1RAJA-RAJA 6 - Allah Wene Fano Wene Hupla Inane

At Salomo nen Tuhan Awi a'nogo wutikhe wene

¹ A'nogo tegelogo fesikhesik, it afuni inunggulenu Israel mene o Mesir herakfuluk wulibi wagaukwasik oba nen tahun 480 huli welagaukwasigen, at Salomo ebe raja agaikhesik 4 tahun ferinarek welagaikhesik, tugi it inenggi wenati lagaukwa higithogo attak wenarik, ekhe it inaneba tugi enu Ziw ikhi lagaukwa mene andiba nineisena Tuhan awi andi wusigiluk attak-attak eroratikhe.

² Eroratikhesik Tuhan Awi a'nogo wusigiluk, ilirengge elonggokwe walhasikhe mene re yi: Uan kwe re, 27 meter, nen horokwe re, 9 meter, nen o hulu talekwe re, o tum palek huli, 13,5 meter.

³ Nineisena Tuhan Awi andi solombon uankwe elugun higithogo re 4,5 meter, nen horokwe re o ebe higithogoat 9 meter en.

⁴ O andi hobat oba nen he oselek faget jendela yafo-tafo folelogo endakwe nen elonggoma anggwerogo kwelakfesikhe.

⁵ O andi ambotkwe walingisogo hobat endakwe andoma re ambe palogo pongge-mangge senggelhigik wutikhe. Senggelek andoma amu-amu liabek uanhogo re 2,2 meter en higik wutikhe.

⁶ Nen, huli attak mene andiba re, senggelek andoma ebe lombok elonggo wogologore 2,2 meter, nen huli pirenek meneba re 2,7 meter en, nen huli henaganek meneba re 3,1 meter en. Nen o hobat fem a'ma mene andiba re ambumeakhogo wutikhe meneat he, ambolkwe meneba re endebat serapel weakhogo wutikhe. Ma re e ongge oba tiphogo iluk wutikhe mene andi re o Tuhan Awi a'nogo o hobat oak a'nogoba anggwe tilong folelhi'legengge hun fesikhe.

⁷ Helep o Tuhan Awi wusugun mene andoma re o helep serelhi lagaukwaba andoma nenat agauwak fanorogo halogo fugunem a'luk he, o ebe wusuogeluk wutunem andoma martelu abolok ogo, posiemanggen abolok ogo, athe o wutungge we nena mene abolok ogo ekhe ugunem inesanggo holhi lagaukwa mondok lek.

⁸ Kwe o hulu sap attak meneba kugukwe re Tuhan Awi andi esanggo fikhit folel fesikhe. O andemen he kwe pela maserogo o sab ambolkwe pirenek meneba liak fesikhe. Andi nen sab pirenek mene andiba nen kwe pela maserogo re o sab henaganek meneba liabek welagaikhe.

⁹ O Tuhan Awi fogerati logogun oba a'nogo mondogat wutfesikhesik he, e aras meneba nek balok inom papan inom mondogat laberogo wutikhe.

¹⁰ O ebe obaluak meneba nen esanggo fena-fena maserogo wurogo o Tuhan Awi wurik a'nogoba hundik mene andoma mondogat he e aras meneba nek seberogo wutikhe. Nen o oba tokhogo wutikhe andi mene senggelek omanogo ebe lombok legeisogo uanhogo re 2,25 meter en wutikhe.

¹¹ A'nogo wutikhemo, At nineisena Tuhan nen Salomo mel yagatikhe:

^12-13 ”An nen he, yi'nogo hilingi'no, iluk komothinafigi mene andi, haren mondogat hologo hilingisigin halok he, An nen heisena Daud yagati logolik, yi'nogo hilingisigin, iluk wene waretigi mene andi, ebe hat faget hilingisigin o. Haren An nawi afuni Israel mene inanggele'ma wuten yi, An nebe inanggele'ma logolik, it herakfisaluk wele'ma lagain mondok lego,” iluk yagatikhe.

Tuhan Awi a'nogo elonggokwe yingge-tingge laberogo wutikhe wene

¹⁴ At Salomo nen Tuhan Awi andi eil hondologo wutikhe re, yi'nogo:

¹⁵ O hobat elonggo fikhit mene mondogat he e laik o Libanon meneba mondok sablithigik ohulumo nen pikhit o tum palek huli wutikhe. Nen, o hulu re, e sin hangge mene talhikhe.

¹⁶ Nen, o andi elonggoma nen, o ebe ambol fikhit andoma re ambe ekhe e laik hangge meneba hulirogo ohulumo nen he tum palek huli wutikhe. O senggelek andi enu re Obalik Mondok Hore'ma, ebere elonggo hilingik higithogo 9 meter hangge wutikhe.

¹⁷ Nen, o senggelek Obalik Mondok Hore'ma a'nogo elokhe fikhit andi re enu Obalik Hokhoma ikhi lagaukwa, nen elonggo elere, 18 meter wutikhe.

¹⁸ O andi hobat elonggoma hulithigik wutikhe mene andoma re e laik o Libanon mene omanogo meneba sablithigik wutikhemo re helep o pakot hulirogo wutikhe mene omanogo re hinago welagaikhe. E sablithigik wurik welagaikhe mene andoma ebene re alilingge no hobut hangge inom owil-owilengge ket mene hangge inom ebene hesesengge wokhigik wutikhe.

