1RAJA-RAJA 2 - Allah Wene Fano Wene Hupla Inane

At Daud en Salomo hilingiti logogin mene faget ane elugun warogo yagatikhe wene

¹ At Daud ebe horogat wa'lasigiluk logolik, amlogo Salomo woletikhemo wagaikhemo re, at hobuk hilingiti logogin mene komorogo nginuk ane mel yagatikhe:

² ”Afuni mondogat lagaikharek oba nebe arat lagain hilinglagama welagi o. Andi nen he, hendawinggen hambukhogo logolik, hailo lekhogo logoino o.

³ Tuhan nen yaganisasikhe mene andiat higithogo hilingiti logoino o. Hat he, we, o koma laluk, yi mene ti mene hilingitunem elok enek aga logouwagaluk, wene Allah nen, yi'nogo hilingiti logoino, ti'nogo hilingiti logoino, iluk wene isa hilingisogo komotninafikhe wene, Musa nen lisu palogo fesikhe mene a'nogo hologo higithogo hilingiti logoino o.

⁴ Andi nen he, Allah nen an yaganeti logolik, haren tagomangge mene inobabut inendawinggen misigat a'luk, an nen, yi'nogo hilingiti logoino, iluk isigi mene nane hologo higithogo hilingiti logogun halok, afuni Israel mene inogogwi inenupogot ap ekhe mene hilinglagi'lek, it mondok logolik, iren ferinarek mondok logogun, iluk An nen wene watheti mene andi ebe tiphogo hilingisigin o, iluk wene wa'netikhe mene andi ebe asigin o.

⁵ Nen, wene ekhe yi yagahesik. At Yoab en an nenu weak hilingisogo ap tentara Israel mene inogogwi, inebe woginarek nikhi lagaukwa mene inebe pire ekhe ap Ner amlogo Abner nen ekhe re ap Yeter amlogo Amasa, inebe hobugalep inoatikhe andi. It inebe pire andi nen weim yafi logolik ap ekhe inoatukwa mene enggen filik inunggulmo re weim yafi'lek, we, lioksek logoligat inoatikhe andi. It emberek andi weak ekhe hilingiti'lek meneat inebe inoatikhemo, aren inoatikhe mene andi, inamep an noba fesikhesi'mo re, an noba enggin welagi andi, hendawimo eberek mondok logoino.

⁶ Andi nen he, namlogo e, at Yoab andi ebe yaman asimbik weat wa'lasinogo. We, harenat hendawimo anggagain mene higithogoat hilingi'no o.

⁷ A'nogo meneat he, ap Bersilai aiba Gilead mene andi againafuri nek he haren hendawirogo logoino o. An hat hoe Absalom en noasigiluk ikhi lagaikhemo, heise lagagisi'mo re, it andi nen inendawirogo hilingnafukwa andi nen he, hinamburu ninggi logolik, fanorogo melagisikhi logoino o.

⁸ A'nogo meneat he, ap Kera aiba ap Benyamin mene were'ma kota Bahurim mene a'nogo amlogo Simei faget wene ekhe yagahesik. An o Mahanaim lagunem, at Simei nen homan mondok weakhogo fanhikhe meneat he, an wagunem i Yordan ima nelokhoma lagaikhemo, an nen yagati logolik, an nen hoasigin mondok lego, iluk nineisena Tuhan enu hombuk palogo yagatigi a'naga o.

⁹ A'nogo meneat he at weak hilingiti'lek, iluk wene oba koti logogun o. Hat hendawinggen mondok kagalek welagen andi an nelu o. Andi nen he, at ebe yaman iluk herakfigi'lek wa'no,” iluk yagatikhe.

Daud ebe wa'lagaikhe wene

¹⁰ A'nogo yagatikhesik, at Daud ebe eisenalak inoba lagaikhemo, ebe warek onggwarek aiba kota andomaat salhukwa.

¹¹ Aren afuni Israel mene 40 tahun ferinarek welagaikhe. O Hebron logolik, 7 tahun welagaikhe, nen o Yerusalem logolik he 33 tahun welagaikhe.

