1RAJA-RAJA 7 - Allah Wene Fano Wene Hupla Inane

Salomo onggwarek awi wurasikhe wene.

¹ At Salomo nen onggwarek ebe werek oba faget awi istana ekhe wutikhe. O andi wutu kwelek enek he 13 tahun hilingitikhe.

^2-3 O istana wutikhe mene andi senggelek misik ekheba re at Salomo nen enu, ”Ambe Libanon Ogoi,” iluk salhikhe. O andi ilirenggerek welagaikhe mene re: Uankwe re 44 meter nen, nunggulik horokwere 22 meter mot liabek he 13,5 meter en hilingfesikhe. O hokho awi andi fesengge liabek menere e o Libanon agayo omanogo mene e ebe henagan meneba liagaisogo wutikhe. Amboloba re e andi higit meneat wut fesukhesik he sumbun a'nogo bene salfesikhe.

^4-5 O hobat pikhit fikhit inom hare fikhit inom he jendela folelek ma re, o hobat misik ekheba re huli henagan erathigik were'ma re o hobat ekhe fena fikhit meneba elokhe misi'mo wuthigik kwelabek welagaikhe. Kwe sou inom jendela to'morek mene inom, unggut uanhogo re 4 en higik wutukwa.

⁶ At Salomo nen ogore o elonggo hokho mene ekhe enu re, ”Ambe O Fesengge,” andi wuti logolik he, uanhogo re 22 meter en, nen nunggulik he 13,5 meter en hogo wutikhe. O hokho mene andi solombonma re ambe e fesengge hakhogo liagaisogo pelarogo hilingik welagaikhe.

⁷ O elonggo hokho mene ekhe enu re, ”Ambe Tahta” ikhi lagaukwa, nen enu ekhe re o elonggo afuni inawene pilingituba u hak, ”Balai Pengadilan” andi wutikhe. O wutikhe mene andi tik watikhe mene oba nen pikhit sumbun palhikhe huli andoma re e laik o Libanon mene omanogoba mondok saplirogo wutikhe. O ambe andiba nen at Salomo nen yi wene ti wene katokhogo nek tegeti lagaikhe.

⁸ At Salomo ebe were'ma ogore o amu mene wurik andoma higit wuri'mo re o ambe wene katokhogo tegetuba andi nen ambol fikhit andoma welagaikhe. Nen at agwe, he hun raja Mesir mene a'logo a'nogo faget ogore at Salomo nen he o higit mene at ekhe wutikhe.

⁹ O wutikhe mene andi mondogat he, O senggelek ambe hokho mene a'nogoet engge, anduli tik watikhe meneba nen pikhit tum palhikhe huli andoma re helep mondok fano meneba nek wutikhe. Helep andoma ebe re tom helep mene serelogo hilingitarek oba omanogo nen ilirengge walhogo hilingitukwa. Nen helep andoma abel endakwe fikhit inom elonggokwe fikhit inom he gergaji ba pugunhogo palhigik hilingitukwa.

¹⁰ O andi tik pelagaisogo fesukwa mene re, helep hokhondek mene onggo mondok hokho meneba nek wutukwa. Helep andoma ilirengge ekhe re 3,5 meter en nen ekhe re 4 meter en hilingik meneba wutukwa.

¹¹ Helep andoma amboloba re helep amu mene ekhe onggo hokho meneba ilirengge walhigik wutukwasik he, e laik o Libanon mene omanogoba te'methigik wurik lagaukwa.

¹² O hobat hun Salomo ebe werek oba andi faget inom, o Tuhan Awi elonggoma a'nogo inom, o ambe hokho mene Tuhan Awi a'nogo era'lu werek mene a'nogoba inom he, helep sap henagan oba saplirogo wuri'mo re amboloba re e laik o Libanon agayo omanogo mene sap misik wurik welagaikhe.

Hun Hiram en o Tuhan Awi a'nogo elonggolokwe tugetikhe wene

^13-14 O kota Tirus andiba re ap ekhe enu Hiram welagaikhe. Hun andi re yi wene ti wene no perunggu meneba nen halharek mene elu pelurek agun welagaikhe. At eisena ogore o Tirus agun yi mene ti mene no perunggu meneba elalharek mene mondogat elu welagaikhe. Agaisa re unggulenu Naftali mene. At raja Salomo nen he hun Hiram andi ebe waluk yabu perunggu hilingisuogeluk hilingitarek oba andoma inoe kepala logolik melalinafi logouwageluk afuni ekhe inomat inayonggo fesikhesik lakfisasikhe. A'nogo lakfisasikhemo at Hiram a'nogo at Salomo nen kino isikhe mene a'nogo hilingisigiluk wagaikhe.

Tiang pire hokho mene no perunggu meneba hilingisogo menfesikhe wene

¹⁵ At Hiram en tiang pire perunggu meneba wutikhe andem ebe lombok mot liabek he 8 meter en, nen maserogo kwelabek welagaikhe mene re 5,3 meter en, nen ambumsek welagaikhe menere 7,4 sentimeter en hogo wutikhe. Tiang mendek mene andem elonggoma re agauwelerek welagaikhe.

