1 KORINTUS 1 - Allah Wene Fano Wene Hupla Inane

Hai warinafikhe wene

^1-2 Hit Allah againafuri o Korintus andogoti lagep mene, nerugwi nagaila'lak. An Paulus Allah endawimo anggasikheba, Kristus Yesus nen nayonggo fesikhesik laknobagai wagaikhe mene a'nogo, ninagailak Sostenes nemberegen, wene yi lisu palogo hinoba lakfei wago andi. Hit o Korintus mene Allah nen hinayonggo fesikhemo ninoe Kristus Yesus hinom hundik were'ma, Allah nen, ”It yi an nagainafuri o,” iluk hinebe at onggwarek faget tegelogo fakhasikhemo welagep. A'nogo logolik, afuni o yi awi ti awi andoma nen, it inom, nit inom, ninoe Enupogot Yesus Kristus enu hombuk pali'lagwi mene hinom mondogat wene yi lisu palogo hinoba lakfei wago andi o.

³ Nineisena Allah, ninoe Enupogot Yesus Kristus emberek inobabut fano a'nogo nen, fano mene wokhisigik, hinendawinggen hambugethinafik, ikhi logouwago.

Allah nen Yesus alisikhogo fano hilingninaferek wene

⁴ Allah obabut fano nen, Kristus Yesus alisikhogo, fano mene wokhisikherek andi nen, hundik-handik hai wato mondok welagirego.

⁵ Hit Kristus hinom hundik were'ma Allah nen hinebe kainethinafemo welagep. A'nogo logolik, yi wene ti wene Allah ane andi ero hinelu mondok agepsik he, wene fano mondok yagaisikhi lagebo.

⁶ Wene andi re, Kristus hilingitikhe wene yagahisasigi mene, hinendawimo wanhigipsik hinendawinggen wurigagepsik welagebo.

⁷ Hinendawinggen a'nogo wurikhogo logolik, ninoe Enupogot Yesus Kristus weinamhogo wesigin iluk, nenangorogo logolik he, Allah nen wo'nisikherek mene andi, ekhe wanhi'lek welagep fuk. We, mondogat wanhigipsik welagebo.

⁸ Hobuk wurep oba ninoe Enupogot Yesus Kristus wesigin andi sambul, hit weak were'ma hisa wesinogo iluk, at Kristus nenat hinendawinggen wurigethinafi logogin o.

⁹ At Allah nen amlogo ninoe Enupogot Yesus Kristus hinom hundik logobagaigeluk hinayonggo fesikhe andi. A'nogo, at obabut humbun mene nen hinayonggo fesikhe andi nen he, ebe asigin iluk hinendawinggen menenei ebeti'lek humbunhogo logoni o.

”Allah againafuri mene inebe minggilugun lek,” iluk yagaisasikhe wene

¹⁰ A'nogo meneat he, nerugwi nagaila'lak. Ninoe Enupogot Yesus Kristus enuba, wene ekhe komothinabik. Hit mondogat hinebe minggilhi'lek hai warogo logolik he, hinane misigat mene igik, hinendawinggen misigat welagik, hinendawimo nen wene misigat mene ebetik, ikhi logoino.

¹¹ Nerugwi, nagaila'lak. Wene a'nogo igi andi re, afuni he Kloe were'ma nen wagaikhasik he, yi'nogo agama: ”It-irat wene pali'lagwi o,” iluk fakhogoat yaganesi wagaikhama nen yagahisigi o.

¹² Wene ebe re, mel ikhi lagep andi faget igi. Hat ekhe nen he, ”An Paulus ebikhit,” ugunem he, hat ekhe nen he, ”An Apolos ebikhit,” igik, hat ekhe nen he: ”An Petrus ebikhit,” igik, hat ekhe nen he: ”An Kristus ebikhit,” igik, hinane hunogo tomok ikhi lagep andi nen igi o.

¹³ At Kristus andi ebe minggilogo alek-alek hilinglagama nen a? I a, athe, hit faget an Paulus nebe eba mennobagaluk noatukwama nen a? I a, athe, an Paulus nenu hombuk palogo nen ima pelakhinafukwama nen a.

¹⁴ Lego. An nen he, hit ekhe ima pelakhinafi'lek anggigi. We, at Krispus inom, Gayus inom, emberek andem enek ima pelaginafigi iluk, Allah hai wati lagi o.

¹⁵ Afuni nen he, ”Paulus onggwarek enu hombuk palogo ima pelaginafikhe,” iluk inogo iluk he, inebe andem enek pelaginafigi andi.

¹⁶ O! An nen Stefanus againafuri inom ima pelaginafigimoat higi. A'nogo meneat he, it ekhe pelaginafigi he a? Lek he a. An nonggoro.

¹⁷ At Kristus nen he, an nen afuni ima pelaginafi logouwageluk laknobagai wagaikhe fuk. Lego. We, Allah ane fano wene andi yagaisilik nikhi logouwageluk laknobagai wagaikhe o. At ebe eba menfuluk watukwa a'nogo alomat lasinogo iluk he, an afuni inawene mene kagalogo agarek andi hangge ikhi logouwageluk laknobagai wagaikhe lego.

