1 KORINTUS 11 - Allah Wene Fano Wene Hupla Inane

¹ An Kristus obabut waganogo hilingiti lagi hak, hiren he, an nobabut waganogo hilingiti logoino o.

Hemi inasu inunggul oba yanggulik logolik samban ikhi logogun wene

² Wene yi mene ti mene faget an noba ebeti logolik, an yaganetukwama hit yagahisasigi mene fisogoat welagep andi nen fogethinafi lagi o.

³ A'nogo meneat he, wene misigat ekhe yi hinelu a'lep anggikhi lagi. Nit ap ninebe lombok, ninoe Enupogot Kristus mendek were'ma awe a'ma logogun. Nen, hemi inebe lombok he, inaguni kain mendek were'ma inawe a'ma logogun. At Kristus andi re, eisena kain Allah mendek were'ma awe a'ma welagarego.

⁴ Ap inebe lombok inunggulasu salogo nen afuni andogore'ma samban igik, wene yagahisigik, ili'lagwi halok he, ninoe Enupogot enggali wasu hagat hilingiri'lagwi.

⁵ Nen, hemi inebe lombok he, inasu inunggul oba yanggulhi'lek logolik afuni andogore'ma samban igik, wene yagaisigik, ili'lagwi halok he, inonggwaregen inaguni lombok inenggali wasu hagat hilingiri'lagwi. A'nogo hilingiri'lagwi andi re, inesi felelenghogo pale'ma hilingisu hagat hilingiri'lagwi aro.

⁶ At he ekhe nen asu unggul oba yangguligin abit halok he, esi paluago. Hemi inesi inungguloak oba felelenghogo palhik, hogologo palhik, ugunem inenggali halok he, inasu inunggul oba salumo fano.

^7-8 Eroba re, ap inebe ero re, hemi fuk. Hemi ero re, ap andi nen he, ap inebe re, Allah fogeratarek mene ebe hangge, afumak hangge, iluk he, inunggulasu salugun lek. Meneat he, hemi re, inaguni fogerinafarek mene inafumak hangge.

⁹ Allah nen he, hemi faget, ap elalhikhe fuk. Ap faget he, hemi elalinafikhe o.

¹⁰ Andi nen he, it hemi it malaikat Allah nen yonggo pelakfisa wagarek mene omanogo ineilhanem logolik he, inaguni lombok inane holek welago u hak inasu inunggul oba yanggulogo logogun o.

¹¹ A'nogo meneat he, ninoe Enupogot ninom hundik logolik he, hemi re, ap le'ma inale'ma welagik, ap he, hemi le'ma inale'ma welagik, logogun lek.

¹² Eroba, Allah nen he, hemi ap mene waganogo elalhikhe andi hak, ap inebe hemi nen taginafarek. Meneat he, ninebe inom, yi mene ti mene inom mondogat he, ero Allah aro.

¹³ Nerugwi nagaila'lak. Wene yi hinonggwarek hinendawimo ebe'ni. Hemi su inunggul oba yanggulhi'lek logolik, afuni inebe andogore'ma samban ugun nogo?

^14-15 Ap he, inesi uan were'ma re, inenggali agarek meneat he, it hemi re, inungguloak salogo logouwageluk Allah nen inesi uan wogisasikhemo were'ma re, ”Inesi fano,” iluk afuni nen fogerinafarek, iluk he, hinonggwarek hinendawimo nen anggikhi lagep lek nogo?

¹⁶ Mene re, it ekhe nen he, andi faget wene palugun werek halok he, nit inom, Allah againafuri o yi awi ti awi andogotarek mene inom, hunogoat hilingiti'lek, a'nogoat hilingitorego.

”Ninoe Enupogot oba eberek logouwogeluk enggen amusu weak mene ninggi'lek, yi'nogo ninggi logogun,” iluk yagaisasikhe wene

¹⁷ An nen, wene yi komothinafi logolik he, fogethinabigin lek mene ekhe werego. Hit hinebe andogoti lagep andiba, fano ari'logo fuk. Weak ari'logo o.

¹⁸ Hit wene attagat yagahisagain anggigi re, yi. Afuni nen he, ”It Allah againafuri Allah awi wuri'mo andoget fuluk, it-it inebe huli wari'lagwi o,” iluk yaganetama wene andi nesanggo holhirik, fena eberogoat hilingiri'lagwimo iluk anggigi o.