¹⁶ Tiang pire andem unggulmo sebelek mene faget he ebe lombok no perunggu mene pire hilingisogo uanhogo re 2 meter en hilingfesikhe.

^17-20 Owil-owilengge mene ilirenggerogo hilingi'mo re, uanhogo liabek he 1,8 meter en. Tiang mendek mene andi ebe lombok he e delima enggen ilirenggerogo pire erarogo fesukwa. Tiang andem ebe lombok oba re e delima enggen ebe 200 nen mene ilirenggerogo fesukwa. A'nogo ilirenggetukwasik at Hiram nen he senggan perunggu meneba ikfesikhesik he tiang mendek mene aremnogo ambolebene filik lagaikhe. Tiang mendek mene andem ambolebene ebe lombok inom, senggan ugu mene a'nogo ambolebene inom he talengge maserek engge ekhe fesikhe. Nen talengge maserek engge a'nogo ambolebene re

^21-22 owil-owilengge ilirenggerek mene a'nogo re, e aremnogoba hundik welagaikhe. A'nogo ilirenggerogo fuluk he tiang pire aremnogore o Tuhan Awi kwi laguba solombonma omanogo fesukwama, ekhe re abel a'ma selatan fikhit welagaikhe, nen, ekhe re abel ambolkwe utara fikhit welagaikhe. Nen, eil a'ma selatan fikhit welagaikhe mene a'nogo enu re Yakhin. Nen, abel ambolkwe utara fikhit mene a'nogo enure Boas,” iluk salogo fesikhe. At Hiram en tiang wutu aple a'nogo arat wut fesikhesik enu mondogat salogo fesikhe andi.

Waruk hokho mene no perunggu meneba wutukwa wene

²³ Andi nen at Hiram en he waruk obakhe hokho mene no perunggu meneba abuk-abuk waganogo hombonurogo wutikhe mene ilirengge waletikhe mene re yi: Elonggo elere 2,2 meter tulem hulirek welagaikhe kwe re 13,2 meter en.

²⁴ Agap endakwe esanggokwe omanogo re hobut enggen hangge mene re asiok pire ilirenggerogo hilingitikhesik he, waruk a'nogo hilingisogo kwelakfesikhe.

²⁵ Waruk a'nogo sapi perunggu mene ebe 12 nen hilingisogo inambot oba fesukwama re, henagan he abel ambol kwe utara fikhit nen, henagan ekhe re abel a'makwe selatan fikhit, nen henagan ekhe re mo ero fikhit, nen henagan ekhe re mo ubuk ikherek fikhit inelokhe halhigik hilingisogo fesukwama welagikhe.

²⁶ Waruk andi ayogouk wulim sek welagaikhe mene re 75 milimeter en esanggo kwe re waruk i hinatu mene sumbukhogo wulibik hak owil-owilengge higit-hagathogo hilingik welagaikhe. Waruk andi re i 40.000 liter en hinasu hangge mene wutikhe.

Kereta perunggu meneba wutikhe wene.

²⁷ Andi hilingfesikhesik he, at Hiram en kereta perunggu mene ekhe ebe 10 nen wutikhe, kereta andem ebe lombok uanhogore 1,8 meter nen, nunggulik he 1,8 meter en, mot liabek mene re 1,3 meter en hilingfesikhe.

²⁸ Kereta andem he e kagalek mene unggut sebelhungge nen perelogo hilingfesikhe.

²⁹ E kagalek mene andem ebene re no singa inom, sapi inom, kerub inom ilirenggerogo re hesesengge wokfesikhe. Wurep perelek engge omanogo bene ambol kwe mene inom a'ma kwe mene inom he singa inom sapi inom ilirenggerogo fesikhe oba nen he, andi re ilirengge hesesengge wokfesikhe mene andem owil-owilengge hilingik aplerogo nek hilingfesikhe.

³⁰ Kereta andem ebe lombok eisok masetungge 4 en aremnogo ogore no perunggu meneba hilingfesikhe, andi nen eisok lego mene aremnogo ogore perunggu meneba nek hilingfesikhe. Kereta andi unggut 4 en aremnogo ebene re waruk ebe agorek mene perunggu meneba agap endakwe fikhit he owil-owilengge ilirenggerogo hilingfesikhe.

³¹ E agorek mene aremnogo ambolebene re waruk agorek logouwageluk e wurep sebelogo maserogo hun fesikhe. E agorek mene andem ambol he 44 sentimeter en, nen kagalek mene unggut hilingik mene a'nogo ambol talek oba re 22 sentimeter en abel a'ma fikhit welagaikhe. Unggut hilingik mene a'nogo ambeba re hesesengge waganek mene ekhe welagaikhe.

³² Eisok masetungge aremnogo liabek uanhogo re 66 sentimeter en, nen ebe re e kagalek mene a'ma fikhit fesukwama welagaikhe.

³³ Eisok pirim hugu mene andoma re kereta weim yabuogeluk lagaluk lagaikharek andoma hangge hilingik welagaikhe, eisok maserek mene inom, enggi segelet inom, ebe lego mene inom, enggi segelet andoma erokwe inom, abirengge andoma re no perunggu meneba nek hilingik welagaikhe.

