1RAJA-RAJA 4 - Allah Wene Fano Wene Hupla Inane

Salomo agoromi pegawai omanogo

¹ At Salomo a'nogo afuni Israel mene mondogat inobaget inoe raja menlagaikhe.

^2-6 A'nogo menlagaikhesik aren agoromi lego mene yabu hilingiti logouwageluk menfisilik lagaikhe mene inebe re yi: imam logogun mene re: Zadok inom, Azarya hun Zadok amlogo a'nogo inom he, Abyatar inom menfisasikhe. Nen negara faget lisu palhu mene re: Hun Sisia againafuri, Elihoref inom he, Ahia inom. negara andiba bendahara logouwageluk he: Yosafat hun Ahilut amlogo a'nogo. O negara andiba tentara inoe kain panglima re: hun Yoyada amlogo Benaya a'nogo. Nen it bupati faget halinafu mene re: Hun Natan amlogo Azarya a'nogo. Nen raja komotu mene re: Hun Natan amlogo imam Zabud andi welagaikhe. Hun raja ailoba elonggoma faget inoe lego mene re: Ahisar. Ap yabu inomamerogo hilingisuageluk kagalek werek mene faget he: Hun Abda amlogo Andoniram andi welagaikhe.

⁷ At Salomo nen he o it afuni Israel mene were'ma kweang o wilayah andomaba mene faget ap bupati inebe 12 nen menfisilik lagaikhe. Menfisilik lagaikhe mo re, it ineabu re: O wilayah kweang it werekwe omanogo tomogen nunggungge at raja faget inom nen at awi elonggoma yabu hilingitu mene faget inom kabogeti lagaukwa. Kabogeti la'luk he, bupati omanogo inebe lombogen he tahun misik oba, tugi hundik-hundik, fei waga lagaukwa.

^8-19 Nen, it bupati inebe 12 nen andem faget he inoe gubernur misik ekhe nen melalinafi lagaikhe. It bupati andem inenu inom wilayah iren melalinafi lagaukwa kwe inom he yi: It Efraim mene inandom kwe andoma faget he: Hun Ben-Hur welagaikhe. Kota Makas, Saalbim, Bet-Semes, Elon, Bet-Hana, faget he: Ben-Deker welagaikhe. Kota Arubot, Sokho, o Hefer oba abirengge faget he: Ben-Hesed welagaikhe. O Dor oba abirengge andoma faget he: Ben-Ahinadab hun Salomo a'logo hele Tafat agun a'nogo welagaikhe. Kota Taanakh inom, Megido inom, o Bet-Sean horokhogo kwe andoma abirengge inom, o kota Sartan horokhogo kwe o kota Yizreel en malikwe selatan fikhit andoma nen hiling-hiling kota Abel-Mehola inom kota Yokmeam inom, andoma faget he: Hun Ahilud amlogo Baana a'nogo welagaikhe. Kota Ramot o Gilead oba omanogo inom, o sili endep-endebengge mene it inunggulenu akhogo Yair mene hun Manasye ambisangmangge mene omanogo inaiba andoma inom, andi nen o Argob Basan oba omanogo inom, nen abirengge re kota ebe 60 nen welagaikhemo re omamerogo iluk he hambugengge inom, no perunggu meneba nunggulik mangge kolok watigik wuri'mo welagaukwa mene andoma faget he: Ben-Geber welagaikhe. O Mahanaim faget he: Hun Ido amlogo Ahinadab a'nogo welagaikhe. It Naftali mene inaiba faget he: Hun Salomo a'logo hele Basmat agun Ahimaas a'nogo welagaikhe. It Asyer mene inawi inom nen o kota Alot inom faget he: Hun Husai amlogo Baana a'nogo welagaikhe. It Isakhar mene inobaget he: Hun Paruah amlogo Yosafat a'nogo welagaikhe. It Benyamin mene inaiba faget he: Hun Ela amlogo Simei a'nogo welagaikhe. O Gilead attak raja Sihon awi Amori mene a'nogo inom raja Og awi Basan mene a'nogo inom, ina'ma welagaukwa kwe omanogo faget he: Hun Uri amlogo Geber a'nogo welagaikhe.

At Salomo nen melalinafunem along welagaikhe mene a'nogo re yi

²⁰ Afuni Israel mene inom Yehuda mene inom inebe re ial i laut esanggokwe hilingik andoma hak hilingik welagaikhe. A'nogo hilingik logolik he it inebe re inamburu inom inagai inom he higithogo nek were'ma it inebe inagaiyekhogo nek welagaukwa.

