Ibrani 1 - Suha’ Maseho: Kadadiam anna Pa’dandiam Bakahu

Matande puha ia Änä'na Puang Allataala anna la ingganna malaika'

¹ Indo yolona pembuda ma'battakada Puang Allataala lako nene to taponene napalombum ingganna nabi. Ma'hupa-hupa lalam napogau'.

² Sapo' illaam inde wattu la kasuppisanna lino ma'kale Ia Änä'na Puang Allataala puha umpalombungangkia' tula'na. Indo Änä'na abana inna napa'tantum Puang Allataala la Ia muampuam asam ingganna-ingganna sia. Anna Änä'na siam duka' ungkähäi anna napadadii Puang Allataala langi' sola lino.

³ Ia naongei tandaam pangkähhä kamatandeanna Puang Allataala, anna susi siam sipa'na anna pa'pogausanna Puang Allataala. Anna Ia toi umpaliaha ingganna-ingganna sia, tula'na ponno kakuasaam napake. Tappana puha umbasei lao dosa budanna hupatau, iya le'ba'um längäm suhuga muokko' dio tandai kananna To Handam Matande.

⁴ Lambi' matande puha ia tadongkonganna anna la ingganna malaika', umba susi matande puha ia indo sanganna to nasangaiam Puang Allataala anna la sanganna malaika'.

⁵ Aka tä' tia deem la naua Puang Allataala lako malaika': “Ikom too Änä'ku; mengkalao allo temo kupomakaleso kuua: Kaom too Ambemu.” Sapo' anggam diona Änä'na naua: “Kao la mendadi ambena anna Ia la mendadi Änä'ku.” Tä' ia deem ma'kada susi diona malaika'.

⁶ Mane deenni, wattunna anna ussuai Änä' uluana Puang Allataala mentama inde lino, ma'kada naua: “Ingganna malaika'na Puang Allataala la pahallu menomba dio olona.”

⁷ Anna diona ia ingganna malaika', naua Ia: “Puang Allataala umpopengkubalim malaika'na napadadi susi hibu', anna to si napakasua-sua napopengkubalim napadadi susi lelona api.”

⁸ Sapo' lako ia Änä'na naua: “O Puang Allataala, la mentomahaja liuko sule lako salako-lakona! Ma'pahentako sola undu' lollä.

⁹ Umpohäeko kamaloloam anna ungkabassiko kakadakeam. Iam too kasuhunganna anna Kao, Puang Allataala to umpenombai, puhako kupopentondom anna la ingganna solamu, aka kulanti'ko kutolloi minnä'-minnä' tanda dipa'kasalleiko, anna mala naponnoiko katilallasam.”

¹⁰ Nauapi duka' Puang Allataala lako Änä'na: “O Debata ikom too umpadadi inde lino, indo anna dipadadii, anna Iko siam duka' umpapia langi'.

¹¹ Ingganna ia too la pa'de asam sule, sapo' Iko-Iko la tontä liuko. Langi' anna lino la malusa sihhapam poheba,

¹² la ulluppi'-luppi' susi juba, anna umpabala'i polei bakahunna. Sapo' Iko-Iko tä' punalako deem la tidende, anna la tubo batuko.”

¹³ Anna tä' tia deem la naua Puang Allataala lako malaika': “Okko'ko dio tandai kanangku, sule lako wattunna la kupopa'bukku ingganna balimmu dio olomu lambi' uhhondoi dokko.”

¹⁴ Dadi, aka ia umbai' indo malaika'? Indo malaika' sangngim mempenaba to napakasua-sua Puang Allataala la umpamoloi hupatau to la dimana' kasalamasam.