Tiyagu 3 - Mazu Otchena a Mulungu

Jokokomeza zela jowonga

¹ Abalaga, muwari mwa nyo kamusimbwe indjiva aliba kala anamafundjiha. Mwasiwa muhuiziwa ira hiyo anamafundjiha nnoza nitongiwe na makalelo malukulu kwaranya atu amohiwa.

² Mwasiwa hiyo atene nnogwagwaduwa na makalelo madjindji. Mbwenye ule ahanagwagwaduwa muwari mwa jowonga jinakumela vamulomoni vaye, mutu wenno gu mutu okwakwanela owanda viwendiha maningo aye ompumbulene.

³ Kaumbuwelani makalelo anawendiha atu kavalo. Kavalo agalive mwanainyama mundimuwa, namuwariha mwana momba wanoni waye bahi, nnowanda titikula maningwaye matene, vwelelaga jatene jinafuna hiyo.

⁴ Kaumbuwelani eto makalelo a mwadeya dilukulu nnawenda mbara. Masiki diulukunleve eto masiki nipevo nibubudege mwadeya ule, maliba wendiha unowanda sogolrelra mwadeya watene mofuna mwaye na yengo ing'onong'onove bahi.

⁵ Sawasawa eto na nlumi. Nlumi tchi yengo ing'onong'onove mbwenye jinalaba atu kahi ja masika. Muwari mwa nlumi punaza mutu vititimiha zela jengo johokala ja masika. Kaumbuwelani eto makalelo anaja mpinda mukokolani. Kokola yohokala ya masika inowanda ja muwari mwa mwana munlo wa vang'ono bahi.

⁶ Sawasawa nnga nlumi. Nlumi nnafwanyeya nagali munlo oirana makalelo madjindji abure. Nlumi nagalive yano ing'onong'onove, nnowanda takaliha maningo ompumbula. Nlumi nnowanda tumeya ingumi yehu yatene. Eto munluwa unatumeyana atu, nlumi nehu nnakumana munloni ohokana goma uwa.

⁷ Zela pandi ya vinyama na mbalrame dowa jomburunuwa, dowa jinakala mbara, jatene ejo jinasogolrelriwa na atu eto atu kohomala jigondjiha.

⁸ Mbwenye kalivo mutu unawanda gondjiha nlumi. Nlumi tchi yengo yabure yohowanda gondjiheya. Eto tchi yengo yozaleliwa veneno opa.

⁹ Na nlumi nimohive nnowanda mutamalelana Nabwiya wehu uli Baba eto nlumi nimohive neni nnowanda rungunutcha dowa atembelrelrana afwihu anne kapandutchiwe molingana na Mulugu.

¹⁰ Wanoni umohive unokuma mazu otamalela eto unokuma mazu otembelrelra. Mbwenye miyo abalaga nnafuna duwandeleni ira yenno kifwanenle.

¹¹ Tchoira isime kinakuma mahindje otapilra na owawa ora imohive.

¹² Abalaga kodi inowandeya ira mufigera avahe azeti? Owu hehi kodi inowandeya ira muratchi wa uva avahe jovaha ja mufigera? Na makalelo amohive anno, isime inna mahindje a mwinnyu kiza ikumiha mahindje apama.

Zelru da ilambo ya vati na zelru dokumela zulu

¹³ Kodi muwari mwa nyo ukala mutu unaviona ira gu mutu wa zelru eto oonelramo? Akala mutu wenno ukalamo, inafwanela liye airegena joira japama mopwaseya, molingana na zelru dinna liye.

¹⁴ Mbwenye akala nyo mmirimani mwinyu muhuzala kalelana nrima no visogolriha, kamuvititimihe ira muli atu a zelru. Mwavititimiha eno, kamuwongile ibaribari, muhunama.

¹⁵ Zelru dedo kahi zelru dokumela zulu. Ti zelru da ilambo ya vati, dohara jofuna ja maningo eto ti zelru dokumela wa Satana.

¹⁶ Tchoira wewo uli kalelana nrima no visogolriha, ku wewo unafwanyeya gudulana na joira jatene jotakalave.

¹⁷ Mbwenye mutu awendaga na zelru dokumela zulu, voroma kanakana yotakala, unowenda pama na afwaye, unowenda na atu mopwaseya, unovwanana na afwaye, unoawendela atu tangaranga eto unovaha misapo dapama, kanakana nsakulro eto yengo inawonga liye, mmirimani mwaye ilimo tcheniyo.

¹⁸ Tchoira upama ti johanda jinakumela muwari mwa mbewu izaliwe na atu anne analaba na murendele.