1 KORINTUS 10 - Allah Wene Fano Wene Hupla Inane

”Hinendawinggen tugwi kembu oba himbirik logogup,” iluk yagaisasikhe wene

¹ Nerugwi nagaila'lak. Wene yi re, hinonggot logogun andi nabit. Ninombalak mondogat he, at Musa nen woginarek ohena andi a'ma kwilik, i laut yenggelek andi obakhe tekhogo wulibi wagaukwa.

² Iren he, Musa ombo'ne nikhi logogun o, iluk ima pu hak he, ohena andi a'ma kwigik, i laut yenggelek andi obakhe tegetik, isukwa andi.

³ A'nogo isukwasik, sumburu nenggarek hak, at Allah nen misigat mene elalinhogo wogisugu kwelek, inebe mondogat ninggik,

⁴ i nenggarek hak, misigat mene elalinhogo wogisugu kwelek, inebe mondogat ninggik, ikhi lagaukwa. I andi re, helep Allah nen fesikhe mene elonggoma nen wulifunem ninggi lagaukwa andi. Helep andi ebe re, Kristus aro.

⁵ A'nogo meneat he, it ekhe inebe hokhorogoat Allah oba liok u lek hak welagaukwa andi nen he, o leimo afuni le'ma andoma inoatikhemo inebe warek ya kabok ta kabok isukwa andi.

^6-7 A'nogo hilinglagaikhe andi re, it weak mene inamolorogo hilingitik, ap it mene ekhe inendawinggen tugwi kembu oba himbirik logolik fogeratik, ikhi lagaukwa andi nen hilinglagaikhe andi. It a'nogo hilingiti lagaukwa andi hak, nit a'nogo hilingiti logoinogo iluk, futfikhi logolik komorikhi logouwageluk wene mondogat a'nogo hilinglagaikhe andi. It a'nogo hilingiti lagaukwa iluk, Allah ane lisu yi'nogo palek werek: ”It afuni inunggulenu andi mene nen, sumburu inom, anggur amusu inom, nuogeluk inagaiyegen wuni watik, inagaiyegetik yugunat hilingisuogeluk menlagaukwa,” iluk lisu palogo fesukwa.

⁸ Nen, afuni it mene ekhe pailak fakfisikhi lagaukwama, inebe 23.000 nen mondok hokhorogo misik salim felelenghogoat wa'larik lagaukwa andi hak, nit a'nogo ninoasinogo iluk, a'nogo hilingiti logogun mondok lego.

⁹ Nen, afuni it mene ekhe nen he, ”Nineisena Enupogot a'mage werek nogo?” iluk lalogo hilingiti lagaukwama, kisu aigen palinafi lagaikhemo re, wa'larik lagaukwa andi hak, nit ninoasinogo iluk a'nogo hilingisugun mondok lego.

¹⁰ Nen, afuni it mene ekhe nen pou iluk lagaukwama re, malaikat pogoroba mene inoaterek mene Allah nen lakfei wagaikhemo, afuni inebe hokhorogoat inoatikhe andi hak, nit ninoasinogo iluk, pou-pou enek ugun lego.

¹¹ It a'nogo hilinginafikhemo inoba hilinglagaikhe andi mondogat he, it afuni ekhe futfikhi logouwagelugat hilinglagaikhe. A'nogo hilinginafikhe iluk lisu palogo fesukwa andi, nit yogondak o wurep oba asi wago mene yi, komorikhi logouwagelugat lisu palogo fesukwa.

¹² Andi nen he, hat ekhe hendawimo nen: ”An nendawinggen wurik, mendek welagi o,” iluk anggegen halok he, sanokhogo lagi hanogoluk hafe hebelogo logoino.

¹³ Hit weak hilingisuageluk hinendawimo kagaligeluk wagunem obabut hikhi lagep andi re, nit afuni mondogat ninendawimo kagaligeluk wagunem hogorek hagat hikhi lagebo. Meneat he, Allah nen abok yaganisasikhe higithogoat hilingiteresi'mo re, weak hilingisuageluk hinendawimo kagaligeluk wagunem he, hiren hinendawinggen sebelugun elo'lek mene, Allah nen herakhinobagagi'lek fethinarek logogin o. Hinendawimo a'nogo kagalhu kwelek, hinendawinggen sebelubagaigen iluk, Allah nen wene higithogo yagahisagain werego.

¹⁴ Andi nen he, nerugwi nagaila'lak. Hinebe nendawi e. Tugwi kembu andi wutfuluk inendawinggen oba himbiret fuluk fogeratarek andi mene herakfisaluk heise wulibi we'ni o.

¹⁵ Wene igi andi re, hit hinendawinggen werek mene iluk yagahisikhi lagi. Halok he, an wene igin yi re, hinonggwarek hinendawimo nen futfeino.

