1RAJA-RAJA 12 - Allah Wene Fano Wene Hupla Inane

It afuni Israel inap inaiba utara fikhit welagaukwa mene nen folim hibirogo minggilhukwa wene

¹ Ap Israel inap abel utara fikhit welagaukwa mene mondogaren Rehabeam ebe raja logouwagaluk unggul sebelogo menfouwogoluk o Sikhem andoma andogotukwasik were'ma, at Rehabeam inoba lagaikhe.

² Andem sambul he, ap Nebat amlogo Yerobeam a'nogo raja Salomo ailo nen o Mesir lagaikhesik werek kwelek hilingitukwa. At Yerobeam ebe andoma were'ma, afuni nen he, ”Rehabeam raja logouwageluk menfouwogoluk ili'lagwi,” iluk isukwama esanggo holhikhesik he, ambotkwe o afuni Israel mene inaiba wagaikhe.

³ Wagaikhemo, afuni inawi abel utara fikhit welagaukwa mene nen Yerobeam ayonggo fesukwasik, inom ap Rehabeam oba wagaukwasik he, mel yagatukwa:

⁴ ”Hat heisena Salomo obabut ningsek logolik nit yabu enggin hokho mene ninoba fesikhemo hilingitu welagorek andi nen he, yogondak ninoe haren enggin ninoba mene andi endebat setfuluk, yi enggin ti enggin hikhi lago mene andi endebat legetfagain halok, nit hat hamingmingengge logogun o,” iluk yagatukwa.

⁵ A'nogo yagatukwama, at Rehabeam en he, ”An nendawimo ebesimbigen yagahisagain enggere, hinenggi henagan logombigen we'no o,” iluk yagaisasikhemo, it ap omanogo inambotkwe lagaukwa.

⁶ A'nogo lagaukwama re, at Rehabeam eisena Salomo ogogwi wene ”Yi'nogo hilingisugun, ti'nogo hilingisugun,” iluk yagati lagaukwa mene omanogo inoba lagaikhesik mel yagaisasikhe: ”An nen ap andi wene ninggi'nogo mene yagaisagain anggegep? Yagaisoagaluk hiren wene ninggi'nogo mene yaganesugun?” iluk heinok wogisasikhe.

⁷ Heinok a'nogo wogisasikhemo, iren he, ”Haren it inane hologo it faget hilingiti logogin halok, hane liokhogo yagaisamo, it hat hamingmingengge hilinglasimbik mondok logogun o,” iluk yagatukwa.

⁸ A'nogo yagatukwa meneat he, at Rehabeam wene yagatukwa mene andi endawimo seramet fuluk, ap alage at inom higit mene at lebethikhi lagaukwa mene inoba lagaikhe.

⁹ Lagaikhesik he, mel yagaisasikhe: ”Afuni nen yabu enggin inoba mene endebat set fauwageluk yaganeta andi, an nen wene ninggi'nogo yagaisagain anggikhi lagep? Hiren onggo yagane'ni,” iluk yagaisasikhe.

¹⁰ A'nogo yagaisasikhemo, iren he, ”It afuni nen, heisena nen yabu enggin mene ninoba fikhi lagaikhe andi hak figi'lek, haren se mene ninoba fikhi logoino, iluk yagaheta mene andi wene onggo mel yagaisano: An neisena omame endebat lek, elo'lek hangge meneat he, an enek he nomame mondok hokho o.

¹¹ An neisena nen yabu enggin mene hinoba fikhi lagaikhe andi, endebat se hangge meneat he, an nen enggin hokho mene hinoba fikhi logogin o. Aren yei posiemanggen we meneba lambisogengge hinoati lagaikhe meneat he, an nen yei posimanggen alok werek meneba nenggi ekhe inomat hinoati logogin aro, iluk yagaisano o,” iluk yagatukwa.

¹² A'nogo yagatukwama were'ma, it ap omanogo at Rehabeam en he, ”Hinenggi henagan logombigen we'no,” iluk yagaisasikhe higithogoat, it ap omanogo Yerobeam inom raja Rehabeam oba wagaukwa.