³⁴ Unggut andem higithogo kereta a'nogo a'ma fikhit he e 4 en agorek welagaikhe. A'nogo were'ma, e agorek mene andem he kereta ebe a'nogo inom misik hundik welagaikhe.

³⁵ Kereta a'nogo ambolebene maserogo andoma ayogouk endakwe fikhit wulibik welagaikhe mene re 22 sentimeter en. E agorek mene aremnogo inom, nen e kagalek mene aremnogo inom he, kereta a'nogo inom misik seberek mene hak welagaikhe.

³⁶ E agorek mene inom, e kagalek mene inom, andoma bene mondogat he, kerub ilirengge inom, singa ilirengge inom, e lua hak mene palem inom he, obuluk selek sekwe omanogo haningisogo ilirenggerogo hilingi'mo re, era'lu kwe re owil-owilengge nen hukhogo kwelabek welagaikhe.

³⁷ Kereta a'nogo wutukwa mene andoma lambukhogo re, ebe obabut hilingik mene inom, unggut ilirenggerek mene inom he higithogo nek ilirenggetukwa.

³⁸ Hiram en he, waruk hokho mene 10 nen ekhe hilingitikhe. Waruk andem he kereta aremnogo ebe higithogo faget. Waruk andem ebe lombok huli-huli tulem kwe hilingik welagaikhe menere 1,8 meter hilingi'mo re, i re 800 liter en keralu hangge welagaikhe.

³⁹ A'nogo hilingfesikhesik at Hiram en he, kereta aremnogo fuaben fena re abel a'makwe selatan fikhit fesikhe, nen fuaben fena re abel ambol kwe utara fikhit fesikhe. Waruk perunggu mene hilingik a'nogo re pikhit kwe hilingi'luk harekwe hilingi'luk tulem tenggara fikhit unggutmo andoma fesikhe.

O Tuhan Awi andi elonggoma yi mene ti mene fougeratukwa mene enu palogo fesukwa wene

^40-45 At Hiram en he kuali inom, sekop inom, i hinagaisogo nunggu mene inom hilingitikheat. Andem mondok hilingitikhemo nek he yabu aren raja Salomo faget inom, o Tuhan Awi faget inom hilingitikhe mene a'nogo arat kobokhogo hilingitikhe. Aren hilingitikhe mene andoma mondogat enu re yi: Tiang pire hokho mene andem inom he, tiang pire andem ambisangma sebelek mene mangkok ilirenggerek mene hilingisogo fesukwa mene andem inom he, Senggan posiemanggen mene tiang mendek mene aremnogo unggulkwe lombok fesikhe mene inom. Delima enggen perunggu mene 4.000 nen mene re pire erarogo senggan igisogo tiang pire mendek mene aremnogo unggulmo fesikhe mene inom. Kereta 10 nen inom. Waruk hokho mene 10 nen inom. Waruk kweang oba perunggu mene elalek engge inom. Sapi perunggu mene 12 nen engge waruk andi lego mene inom. Kuali, sekop, mangkok inom hilingitikhe. Yi mene ti mene o Tuhan Awi andi faget at Hiram en raja Salomo obaget wutikhe mene andoma re, no perunggu meneba nen enek hilingitikhesik abulal waganogo hothunem en he amulit weak hilinglagaikhe.

⁴⁶ At raja nen yi mene ti mene hilingisuageluk yagaisasikhe mene andoma re waruk mene kabogetunem o Sukot en hilingi'luk Sartan Yordan tonggoma nen hilingi'luk tulem andoma nen hilingitukwa.

⁴⁷ Yi mene ti mene no perunggu meneba nen hilingitikhe mene andoma re, ebe mondok hokho pokhorogo hilingi'mo re enggin walhoageluk at Salomo nen yagaisasikhe lek. Andi nen he, yi mene ti mene andoma enggin he inonggot welagaukwa.

^48-50 Andi nen at raja Solomo nen he o Tuhan Awi a'nogo faget yi mene ti mene amu mene emas meneba hilingisuageluk yagaisasikheat. A'nogo yagaisasikhemo hilingitukwa mene re yi: Mezbah inom, meja roti Allah faget fugu mene inom, esage eisok 10 nen engge o Ambe Mondok Horek oba a'nogo solombonma fesukwa mene andem he fuaben mene re selatan fikhiren fuaben ekhe re utara fikhit fesukwa mene inom, owil-owilengge inom, esage inom, hambongge inom, iwak inom, esage nagulhungge inom mangkok inom. piring amben-amben engge faget inom, piring endu enggen logetu mene faget inom, engsel Kwe Ambe Mondok Horek oba a'nogo faget inom, kwe O Tuhan Awi a'nogo endakwe fikhit mene faget inom hilingitikhe.

⁵¹ At raja Salomo nen Tuhan Awi a'nogo mondogat wut fesikhesik he, o andi elonggoma ambe yi mene ti mene fugu mene faget a'nogoba yi mene ti mene perak inom, emas inom ekhe amu-amungge at eisena Daud en wogetikhe mene omanogo inom fesikhe.