¹⁹ O senggelek Mondok Hore'ma andi re Tuhan Awi senggele'ma andoma peti nineisena Tuhan nen wene warogo wo'ninafikhe, iluk hilingik a'nogo feigiluk obuluk hilingitikhe.

^20-22 O senggelek Mondok Hore'ma andi uankwe inom horokwe inom liabek mene inom he 9 meter inom higit enek welagaikhe. Wam, yi mene ti mene Allah faget warogo noleti logogun oba Obalik Mondok Hore'ma andi re, e enu cemara o Libanon mene omanogoba nek wutikhe. Kwe ambe andiba re posiemanggen emas meneba labethigik wutikhe. O Tuhan Awi andi elonggokwe mondogat inom o senggelek Mondok Hore'ma andi inom, wam, yi mene ti mene Allah faget warogo noletukwe obalik hilingik andi inom, ebene re emas fano meneba nek labethigik wutikhe.

²³ A'nogo wurogo fesikhesik, o senggelek Mondok Hore'ma andi re e zaitun meneba kerub pire mene inalik hilingisogo inoagese emberek higithogoat 4 meter 40 senti hilingisogo fesikheat.

^24-26 Inebe inom, inoagese inom, inobakhe inom he, uan horok he lek, we, emberek higithogo nek hilingisogo fesikhe. Emberek inogolabi werek enek. Inogolabi lombok uan he, 2 meter 20 senti. Emberek inamu-inamu hilingisogo fisasikhe mene, inebe lombok inogolabi ekhe elugun ekhe elugun, 4 meter 40 senti huli nen hilingik welagaikhe.

²⁷ Ilirengge hilingik andem he, o senggelek Mondok Hore'ma a'nogo at ekhe ogolabi o hobat fenaba tiphogo, nen at ekhe ogolabi ogore hobat fenaba tiphogoat, nen tulem he at ekhe ogolabi nen at ekhe ogolabi seneti lagaikhe.

²⁸ A'nogo fesikhesik, kerub inalik hilingik pire andem inebene re, emas meneba laberogo fesikhe.

²⁹ A'nogo fesikhesik, o Tuhan awi wurik andi hobat ebene mondogat he elokhe fanorogo alilingge, kerub alik hilingitik, e kelapa hangge mene inom, e owil ukhalek mene hangge inom hilingisogo fesikhe.

³⁰ Nen, o senggelek andi mondogat he emas mene laberogo fesikhe.

³¹ O senggelek Mondok Hore'ma andi ebekhe kuguba re, kwe sou pire e zaitun meneba hilingisogo fesikhe. Kwe sou elugun ambol kwe meneba re, tulem sumbukhogo ele'lagat waganogo 5 ba wokhigik wutikhe.

³² Kwe sou pire andem ebene re alilingge no kelapa hangge mene inom, owil-owilengge ukhalek mene hangge meneba inom wokhigik wutikhe. Kwe sou inom, kerub ilirengge inom, kelapa hangge mene a'nogo inom, mondogat he no emas meneba nek labethigik wutikhe.

³³ O senggelek elokhoma mene kwe sou hokho meneba kwi laguba andoma re, kwe sou wurep sebelogo iluk he e zaitun mene uanhogo re unggut enggaminogo hilinghigik meneba liakfigik, nunggulik lakfigik isikhe.

³⁴ A'nogo hilingitikhesik, kwe sou pire e sin hangge meneba kwe hutik yagatik ikhi logolik, eindep sithigik pisathigik, ikhi logogun mene hilingisogo fesikhe.

³⁵ A'nogo hilinghigik fesikhesik, kwe sou andem elokhe fanorogoluk he hesesengge no kerub alik hilingik inom, e kelapa hangge mene inom, owil-owilengge ukalek mene hangge inom hilinghigik fesikhesik he, ebene emas meneba labet fesikhe.

³⁶ A'nogo fesikhesik, o Tuhan Awi andi senggelek endakwe mene a'nogoba haningisogo andoma re, helep sab henagan talogo lakfigik, nen helep andoma ambolebene re e wombi hangge enu cemara o Libanon meneba asiok misigat wutik, sab palhigik e inom helep inom wurik lagasikhe.

³⁷ At Salomo nen o Tuhan Awi andi wusigiluk, aren afuni Israel mene 3 tahun ferinarek welagaikhesik, ekhe 4 oba logolik, tugi it inenggi wenati lagaukwa higithogo, enu Ziw. Tugi pirenek mene andiba werek kwelek o andi tik watikhe.

³⁸ A'nogo watikhesik, wuti lagaikhesik at Salomo nen afuni Israel mene ferinarek 10 tahun welagaikhesik, tahun ekhe 11 meneba ferinarek logolik, tugi it inenggi wenati lagaukwa higithogo, inenggi 7 ba wenatukwasigen ekhe 8 wenati lagaukwa mene tugi enu Pul andiba aren, ”Tuhan Awi andi, ti'nogo wusigin,” iluk anggasikhe higithogoat wurik waga lagaikhesik eil hondologo wutikhe. Tuhan Awi andi wutu kwelek he, 7 tahun hilingitukwa.