¹² A'nogo welagaikhesi'mo re, Salomo eisena Daud obali'mo raja agaikhesik, at ebe raja logolik omamerogo ferinarek welagaikhe.

Adonia wa'lagaikhe wene

¹³ Linggene ekhe sambul he at Adonia a'nogo he Batsyeba ambit lagaikhemo at Batsyeba nen Adonia ba heinok wokhiki logolik he, ”Hat he an nea wagen mene yi re hendawimo mondok fanorogo wagen a?” iluk isikhemo, at Adonia nen he, ”Io,” isikhe.

¹⁴ Andi nen ekhe inom ane lisogo ikhi logolik he, ”An nen amu aple ekhe nagaisa hat hoba kino yagaheti lagi,” isikhe. Andi isikhemo he Batsyeba nen heinok wokhikhi logolik he, ”Nena mene?” isikhemo,

¹⁵ Adonia nen onggo ikhi logolik he, ”An nebe raja menlasuageluk andi re nagaisa hat ogo helu o, nen andi faget he it afuni Israel mene nen ogo a'nogo a'lep anggili'lagwiat. Oba nen he yogondak aga mene andi re hebekhogo hilinglaga. Tuhan endawimo anggikhi logolik a'nogo hilinglasuak anggugunem a'luk he an nagot mene a'nogo raja menlaga andi.

¹⁶ Ma re yogondak an nen wene misik ekhe kino ikhi lagi mene yi, nagaisa haren nabit ugun o,” iluk yagatikhe.

¹⁷ Yagatikhemo at Batsyeba nen he, ”Nenamene faget kino ikhi lagen?” isikhemo, Adonia nen he, ”Nagaisa an hele tugum enu Abisag awi Sunen mene andi nagweap eragain nen he raja Salomo nen fano uageluk haren yaga'nogen yagaheti lagi. An nen anggikhi logolik nagaisa haren halok he Salomo nen nabit igin lek anggikhi lagi o,” iluk yagatikhe.

¹⁸ Andi isikhemo at Batsyeba nen ikhi logolik he, ”Fano, wene andi an nen hat hobaget at raja oba nane igin o,” iluk yagatikhe.

¹⁹ Andi isikhesik at Batsyeba a'nogo re Adonia awene a'nogo faget yagasiogen iluk lagaikhe. Lagaikhemo re, at raja a'nogo agaisa hai warogo iluk menlagaikhesik he eindep awi yagaisogo hai watikhesik nekhengge at hurek oba takhta a'nogoba hu'lagaikhe. Andi nen aren agaisa hu'lasigin oba faget at ebe werek oba nen enggi pikhit fikhit a'nogo hu'lasuageluk obalik fougerasuageluk yagaisasikhe.

²⁰ Andi isikhemo at ebe hu'lagaikhesik at Batsyeba nen ikhi logolik he, ”Abo, An hagaisa nen he wene endep aple faget ekhe kino igin enggere, haren lek egen hanogo iluk yagaheti,” iluk yagatikhe. Andi yagatikhemo at Salomo nen heinok wokhikhi logolik he, ”Andi nena wene? An nen herak fagain lek enggere yaganom o,” iluk isikhe.

²¹ Andi isikhemo at Batsyeba nen onggo ikhi logolik he, ”Hat hoe Adonia a'nogo nen hele Abisag andi heloakhogo re haren fano in,” iluk yagatikhe.

²² Andi isikhemo at Salomo nen ikhi logolik he, ”Wene andi faget he nenahalok nagaisa haren an noba ikhi lagen? Andi re an nen raja logolik hurek welagiba yi at oba wogosu hak ikhi lagen. Nen, at andi re an noe lek nogo. Nen, ekhe at imam Abyatar inom Yoab inom ogore at ebikhit werek omanogo ri!” iluk isikhe.

