1 KORINTUS 16 - Allah Wene Fano Wene Hupla Inane

”Allah againafuri nen inerugwi inagaila'lak ekhe uang leberisikhi logogun,” iluk yagaisasikhe wene

¹ Yogondak he, hiren uang andogorogo hinerugwi hinagaila'lak Allah againafuri ekhe inobagauwogeluk egep andi re, wene it Allah againafuri o Galatia mene yagaisigi andi hagat hilingi'no o.

² An nebe wagunem en andogosugun lego. We, yabaat hari Minggu oba hundik-handik ikhi logolik, hinebe lombok hinenggim aga halok, andogorogo fisaluk fisogo logoino o.

³ Fisaluk he, ap waluk logoin mene hiren, ”It elok,” iluk anggegep mene halok inayonggo feino. A'nogo inayonggo fuluk were'ma, an nebe wesimbik he, hiren fisegep mene andi waluk loagen, surat palogo o Yerusalem lakfisagain o.

⁴ Mene re, an nebe lagain anggigi halok he, an ninomat logoin o.

Paulus nen, ”Yi'nogo hilingisigin,” iluk wene kagalogo fesikhe wene

⁵ An o Makedonia lagain iluk nendawimo anggigiri'mo re, andoma lambik yi awi ti awi fa'lagik arat lagi halok he, hit hinoba wesigin o.

⁶ Hinoba wesimbik he, an hit ninom nenggi endebat logombik he a? O weak werek kwelek nenggi ekhe inomat logombik he a, hiren o an lagain anggigiba andoma laknobagaubagaigen iluk yagahisigi o.

⁷ An a'nogo o ekhema lageluk laga logolik nenggi misigam faget ninom logogun he, nabit. We, ninoe Enupogoren fano ikhe halok he, an nenggi endebat ekhe inomat ninom logogun o, iluk nendawimo anggikhi lagi.

^8-9 Wesigen he, o Efesus yoma afuni, ”Wene wanugun ninabit,” iluk wene pali'lagwi mene inebe hokhorogoat werek meneat he, an nen it ekhe yagaisugunem wene wanugun mene hokhorogo werek andi nen he, o yoma logombik Hari Pentakosta arat hilingi'lugen wesigin o.

¹⁰ At Timotius a'nogo, an nen ninoe Enupogot faget hilingiti lagi hak hilingiri'logo mene hit hinoba wesigin andi, ebe waga halok he, hit hinom ailo lekhogo logouwagen he, ebe fanorogo wanino o.

¹¹ At wagunem he, it afuni ekhe nen, ”At ebe elo'lek,” iluk inendawimo sebelfogoin mondok lego. At ambotkwe noba waga logolik he, ninerugwi ninagaila'lak fenakwe omanogo inom nea wesuageluk nenangorinarek welagi andi nen he, at fanorogo lebethikhi logoino o.

¹² Ninagailak Apolos a'nogo nen, it ninerugwi ninagaila'lak fena omanogo woginarek hinoba wesuageluk, hobugalebat endawimo kagalhi lagi meneat he, at yogondak ya wesigin iluk anggili'logo lego. Mene re, hobuk wesigin anggikhe halok he, wesigin aro.

At Paulus nen inendawimo kagalhik, hai warinafik, isikhe wene

¹³ Hinebe hebelogo logolik he, hinendawinggen Allah oba himbiret fuluk, mendegat logoino o. Hinobabut hinailo lekhogo logolik he, hinomamerogo logoino o.

¹⁴ Hit yi mene ti mene hilingisuogeluk he, afuni inebe hinendawirogo hilingiti logoino o.

¹⁵ Nerugwi nagaila'lak. Wene ekhe yi hinendawimo kagalik. At Stefanus againafuri inom omanogo inebe hinelu o. O propinsi Akhaya andoma re, it tak Allah againafuri agaukwasik he, it Allah againafuri ekhe leberisikhi logouwogeluk inendawinggen oba nenat isukwasigen leberisili'lagwi andi.

¹⁶ It inobabut hangge it ekhe inom ninghogoat hilingitu halok he, mondogat inawe a'ma kuluk inane hologo logoino o.

¹⁷ Stefanus inom, Fortunatus inom, Akhaikus inom, noba wagaikhasik, hiren an faget hilingiti logou hak, iren fano hilingiri'lagwi andi nen, nendawimo nagaiyek anggikhi lagi o.

¹⁸ It wagaikhama re, an nendawinggen fano aga hak, hit hinendawimo fano asigin o. Halok, it afuni ekhe inobabut it hangge mene halok he, hinane agaukhogo yagaisikhi logoino o.

¹⁹ Allah againafuri o propinsi Asia yi awi ti awi andogori'lagwi mene yoma nen hit hai wathinafa o. Ap Akwila agwe Priskila emberegaren, Allah againafuri it inaiba andogori'lagwi mene inomaren, ninoe Enupogot inom hundik logolik hai hokhorogo wathinafa aro.

²⁰ Nen, ninerugwi ninagaila'lak o yoma mene mondogaren hai wathinafa aro. ”Nit mondogat ninebe Allah againafuri,” iluk he, hit-hit hai hinambe saluk wat-wat ilik lano.

²¹ An Paulus nonggwarek nenggi nen lisu palogo hai wathinafi andi.

²² At ekhe nen, ninoe Enupogot endawi hundik lek halok he, Allah nen at andi ebe homan fouwago. Mene re, ninoe Enupogot weak-weak eme o, u hak, Maranatha, iluk igi andi.

²³ Ninoe Enupogot Yesus obabut fano a'nogo nen kwelakhinarek mondok logouwago.

²⁴ Kristus Yesus ninom hundik logolik he, hinebe mondogat nendawi iluk hai wathinafi andi o.