisogorek. Wene andi afuni kweangma mene inonggot meneat he, attak Allah nen yi mene ti mene elalhi'lek logolik he, arenat nit fanotninafunem ninendawimo agaiyek asuageluk endawimo anggasikhe mene hinagoat welagaikhe.

⁸ Afuni kweangma mene inogogwi kaindek o yogondak werek yoma, wene andi inelu agi'lek inonggorat werek. Inelu logoilepma re, ninoe Enupogot fogeratorek mene a'nogo, ebe eba menfuluk wa'lep legaro.

⁹ Wene andi faget he, Allah ane afuni nen ineilenggen higi'lek. Inesanggo holhi'lek. Inendawimo nen ebeti'lek welagaikharek mene, mondogat nit afuni at ebe ninendawirogo welagorek mene nek ninobagaikhemo werego,” iluk lisu palogo fesukwama werek.

¹⁰ Ninobagaikhe mene andi, at Allah Areagun en yi mene ti mene obabut palherek andi nen, Allah endawimo hinago welagarek mene andi inomat kwelakhikhi logolik, fakhogo yaganisasikhe o.

¹¹ Nit afuni ninendawimo sa elu. Ninonggwarek ninendawimo lombok ninelu welagorek anggigi. Andi hagat, Allah endawimo re, it ekhe inonggot enek. We, onggwarek Areagun alegat elu welagarego.

¹² Niren he, afuni kweangma mene yoma inareagun wanhugu fuk. We, at Allah obabut fano nen wo'nisasikhe mene ninelu asuageluk he, at Areagun pelabi wagaikhemo helasugu o.

¹³ At Areagun helasugusik he, Allah obabut fano nen wo'nisikherek wene andi, afuni Allah Areagun inendawimo werek mene yagaisoageluk he, afuni inendawimo kagalek mene nen yaganisugunem yagaisikhi lago fuk. We, Allah Areagun en yaganisugunem yagaisogorego.

¹⁴ Wene Allah Areagun en wo'nisikherek wene andi re, it afuni Allah Areagun inendawimo werek mene nek futfagarek andi nen, it afuni inobabut inetogat logolik, futfagarek lek. A'nogo futfagarek lek andi re, iren he, ”Wene andi afuni kembu mene nen agarek hangge ili'lagwi,” iluk agarek andi nen, wene andi futfigi'lek werego.

¹⁵ A'nogo meneat he, nit Allah Areagun ninendawimo werek mene re, yi wene ti wene futfikhi lago. A'nogo futfugunem, it ekhe nen he, nit ninobabut futninobagali'lagwi lego.

¹⁶ Wene andi faget, Allah aneba lisu mel iluk palogo fesukwa: ”Nineisena Enupogot endawimo ebeterek andi re, sa nen elu? At he, sa nen komorasigin nogo?” iluk, it ap Allah ane yagaisikhi lagaukwa mene nen, lisu palogo fesukwa. A'nogo meneat he, niren Kristus endawimo ebeterek mene andi fisogo welago o.