¹⁹ A'nogo hilingiti lagep andi re, at Allah nen, ”It andi an nagainafuri,” iluk anggili'logo mene, enegat asuagen hinebe huli wasugun o.

^20-21 Meneat he, hit ninoe Enupogot oba eberek logolik, enggen amusu nuogeluk misi'mo andoget fuluk he, hinamburu lombok, hinagai lombok, helaluk, ”An tak nagain,” iluk nilik lagunem he, it ekhe lek mene neleat kamo igik, it ekhe amusu hokhorogoat naluk lugulugwi palhik, ikhi lagep andi re, ninoe Enupogot amburu ninggik, agai hinago ninggik, ninggi lagep fuk.

²² Hit a'nogo hilingiti lagep andi nenahalok? Sumburu ninggik, i ninggik, ugun he, hinawi wurik le'ma a? I a, Allah againafuri hinom andogoti lagep mene hinendawimo nen sebelfisigik, inenggim lek mene inenggali asuageluk hilingitik, ikhi lageba? An wene ki mene yagahisagain. Fogethinabigin a? Lego. An wene yi faget fogethinabigin lego.

²³ Wene a'nogo hilingiti logogun mene faget, ninoe Enupogoren yaganetikhemo re, an nen hit yagahisasigi andi.

²⁴ Ninoe Enupogot Yesus ap inobabut weak mene nen wasuageluk, ap ekhe nen hubanggo yonggo lagaikhe andi sambul, at Yesus nen he, sumburu roti mene enggim wanhikhesik he, Allah hai warogo re, enggi nen kurogo fesikhesik he mel yagaisasikhe: ”Sumburu yi an nebe aro. An hit fagerat noasugun andi, noba eberek logobagaigen he, yi'nogoat hilingiti logoino,” iluk agoromi wogisasikhe.

²⁵ A'nogo wogisasikhemo arat nasukwama nen he, iwak enggen amusu hinago a'nogoat enggim wanhikhesik he, mel yagaisasikhe: ”Namep wulagaisogo wa'lasigin andiba Allah nen wene ket mene warogo wokhinabigin iluk isikhe andi, namep hinago ebe yi aro. Halok, yi'nogo ninggi logolik he, hobuk an noba eberek logobagaigen, yi'nogoat ninggi logoino.

²⁶ Sumburu roti mene yi'nogo ninggik, enggen amusu hinago yi'nogoat ninggik, ikhi logolik hiren he: Ninoe Enupogot a'nogo watukwa o, iluk wene andi it ekhe yagaisa hak he, yi'nogoat ninggi logoino. A'nogo ninggi logolik were'ma, huli, an wesigin andi huli lek asigin o,” iluk yagaisasikhe.

²⁷ Hat ekhe nen ninoe Enupogot oba ebeti'lek logolik, amburu ninggik, agai hinago ninggik, na lek meneat nenggen halok he, ninoe Enupogot ebe faget, amep faget, wene hoba fagain werego.

^28-29 It ekhe nen, at Ebe futfigi'lek logolik, sumburu andi mene ninggik, enggen amusu andi mene ninggik, ninggi logolik he, inonggwaregen wene inoba fakhili'lagwi andi nen he, hit hinebe lombok he, hinonggwaregen hinobabut palano. A'nogo palalugen, sumburu andi mene ninggik, enggen amusu andi mene ninggik, ugun o.

³⁰ A'nogo inobabut paligi'lek nili'lagwi andi nen, inebe hokhorogoat ou wanhik, lebelek agik, ugu kwelek he, it ekhe wa'lari'lagwiat andi.

³¹ Meneat he, ninonggwaregen ninobabut palogo nonggo halok he, Allah nen wene ninoba fagain lego.

³² A'nogo meneat he, at Allah nen he, ”It andi afuni endakwe mene inom lambukhogo wene inoba fuluk weagerinabugun andi elo'lego,” iluk, aren ninobabut palogo nen, komotninafarek.

³³ Andi nenat, nerugwi nagaila'lak. Enggen amusu a'nogo nuogeluk halok he, afuni hit mene ekhe inebe oan werek halok he, nenangorinarek logoino.

³⁴ Hit hinebe andogorek were'ma, wene hinoba asinogo nen he, hit ekhe sumburu nele halok he, hinaiba nalugen wesugun o. Nen, wene ekhe werek halok he, an nebe wesimbigen hali wesigin o.