²³ A'nogo isikhesik at Salomo nen Tuhan enuba hombuk palogo ikhi logolik he, ”At Adonia nen kino ikhe mene andiba, an nen wene oba fembik ebe pinggi wati legengge hilingisigin halok he, Tuhan nen homan nobagagin halok fano!

²⁴ Tuhan nen he an neisena Daud hurek welagaba a'nogo an hurek logouwageluk omamet nobagaikhe. Nen Aren abok wene isikhe mene a'nogo tiphogo re kerajaan yi an noba inom an nen tagomangge meneba inom wo'nisikhe. Andi nen he ibi-eberogo Tuhan mondok eluk werek mene a'nogo enuba hilingi'mo re Adonia re yogondak yi sambulat wa'lasigin,” iluk hombuk palhikhe.

²⁵ Andi isikhemo at raja Salomo nen he Benayaba mimingitikhe mo re, At Benaya ebe lagaikhesik Adonia a'nogo wasi lagaikhe.

Abyatar eabumo nen sebelogo figik, nen Yoab watik isukwa wene

²⁶ Andi nen raja Salomo nen imam Abyatar oba ikhi logolik he, ”Hat he an neisena hinom logolik aremnogo an neisena nen enggin-fenggin hikhi lagaikhe mene omanogo harogo enegat hikhi lagagin anggigi. Nen, harenat nineisena Tuhan nen Peti Wene Warek wo'ninafikhe mene kwalegengge a'nogo halhi lagaginat anggigi. A'nogo hilingiti lagagin mo re, an nen o yogondak yi sambul hebe pinggi hoasu mene re hoati'lek herakhobagagin andi nen he, haiba hat hebe welagagin oba o Anatot omanogo lan o,” iluk yagatikhe.

²⁷ A'nogo isikhesik at Salomo nen hun Abyatar imam welagaikhe mene a'nogo pelak fesikhe. At Salomo nen a'nogo hilingitikhe mene andiba re at imam Eli nen tagomangge mene ambisangma hilinglasigin mene Tuhan ane o Silo nen isikhe mene a'nogo higit agaikhe.

²⁸ A'nogo agaikhe mene omanogo faget Yoab esanggo hilhikhesik he at ebe Adonia ebikhit mene welagaikhe andi nen he ailo nek agaikhe. Oba nen he attak aren Absalom ebikhit mene welagaikhe le'mare, aren heise Tuhan Awi sabu salek oba omanogo lagaikhesik he mezbah unggut oba andimuk hilingik mene a'nogo senek logolik welagaikhe.

²⁹ A'nogo were'ma, at werek mene a'nogo raja Salomo eluet fesukwama re at raja nen he Yoab wasuageluk Benaya mimingisogo lakfesikhe.

³⁰ Mimingitikhemo re Benaya o Tuhan Awi salek oba omanogo lagaikhesik Yoab oba ikhi logolik he, ”Hun raja nen he hat welagen oba arem en wulibuageluk ikhe o,” iluk yagatikhemo nen he, Yoab en onggo ikhi logolik he, ”Nabiro, an he ya nen wa'lasigin fano,” isikhe.

³¹ A'nogo isikhe mene a'nogo raja esanggo holhikhesik aren ikhi logolik he, ”An inom nen an neisena eisok erokwe mondogat inom he ap weak hilingita lek oba nen aren inoate mene andoma faget niren eise asimbik ekhe hilingisugun lek hilingi'mo re, lambik he aren ikhe aple aremnogo higithogoat hilingi'no.

³² Hun Apner andi re it tentara Israel mene inoe kain perwira welagaikhe, nen Amasa re it tentara Yehuda mene inoe kain perwira welagaikhe. It inebe pirenet he weak ekhe hilingita lek. At Yoab andi re weak agun oba nen he it andem he mondok fani-fano inap oba nen it inoate. Ma re, an neisena onggot kwelek aren ap wate mene andi faget Tuhan nen arogo wene oba fouwago.

