1 KORINTUS 12 - Allah Wene Fano Wene Hupla Inane

Allah Areagun nen afuni ninobabut lombok wo'nisikherek wene

¹ Nerugwi nagaila'lak. Allah Areagun nen wo'nisikherek wene andi hinonggot logogun andi nabit.

² Hit attak ninoe Enupogot hinonggot were'ma, obabut weak mene nen tugwi kembu ane lek mene oba himbirik logouwageluk, we, komakwe heat wokhinarek laluk he, nongethinafi lagaikhe andi hinelu.

³ Wene yi hinelurogo yagahisak. Afuni Allah Areagun inendawimo were'ma re: ”At Yesus Allah nen weagetfagain o,” iluk, homan fagain elo'lego. Nen, Allah Areagun inendawimo lek halok he: ”Yesus he, an noe Enupogot,” iluk ugun elo'legaro.

⁴ Ninobabut lombok amu-amu wo'nisikherek andi re, Allah Areagun misigat mene nenat wo'nisikherego.

⁵ At ninoe Enupogot eabu hunogo tomok hilingitorek andi re, at ebe misigat meneat, eabu hilingitorego.

⁶ A'nogo eabu hilingfisikhi logolik, ninenggi hunogo tomok hilingitorek mene andi, ebe mondogat hilingisuageluk he, nineisena Allah misigat mene nenat ninebe lombok omame wo'nisikherego.

⁷ Afuni nen he, ”It Allah Areagun inendawimo werek,” iluk, enegat futninobagauwageluk, aren he, ninebe mondogat faget ninendawimo lombok kagalherek.

⁸ At Allah Areagun en, at ekhe wene kagaukhogo ikhi logouwageluk wogeterek. Nen, at Areagun andi nenat, at ekhe yi wene ti wene elu mondok logouwageluk wogeteregat.

⁹ Nen, at Areagun andi nenat, at ekhe endawinggen Allah oba himbirik mondok logouwageluk hunogoat wogeteregat. Nen, at Areagun misigat andi nenat, at ekhe nen ou higirinafi logouwageluk omame wogeteregat.

¹⁰ Nen, at ekhe yi mene ti mene elalinat hilingiti logouwageluk wogetik, at ekhe nen Allah ane yagaisikhi logouwageluk wogetik, at ekhe nen ikhi logolik he: ”At andi Allah Areagun endawimo logolik hilingiri'logo, igik, weak mene areagun endawimo logolik hilingiri'logo, igik,” enegat obabut palhi logouwageluk wogetik, at ekhe nen inane onggot mene elalinat ikhi logouwageluk wogetik, at ekhe inane inonggot mene ugunem, at esanggo holiluk he, ”Ebe yi'nogo mene faget ikhe,” iluk it inaneba higithogo yagaisikhi logouwageluk wogetik, inebe lombok wogisikherek andi.

¹¹ A'nogo wogisikherek andi re, Allah Areagun misigat andi nenat endawimo anggaluk, yi hilingitik, ti hilingitik, ikhi logouwageluk inebe lombok minggilogo wogisikherek andi.

”Nit ninenggi nineisok ninoba yi mene ti mene hokhorogoat werek meneat he, ninebe misigat,” iluk isikhe wene

¹² Nit afuni ninebe misigat meneat he, ninenggi, nineisok, ekhe ninoba hokhorogoat hundik werek. Ninenggi nineisok ninoba ekhe mene ekhe mene hokhorogoat hundik werek meneat he, lambukhogo ninebe misigat andi hangge re, at Kristus ebe a'nogo aro.

¹³ Nit he, ninebe mondogat Yahudi mene inom, Yunani mene inom, inamingmingengge mene inom, inale'ma welagaikharek mene inom, at Kristus ebe misigat mene ninom hunesuageluk, at Areagun nen ima pela'ninafikhe andi. Nen, i elesi misigat mene nenggarek hak, at Areagun misigat mene ninendawimo fesikhe andi.

¹⁴ Nit afuni ninebe re, ninenggi misigat andi nek fuk. We, ninenggi nineisok ninebeba ekhe mene ekhe mene hokhorogo ninoba hundik werego.

¹⁵ Nineisok yi ane werek logoilepma re, aren ikhi logolik: ”An nebe inenggi fuk. Hunogoat andi nen he, inebeba hundik welagi lego,” iluk umo re, ane a'nogo igin andiba, ninebeba hundik mene andi, ale'ma logogun anggegep? Elo'lego.

¹⁶ Ninesanggo yi ane werek logoilepma re, aren ikhi logolik: ”An nebe ineilenggen fuk. Hunogoat andi nen he, inoba hundik welagi lego,” iluk umo re, ane a'nogo igin andiba ninoba hundik mene andi ale'ma logogin anggegep? Elo'legaro.