¹³ Wagaukwama, at Rehabeam en, wene it ap inaluendegen yagatukwa mene a'nogo herakfisaluk he, ap alage nen yagatukwa mene a'nogo ane mondok haferogo yagaisasikhe.

¹⁴ Wene it ap alage nen yagatukwa higithogo yagaisikhi logolik he mel yagaisasikhe: ”An neisena nen yabu enggin mene hinoba fikhi lagaikhe mene andi endebat se hangge meneat he, an nen enek he, enggin mondok hokho mene hinoba fikhi logogin o. Nen, aren yei posiemanggen we meneba lambisogengge misigam oba hinoati lagaikhe meneat he, an nen yei posiemanggen alok werek meneba nenggi ekhe inom hogoat hinoati logogin o,” iluk yagaisasikhe.

¹⁵ Wene andi faget, At Tuhan endawimo anggasikhebaat, Aren ap Ahia, Allah ane yagaisikhi lagaikhe mene, aiba Silo mene nen Yerobeam yagatikhe mene ebe agunem enegat asuageluk, at Rehabeam en it ap andi kino yagatukwa mene inane holhi'lek herakfisasikhe andi.

¹⁶ At raja a'nogo inane holu abiren herakfisasikhe andi nen he, it inane hokhorogo mel isukwa: ”At Daud ebe inom, aren tagomangge mene inom, inebe nit ninoe raja logogun he, mondok ninabiro. Iren nit faget yi mene ti mene hilingnisikhi lagaikha nogo? Mondok lego. Andi nen he, at Rehabeam onggwarek faget hilingirikhi logouwagen he, hit ap Israel mene yi sani! Ninambotkwe louwogen he, we'ni o,” iluk isukwasik inambotkwe inaiba lagaukwa.

¹⁷ A'nogo lagaukwama, at Rehabeam a'nogo afuni o Yehuda mene faget enek inoe raja hilinglagaikhe.

¹⁸ A'nogo meneat he, at Rehabeam en ap Adoniram, afuni yabu weat inenggi onggo legengge inomamerogo hilingitu kwelek ferinarek welagaikhe mene andi, ayonggo fesikhesik afuni omanogo inendawimo fano asuageluk inoba lakfesikhe. A'nogo inoba lakfesikhe meneat he, iren helep oba ebe mondok pinggi watukwa. A'nogo hilingitukwama, at Rehabeam eilenggen hasikhesik ailo nen he, ebe angge kereta a'nogoba weak-weak lagasikhesik, heise o Yerusalem wagaikhe.

¹⁹ A'nogo hilingitukwasik, andi sambul en pikhit o yogondak huli, it afuni Israel mene inawi utara fikhit welagaikharek mene nen he, ”Ap Daud en tagomangge mene ekhe ninoe enupogot asugun mondok lego,” iluk inom minggilogo inabit mondok welagaikharek andi.

²⁰ A'nogo hilingitukwasik were'ma, it afuni nen he, ”At Yerobeam o Mesir en ambotkwe arat wagasik werego,” iluk isukwama, it afuni Israel mene inebe mondogat inesanggo holhukwasik he, inebe o ekhema andogosuogoluk at Yerobeam ayonggo fesukwasik, at ebe afuni Israel mene inoe raja logouwagaluk menfesukwa. A'nogo menfesukwama, it afuni inunggulenu Yehuda mene faget enek inoe raja Rehabeam awe a'ma welagaukwa.

Allah nen wene ap at ane yagaisikhi lagaikhe mene Semaya yagatikhemo, aren yagaisasikhe wene

²¹ Ap raja Rehabeam o Yerusalem wagaikhesik he, agoromi tentara inungulenu Yehuda mene inom, Benyamin mene inom, weim yafu inelu mene nen ap Israel mene inom weim yafi logolik, afuni Israel inunggulenu lombok inawi utara fikhit welagaikharek mene omanogo hobuk kain raja Daud en tagongge mene awe a'ma fisoageluk, ap tentara inebe mondok fano mene nek 180.000 nen esa logalogo fisasikhe.

