Tiyagu 1 - Mazu Otchena a Mulungu

Malondjelo a Tiyagu

¹ Unalremba gu miyo Tiyagu, muzari wa Mulugu na wa Nabwiya Yesu Kiristu. Nnoulrembelani nyo malogo kumi na menli muli omwadeyene mutawenle vilambo da unde. Mutcheliwile avi?

Upama unakuma muwari moxixiwa

² Abalaga miyo nnafuna duwelruzeni ira mwafwanyeyana makatamiho ohiyana-hiyana, inafwanela mukayena hagalala ulukulu.

³ Tchoira vilela wenyu unaoneya pama mwalimba muwari moxixiwa nroromelo nenyu.

⁴ Inafwanela vilela wenyu ukale wa ibaribari ira yengo ili yatene inafuna ufwanyani, mufwanyeye mwagali andimuwa, atu okwakwanela, atu ohokana yohaleliwa.

Mulugu unonvaha zelru wenno unanvepa

⁵ Akala muwari mwa nyo ukalamo mutu unaona ira: <<Miyo dihaleliwa zelru zela inafuna miyo ira>>, mutu wenno inafwanela anvepe Mulugu wenno unaavaha atu atene na manda menli ahaanyanyuwelaga. Era eno, Mulugu unonvaha.

⁶ Mbwenye vepa uwa, inafwanela avepe muwari mwa nroromelo ahakayikenle yengo ili yatene. Tchoira mutu unavepa muwari mokayikela unalingana na mahindje a mbara omanganyeya, ondunyiwa na nipevo.

⁷ Mutu wenne unakayikela, masiki anvepe Nabwiya, kadedihede ira: <<Inavepa miyo ila, Nabwiya unodivaha.>>

⁸ Mwasiwa liye gu mutu oumbuwela wu na wu eto kanakana voimela vaye pama pama muwari mwa joira jaye jatene.

Zela simela no rayela

⁹ Muwari mwa hiyo atu omuroromela Yesu akalamo mbalihu mmohi ahanna jengo japama jene, inafwanela liye awande ziveliwa makalelo Mulugu umuulukulihile liye.

¹⁰ Eto akalamo mbalihu mmohi orayela inafwanela awande ziveliwa makalelo Mulugu umuyevihile liye. Tchoira atu atene orayela anoza kadimele nnga folori.

¹¹ Mwasiwa nzuwa nakalawo, naomba na kopolo datene, mpinda unomala nyala eto folori nnomala vareya dimorelaga vati, riya watene unogoma. Sawasawa na atu orayela kalabaga mabasiwa, anaza kagomele nyala muwari mwa jolaba jiwa jatene.

Zela xixiwa

¹² Orelihiwa gwenno unavilela muwari moxixiwa. Tchoira agamanle vilela, unotambilra tchapowa wa Ingumi wenno Nabwiya ulumbenle liye avaha atene anamuziveliwa.

¹³ Mutu axixiwaga kaumbuwele ira: <<Eni unadixixa gu Mulugu.>> Tchoira Mulugu kanaxixiwa na yabure eto nne liye kanamuxixa mutu.

¹⁴ So mbwenye kada mutu unaxixiwa ekave na jofuna jaye ja maningo. Jofuna ja maningo jile ti jejo jinamperutcha mutu ira anyengiwe ira airegena johofwanela.

¹⁵ Jofuna ja mutule jadowa sogolro, unagomela tega. Tega waye wadowave sogolro, unomuzelana ukwa.

Upama watene unakumela wa Mulugu

¹⁶ Abalaga anaaziveliwa miyo, kamunyengiwe.

¹⁷ Inafwanela muiziwe ira yengo ili yatene yapama, yengo ili yatene yokwakwanela tchi yengo yokumela zulu, wa Baba wenno upandutchile moneya watene, Baba wenno ahanatchindjeya eto ahanasusa nnga vini nfulri asusaga.

¹⁸ Liye ohowanda nikaliha ahimaye mofuna mwaye, muwari mwa mazwaye a ibaribari, ira niwande kala johanda joroma muwari mwa jatene jipandutchile liye.

Inafwanela nikale ovwa eto oirana jili mMazuni

¹⁹ Abalaga anaaziveliwa miyo, inafwanela mutu uli watene akale obaranya vwa, mbwenye akale odibeliwa wonga eto odibeliwa takaleliwa.

²⁰ Tchoira takaleliwa wa mutu kunazana upama unafuna Mulugu.

²¹ Nona inafwanela muhiye mmambalo jotakala jatene na jabure jatene. Muwendege mopwaseya muiragana mazu anno Mulugu uzanle liye mmirimani mwinyu, anno anawanda vulumutcha kalawo wenyu.

²² Inafwanela mukale atu oirana jinafwanyeya mMazuni, hiya kala atu ovuruwana bahi. Tchoira mwakalelaga vuruwanave, mwahairagana jinavwa nyo, munavinyenga nyokave.

²³ Tchoira mutu wenno uli ovwa mazu eto ahairagana jinafwanyeya mMazuni, unakala nnga mutu oving'ana kove yaye muxupeliyoni,

²⁴ eto agaving'anne, venyavo eno agadiwanle makalelo anna liye, dowaga jaye.

²⁵ Mbwenye wenno unaing'ana pama Nlamulo Nokwakwanela, Nlamulo Nomukutcha mutu, awendaga munlamuloni mule agalive mutu oirana jinavwa liye jile, mutu wenno unorelihiwa muwari mwa jatene jinera liye.

²⁶ Akala muwari mwa nyo uhukalamo unaviona ira: <<Miyo dili oharihamo ja Mulugu.>> eto ahawandaga viwendiha pama zela vamulomoni vaye, wenno unavinyenga mmirimani mwaye. Ja Mulugu jinera liye, unairana vasayi.

²⁷ Tchoira muriheda Mulugu wa ibaribari eto wokwakwanela vamentoni va Mulugu ku wu: Akamiheda ahima kahanna ababiwa na amakwele a ahiyana muwari mwa makatamiho anafwanyeyana atu vamohi no kala mutu ohokana yodugudela zela irana ja mwilamboni ya vati.