¹⁶ Amusu ninggi logolik Allah hai warogo ninggi lago andi re, Kristus amep wulagaisogo watukwa andi ninom hundik welago iluk ninggi lago lek nogo? Nen, sumburu kurogo ninggi lago andi re, Kristus ebe ninom hundik logolik ninebe misigat welago, iluk, kurogo ninggi lago lek nogo?

¹⁷ Nit ninebe mondogaren he, sumburu misigat mene kurogo nonggorek andi hangge ninebe hokhorogo meneat he, misigaro.

¹⁸ Hiren he, it afuni inunggulenu Yahudi mene nen hilingitarek mene, futfeni o. Iren he, Allah anggo ware'luk fena it ninggi logolik, fena endu noletarek oba noleti logolik, Allah inom hundik welagaikharek iluk, hinonggot nogo?

¹⁹ Halok he, nena igin. Tugwi kembu andi ebe mene igin? At anggo waretarek mene kurik andi ebe mene igin? Lego.

²⁰ Wene andi re, ebe yi faget igi. It andi Allah faget waretarek fuk. We, munggwarengge obabut weak mene faget waretarek. Halok he, hit munggwarengge obabut weak mene andi hinom hundik logogun he, an nabit.

²¹ Hit he, ninoe Enupogot agai hinago ninggik, munggwarengge obabut weak mene agai hinago ninggik, ugun mondok lego. Nen, ninoe Enupogot amburu nenggarek oba ninggik, munggwarengge obabut weak mene amburu nenggarek oba ninggik, ugun mondok legaro.

²² Ninoe Enupogot a'mage lagauwageluk hilingiti lago andi nailo. At ninom walhamo re, nit ninomame werek nogo? Elo'lego.

”Hit yi mene ti mene hilingiti logolik, at Allah fogerasuogeluk hilingiti logoino,” iluk yagaisasikhe wene

²³ Hit ekhe nen he, ”Yi mene ti mene mondogat he, wesa lek. Fano nek,” iluk egep andi, eberogoat meneat he, yi mene ti mene andi mondogaren ninebe fano asugun fuk. ”Yi mene ti mene mondogat wesa lek. Fano nek,” iluk elok ugun meneat he, mondogat andi nen ninendawinggen wurik asigin fuk.

²⁴ Yi mene ti mene hinonggwarek faget esinet fikhi logogup. Athe, it afuni ekhe faget esinet fikhi logoino.

^25-26 Allah ane lisu palogo fikhi logolik he: ”Kweang yi inom, yi mene ti mene kweangma welagarek mene inom, eisewerek he, ninoe Enupogot aro,” iluk lisu palogo fesukwa andi nen he, yi wam ti wam kurik onggo wanharek oba were'ma, yi'nogo hilingita mene, iluk heinok wokhaluk hinendawinggen enggin asinogo iluk hinobakhe nene hesangge onggo palogo nogoin o.

²⁷ Nen, it afuni ekhe inendawinggen Allah oba himbiret figi'lek mene nen sumburu isago nuogeluk hinayonggo fugunem, hit hinendawimo nen logoin iluk lagep halok he, yi mene ti mene isago fogoin mene wokhisugu halok, hinendawinggen enggin asinogo nen he, ”Yi an nagain mene a? Lek mene a,” iluk heinok inoba wokhigi'lek nogoin aro.

²⁸ A'nogo meneat he, it ekhe nen he: ”Yi tugwi kembu anggo wata mene kurik,” iluk yagahisugu halok he, at yagahisikhe mene andi ebe faget, endawinggen faget, nagubo.

²⁹ A'nogo igi andi re, hit hinonggwarek hinendawinggen enggin asugun mene faget igi fuk. At ekhe yagahisagain mene andi endawinggen enggin asigin mene faget igi o. Mene re, hit ekhe nen he, ”An yugunat nagain werek kwelegat he, at andi endawinggen enggin asinogo iluk an ninggi'lek kamo igin andi nenahalok?

³⁰ An Allah hai warogo nunggunem he, andi faget nabok nenahalok palugun nogo,” iluk ikhi lagep andi nen he,

³¹ an nen yi'nogo yagahisak. Sumburu inom, i inom ninggik, yi mene ti mene hilingitik, a'nogo mondogat ikhi logolik he, afuni nen Allah fogerasuagelugat hilingiti logoino o.

³² Afuni Allah againafuri mene inom, nen, it Yahudi mene inom, Yunani mene inom inendawinggen Yesus oba himbiret figi'lek mene inom, weak asinogo iluk hinobabut higithogo hilingiti logoino o.

³³ Hit hinobabut he, an hilingitirek hak hilingiti logoino o. An he, yi mene ti mene hilingiti logolik he, nonggwarek fanorakhageluk hilingitirek lek. We, afuni inebe hokhorogoat faget fano hilingitunem Allah nen telinabuageluk hilingiti lagi o.