”Allah awene kagalek wene re, Yesus ebe andi aro,” iluk yagaisasikhe wene

^18-19 It afuni nongasugun mene nen he, mel agarek: ”Yesus watukwa wene andi re, afuni kembu mene nen agarek hangge ili'lagwi o,” iluk agarek andi. A'nogo meneat he, at Allah nen he: ”Afuni inendawimo kagalek mene nen wene kagalogo agarek andi, An nen nonghonget inobagagin o. Nen, afuni inambugunweak mene nen nambelalweak hilingitarek mene andi, An nen legetfisagain o,” iluk isikhemo lisu palogo fesukwama werek andi nen he, nit telninabi'logo mene nen he, ”Wene andi re, Allah omame andi aro,” iluk ogorek.

²⁰ Afuni inendawimo kagalek mene andi inom, afuni yi wene ti wene ero inelu mene andi inom, afuni wene palhi logolik inane omame agaikharek mene andi inom, we, tulemat werego. At Allah nen he, ”Afuni inawene inendawimo kagalogo agarek mene andi re, afuni inendawinggen wenggelek lek mene nen agarek hak ili'lagwi o,” iluk isikhe lek nogo?

²¹ At Allah endawimo mondok kagalek andi nen he, mel isikhe: ”Afuni kweangma mene nen, inonggwarek inawene kagalogo agarek andi nen he, an nebe inelu asugun elo'lego. We, it ekhe nen wene ebe wene yagaisilik nugunem, it afuni kweangma mene nen anggikhi logolik he, Wene andi afuni kembu mene nen agarek hangge ili'lagwi, iluk ugu kwelegat he, it ekhe nen, wene andi eberogoat, iluk anggogoin mene halok he, an nen telinabigin aro,” iluk oba liok isikhesik onggwaregenat isikhe.

²² It afuni Yahudi mene nen ikhi logolik he: ”Wene futfouwogen he, elalin mene ekhe hilingi'ni o,” igik, it afuni Yunani mene nen he: ”Wene hinendawimo kagalogo ekhe yaganisani o,” igik, agarek meneat he,

²³ nit enek he, Kristus eba menfuluk watukwa wene a'nogoat yagaisikhi lago. Yagaisugunem he, it afuni Yahudi mene nen, ”Wene andi weak,” iluk obokhogo herakfisigik, nen, it afuni endakwe mene nen he: ”Wene andi, afuni kembu mene nen agarek hangge ili'lagwi,” iluk hebisigik, ili'lagwi o.

²⁴ A'nogo meneat he, it afuni Yahudi mene inom, Yunani mene inom, Allah nen inayonggo fesikhe mene nen he: ”Allah omame Kristus ebe andi aro. Nen, Allah awene kagalek wene, Kristus ebe andi aro,” iluk futfili'lagwi.

²⁵ At Allah awene meneat he, it afuni kweangma mene nen he: ”Wene andi, afuni kembu mene nen agarek hangge,” iluk agarek meneat he, at Allah endawimo mondok kagalego. Nit afuni ninawene mene ninendawimo kagalek ogorek andi, ninendawimo wenggelek lek mene nen ogorego. It afuni kweangma mene nen he, ”At Allah omame lek,” anggagarek meneat he, at omame hokho o. Nen, nit afuni nen he, ”Ninomame hokho,” anggogorek meneat he, lebelego.

²⁶ Nerugwi nagaila'lak. Hinebe ninggi'nogo were'ma Allah nen hinayonggo fesikhe nogo? Hinendawimo ebe'ni! Afuni hit mene inendawimo kagalek mene inom, inomame werek mene inom, kaindek inenu werek mene inom, inebe hokhorogoat inayonggo fesikhe fuk. Lego.

²⁷ At Allah endawimo nenat he, it afuni kweangma mene inendawimo kagalek mene andi, inenggali wasigeluk he, afuni nonghongsek meneat wenagaisogo inayonggo fesikhe. Afuni inomame werek mene andi, inenggali wasigeluk he, it sebelek mene wenagaisogo inayonggo fesikhe andi.

²⁸ At Allah endawimo nenat he, afuni kweangma mene nen fogerati logolik esinet fagarek mene andi, legetfisageluk he, it afuni kweangma mene inendawimo nen he, ”It andi inebe re kembu, inabit mene, inenu re lek,” iluk anggagarek mene andi re, Allah nen wenagaisogo inayonggo fesikhe.

²⁹ Andi nen he, nit afuni ninonggwaregen Allah eilhanem fogerakhogoin lego.

³⁰ At Allah nenat hit Kristus Yesus hinom hundik logobagaigeluk hinobagaikhemo welagep andi. Wene ninendawimo kagalogo logou hak he, Yesus ebeat wo'nisasikhe. A'nogo wo'nisasikhemo, aren he, Allah ninom hobuk ninambotkwe lambulogo ninobagagik, ninebe Allah faget ninobagagik, telninafik, ikherek.

³¹ Andi nenat he, Allah ane lisu palogo fikhi logolik he: ”Afuni nen yi mene ti mene faget fogerakhouwogeluk halok he, ninoe Enupogot hilingitikhe andi faget fogerasugun o,” iluk isukwama lisu palogo fesukwa.