³³ Ap sikhe fisogo mene inogogwi inebe pire wa'lagaikha mene andem faget ambisangma re at Yoab onggwarek inom nen aren tagomangge mene inomen erembulmo hugu mondok logogun. Oba nen he an neisena raja welaga mene a'nogo nen tagomangge mene mondogat he Tuhan nen fanorinafu mondok logogin. Nen it he, ambisangma fano mene nek hikhi logogun,” isikhe.

³⁴ Andi isikhe mo re, at Benaya a'nogo o Tuhan Awi sabu salek oba omanogo lagaikhesik he Yoab a'nogo aremnogo nen wasi lagaikhe. Wat fesikhesik he, at Yoab ebe onggwarek awiba o kota nen endakwe fikhit omanogo salhukwa.

³⁵ Salhukwama at raja nen he at Benaya a'nogo re Yoab obali'mo it sikhe fisogo inap inoe panglima menfesukwa, nen Zadok he hun Abyatar obali'mo imam menfesukwa.

Simei wa'lagaikhe wene

³⁶ A'nogo hilinglagaikhemo re at raja nen Simei woletikhesik yagati logolik he, ”O hat honggwarek haiba o Yerusalem oma wusin. Wut fuluk he, o kota nen wulibi lagi'lek andoma mondok logoino.

³⁷ Nen haren hailo legengge wulibi lambik i endep mene enu Kidron andi palogo lagain halok he hat hebe hoasugun o, Nen a'nogo hilingisugun mene andi re hat honggwaregen enek ambisangma saburagain o,” iluk yagatikhe.

³⁸ Andi isikhemo at Simei nen he, ”Neisena kain mene, fano egen o, an he neisena haren egen andi hakhogo nek hilingisigin o,” iluk isikhe. Andi isikhesik he at Simei a'nogo o Yerusalem andoma inukhogoat welagaikhe.

³⁹ Tahun henagan hilingfuluk he wene yi'nogo hilinglagaikhe: At Simei amingmingengge inebe pirenet enggere heise o Gat lagaukwasik he raja Akhis hun Maakha amlogo a'nogo ambit lagaukwa. A'nogo lagaukwama it lagaukwa mene a'nogo faget at Simei yagatukwa ma re,

⁴⁰ aren anggo keledai ba talogo hu'lagungge puget fesikhesik, at amingmingengge aremnogo heraginabik he o Gat hun raja Akhis a'nogo ambit lagaikhe. Lagaikhesik o andoma were'ma heraginafikhesik woginarek hobuk ambotkwe wagaikhe.

⁴¹ A'nogo hilingitikhemo, at Simei nen hilingitikhe mne a'nogo Salomo esanggo holhikhesik,

⁴² aren Simei wolesi loageluk lakfisikhi logolik he mel yaga'no isikhe, ”An nen he hat hebe o Yerusalem yoma nen wulibi lagain lek iluk Tuhan enuba hombuk palin iluk yagaheti. Nen, an nen ikhi logolik hat o Yerusalem yoma nen wulibi lagain halok he hebe wa'lasigin o, iluk igiat. Nen, a'nogo igimo re haren nane hologo hilingiti logogin iluk. i o, isigin a'nogo re lek nogo a?

⁴³ Oba nen he, yogondak nenahalok haren hane huli waten a'nogo taganet figik, nen an nane a'nogo sagalogo hilingitik, egen nogo?

⁴⁴ Hat hobabut weak logolik an neisenaba hilingfikhi lagagin mene andi re hat mondogat helu welagen. Andiba re Tuhan nenat wene hoba fagain,

⁴⁵ Oba nen he an enek he, fanoabet nobagakhi logogin nen neisena raja ba logouwageluk erorate mene ari re, Aren omameratu mondok logogin,” iluk yagatikhe.

⁴⁶ A'nogo yagatikhesik he, at raja nen Benaya mimingitikhe mo Benaya lagaikhesik Simei pinggi wasi lagaikhe. A'nogo watikhe mo re andem sambul at Salomo alegenek aren melalinafi lagaikheba andoma enu werek mene welagaikhe.