¹⁷ Ninebe yi re, nineilenggen enek logoilepma re, ninesanggo ninggi'nogo holhi logoilo. Nen, ninesanggo nek logoilepma re, amben ninggi'nogo palhi logoilo.

¹⁸ Mene re, at Allah nen endawimo anggasikhesigenat ninenggi nineisok ninebe yi mene ti mene ninebeba hundik werek mene yoma obalik lombok hunogo ninobagasikhemo ninebe misigat mene welago yi.

¹⁹ Ninebe yi re, ninenggi andi nek logoilepma re, ninebe ninggi'nogo logoilo.

²⁰ Mene re, ninenggi nineisok yi mene ti mene ninoba hokhorogoat werek meneat he, ninebe misigaro.

²¹ Andi nenat he, nineilenggen en he, ninenggi yagati logolik: ”An he, hat le'ma fano logoile,” iluk ugun elo'lego. A'nogoat he, ninungguloagen nineisok yagati logolik he: ”An he, hat le'ma fano logoile,” iluk ugun elole'garo.

²² Ninebe misigat mene, ninenggi nineisok yi mene ti mene ninoba welagarek andi re, ekhe omame lek hangge anggogorek meneat he, andi fano mondogaro. Misik ekhe le'ma ninggi'nogo hilingiti logoilo. Elo'legaro.

^23-25 Nit ninenggi nineisok ninebeba hundik welagarek mene andi, ekhe elokhonggen fano halok he, fanorogo hilingisugun lek. Meneat he, ekhe elokhonggen weak halok, fanorogo hilingisogo figik, ekhe ninenggali asugun halok, hinagaisogo fuluk elokhe fanorogo hilingisogo figik, hilingitorek. Ninenggi nineisok yi mene ti mene ninebeba hundik welagarek mene mondogat ekhe nen ekhe endawiratik, ikhi logouwageluk, at Allah nen ninebe fanorogo hilingisogo elalninafikhe. Elalninafi logolik, ninenggi nineisok ninebeba hundik welagarek mene ekhe mondogat, huli wa'lasinogo iluk, elokhonggen weak halok, fanorogo hilingisogo fakhigik, ikhi logouwageluk, obuluk tomok hunhigik ninobagasikhe andi.

²⁶ Ninenggi nineisok yi mene ti mene ninebeba hundik welagarek mene, ekhe ou nen heinet watu halok he, ninebe abirenggeat heinet watorego. Nen, ninenggi nineisok yi mene ti mene ninebeba hundik welagarek mene, ekhe afuni nen fogeratu halok he, ninebe mondogat ninagaiyek anggogoregaro.

²⁷ Hit hinebe lambukhogo Kristus ebe higit logolik he, hinebe lombok, at enggi eisok hak oba hundik welagebo.

²⁸ At Allah nenat he, againafuri ninobalik lombok ninobagakhi logolik, attak he, nit at ane yagaisilik nikhi logouwageluk ninayonggo figik, ninombo'ne re, at ane yagaisikhi logouwageluk it ekhe inayonggo figik, it inombo'ne re, wene yagaisikhi logouwageluk it ekhe inayonggo figik, it inombo'ne re, elalin mene hilingiti logouwageluk it ekhe inayonggo figik, it inombo'ne re, afuni ekhe ou mene higirinafi logouwageluk it ekhe inayonggo figik, nen, yi mene ti mene leberisikhi logouwageluk it ekhe inayonggo figik, inogogwi kain mendek logouwageluk it ekhe inayonggo figik, afuni o yi awi ti awi inane inonggot meneba wene ikhi logouwageluk it ekhe inayonggo figik, ninebe lombok a'nogo ninayonggo fesikhe.

²⁹ Nit mondogat andi ninebe lombok, at ane waluk loageluk ninayonggo fesikhe mene welagorek nogo? Nit mondogat Allah ane yagaisogorek mene nogo? Nit mondogat wene yagaisogorek mene nogo? Nit mondogat elalin mene hilingitorek mene nogo?

³⁰ Nit mondogat afuni ekhe ou higirinaforek mene nogo? Nit mondogat afuni o yi awi ti awi inane ninonggot meneba wene elalinat yagaisogorek mene nogo? Nit mondogat inane ninonggot mene ugunem ninaneba higithogo ikhi lago mene nogo? Lego.

³¹ Andi nen, nerugwi nagaila'lak. Allah Areagun en ninobabut lombok wo'nisikherek andi mene, ebe fano mene wokhisoageluk ninghogo hilingiti logoino o.