^21-25 Afuni omanogo ineisok erokwe tomogen he ineabu anggur yabu inom, ara yabu inom welagaikhe. At Salomo eluk werek oba re, raja i Efarat fena fikhit welagaukwa mene omanogo mondok lambukhogo re at Salomo a'ma sebe uluk logolik, nen afuni inunggulenu kerajaan aren melalinafukwe andoma era'lukwe welagaukwa mene omanogo re at Salomo inom hundik were'ma re, afuni Yehuda mene inom, Israel mene inom he, o Dan oba nen he o Bersyeba huli andoma inailo legengge inendawinggen serogo nek welagaukwa. Kweang i Efrat fena fikhiren mo ubuk ikherek fikhit o Tifsah i Efrat aik oba andoma nen he hiling-hiling mo ubuk i lagarek fikhit kota Gaza o Filistin oba andoma nen he o Mesir huli andoma, abirengge re at Salomo nen sebelek welagaikhe. A'nogo were'ma re afuni inunggulenu o andoma werek mene re Salomo a'ma sebe iluk logolik he kweang onggo fei waga lagaukwa. At Salomo nen lingge hundik-hundik nunggu mene faget kabogeti lagaukwa mene re: tepung al mene re 5.000 liter en inom, tepung al inom mene re 10.000 liter en inom, sapi oloba tatu mene re 10 nen inom, sapi leimo tatu mene re 20 nen inom, domba re 100 nen inom, isati lagaukwa. Andem werek kwelek wam rusa inom, kijang inom, kemejangan, unggas, inom andoma.

²⁶ Salomo agoromi sikhe fisogo inap wam kuda ba lagaluk lagaikharek mene re inebe 12.000 nen welagaukwa, nen wam kuda no kereta li'luk lagarek mene re 40.000 nen welagaikhe.

²⁷ A'nogo were'ma re tugi hundik-hundik omanogoba re, it ap bupati omanogo nen inebe hobugalep higik at raja inom it ap hun raja awi silimo nen nunggu mene wogisikhi lagaukwa mene omanogo inom faget nunggungge waluk wagunem he, iren yi mene ti mene werekhogo nek welagaukwa.

²⁸ It bupati omanogo inebe lombogen ogore gandum inom, engga yerami inom, hun Salomo anggo kuda amboloba lagaluk lagu mene inom, nen kereta wut fuluk li'luk lagu mene inom, omanogo faget waluk wogosi waga lagaukwa. Iren he wam en nunggungge andoma o wam aiba omanogo it nunggu mene higiret higik waluk fei waga lgaukwa.

²⁹ Allah nen Salomo ba endawinggen wenggelek mene inom, elu mondok hokho mene inom, endawimo nen winggil wenggel fuluk hilingitu mene inom faget wogetikhe.

³⁰ O kweang mo lagai wagarek fikhit andomaba ogo nen o Mesir en ogore ap misik ogo Salomo enggat agun welagaikhe andi hakhogo ekhe welagaukwa mondok lek.

³¹ At he hun Etan ap Ezrahi mene andi inom, Herman inom, Kalkol inom, Darda inom, hun Mahol againafuri andem inomen hebelek welagaukwa mene re sebelek kwelek he at Salomo nek he o kweang alekwe haningisogo welagaukwakwe andoma mondogaren at enunek lego welagaikhe.

³² Aren he wene inane obalirogo ugu mene re 3.000 nen felalhikhe nen wuni re 1.000 nen pisanhogo ambol kweat felalhikhe.

³³ Aren a'nogo felalhi logolik andoma re e wilibik mene inom, nen yi mene ti mene yago mene inom, e laik o Libanon oba werek mene omanogo bene nen he engga hisop helep unggul kwe wuliferek mene omanogo faget inom, felalu higirenek hilingik welagaikhe. Nen, aren he yi mene ti mene enggi eisok werek mene inom, kweang kwe pololang etungge inom ikan inom, faget ogo ikhi lagaikhe.

³⁴ It raja o kweangma mondogat welagaukwa mene omanogo nen Salomo hebelek mene a'nogo faget inesanggo holuk he, aren ugu mene omanogo inesanggo holi loageluk ap lakfisikhi lagaukwa.