²² A'nogo meneat he, Allah nen ap at ane yagaisikhi lagaikhe mene enu Semaya andi ayonggo fesikhesik lakfei wagaikhe.

²³ A'nogo lakfei wagaikhesik, ap Rehabeam inom, afuni Yehuda mene, Benyamin mene mondogat inom, wene mel yagaisano, isikhe:

²⁴ ”Wene hilinglaga andi, an nendawimo anggigibaat hilinglaga andi nen he, hit hinagaila'lak Israel mene inebe inoasi lagi'lek hinailokwe hinambotkwe lani o, iluk ikhe,” iluk yagaisasikhemo, it inebe mondogat nineisena Tuhan nen, ”A'nogo hilingitup,” iluk yagaisasikhe mene andi inesanggo holhukwasik he, inambotkwe inailokwe lombok pugulogo wagaukwa.

Ap Yerobeam ebe Tuhan herakfisaluk wulifikhe wene

²⁵ Ap Yerobeam ebe afuni Israel mene inoe enupogot arat hilinglagaikhesik he, o kota Sikhem tom Efrayim oba andoma ninghogo wutikhesik, ebe elama faget andoma lagaikhesik welagaikhe. Welagaikhesik, hobuk o kota Pnuel ninghogo wusi lagaikheat.

^26-27 A'nogo wutikhesik, endawimo nen he, mel anggasikhe: ”It afuni andi Tuhan awi wuri'mo o Yerusalem at faget hilingisuogoluk lagaikharek andi hak, a'nogoat lagu mondok logogun halok, hobuk inambotkwe ap Rehabeam afuni Yehuda mene inoe raja a'nogo agoromi asimbik he, an nebe noasugun he a,” iluk anggasikhe.

²⁸ Endawimo a'nogo anggasikhesik he, tugwi kembu sapi alik hilingisogo pire ebe emas mene tugwi wutarek andi hak wutikhesik he, afuni mel yagaisasikhe: ”Hit afuni hinunggulenu Israel mene yi sani. Hit Allah faget hilingisuogoluk, o attagenat o Yerusalem lagu mondok welagebo. Andi nen he, hit mene hineisena o Mesir en wokhinarek wulibi wagaikhe mene a'nogo ebe yi o,” iluk yagaisasikhe.

²⁹ A'nogo yagaisasikhesik, tugwi kembu emas mene sapi alik hilingik mene omanogo ekhe o Betel fesikhe, nen ekhe re o Dan fesikhe.

³⁰ A'nogo fesikhemo, it afuni nen tugwi kembu andi faget hilingisuogoluk, o Betel inom, Dan inom, laga lagaukwa. Nen andi hilingitukwa andi re, mondok weak meneat hilingitukwa.

³¹ Nen, at Yerobeam en tugwi kembu andi faget hilingiti logogin oba ekhema-ekhema punukwe ekhe tugwi wutarek andi hak wutikhesik, ap tugwi kembu eisewerek logouwagaluk ap inunggulenu Lewi mene lek, we, hunogoat mene menfisasikhe.

Tugwi kembu faget o Betel en hilingiti lagaukwa mene andi homan fisasikhe wene

^32-33 A'nogo menogo fisasikhesik, it ap tugwi kembu eisewerek mene omanogo nen tugwi kembu faget hilingiti logouwagaluk o Betel fisasikhesik, at Yerobeam ebe nen tugwi kembu emas mene sapi alik hilingitikhe mene omanogo faget wam, yi mene ti mene fisasikhe. A'nogo fisasikhesik, pesta it afuni Yehuda mene nen Allah faget hilingiti lagaukwa andi hak, aren tugwi kembu andi faget tugi it inenggi wenati lagaukwa higithogo 8 oba tanggal 15 oba hilingiti logogun, iluk wenagaisogo fesikhe. A'nogo wenagaisogo fesikhesik, o andi sambul at Yerobeam tugwi kembu faget wam, yi mene ti mene fisageluk o Betel lagaikhe.