Titu 3 - Mazu Otchena a Mulungu

Inafwanela atu omuroromela Yesu kakale atu oirana joira japama eto karambele joira jotakala

¹ Inafwanela waawumbutchede atu omuroromela Yesu ira kawande rumela tongiwa na andimuwa na anamasogolrelra a mwilamboni ya vati, kakale oavwelela eto kaona yengo yofwanela ira mutu airena, kakale okozeyene ira kairegena.

² Kikale atu ofuna muwonga ubure mutu uli watene. Aliwa eto kaafwanya atu kakanganaga, kawande rambela ejo. Inafwanela kakale atu opwaseya eto kakale atu owanda ariheda atu atene.

³ Tchoira wanle na hiyene nali atu a uvuruvuru. Nali atu ohoharihamo, nali atu onyengiwa. Wanle hiyo nali azari ohara jofuna na joira jidjindji jaziveliwa hiyo. Malambo matene nawenda na ubure no kalelana nrima, naaidaga afwihu eto aliwa kaniidaga hiyo.

⁴ Mbwenye Mulugu Nvulusi wehu aganionihile upama waye no niziveliwa waye,

⁵ liye univulusa. Mbwenye kahi ira liye univulusele na mwasa oira nali atu olaba japama, nari. Mulugu univulusele mwa tangaranga daye bahi. Liye uhunivulusa muwari monihuwa, anivahaga ingumi ixa. Muwari mwa Munemba Otchena, Mulugu uhunisakanya akoka.

⁶ Muwari mwa Yesu Kiristu Nvulusi wehu, Mulugu uhunikutulela Munemba Otchena mohohiyededa.

⁷ Mulugu uhunikaliha pama vamentoni vaye muwari mwa sayi daye ira vasogolro niwande za tambilra ingumi yohomala yenno inaing'anela hiyo.

⁸ Jinawonga miyo ti jengo jororomeleya, ja ibaribari, japama, jengo joalimbiha atu. Nona miyo nnafuna weyo utukule jowonga jaga ji, udowe waawandelege mohokayikela afwihu omuroromela Mulugu ira kawandege zuzumela ira kairegena joira japama.

⁹ Mbwenye inafwanela uwande arambela atu anakangana zela jengo johokana mabasa, nari anawonga zela malista a atu kakwile wanle nari anatatamula gaweya owu anakanganela mazu anafwanyeya mmalamuloni. Tchoira jatene ejo kajinna mabasa eto kajinna mpindu.

¹⁰ Wangumanana mutu otatamula gaweya, umusumulule fendo yoroma, awelelave, umusumulule fendo yanembinli. Airanave, kumuwendenave akoka.

¹¹ Tchoira afiya evo uvayele iziwa ira mutule umala holowa eto gu mutu otega. Liye umala vimanga mulandu mwa joira jaye.

Mazu ogomiheda

¹² Miyo nnafuna dimurume mulombwana Aritemaji owu hehi Tikiko ira aze wewo uli we wo. Wenno nnafuna miyo muruma afiya, uze udifwanye sidadi ya Nikopoli. Tchoira nnafuna didowe wewo, medi dodidila nnafuna didimalele dagali wewo.

¹³ Wamuona namatapulela malamulo Zenaji na mulombwana Apolo kafunaga gundeya ira kavenyevo, inafwanela waakamihede muulrendoni mwewa ira kahakayena yengo yofuna ahalela.

¹⁴ Vamohive vevo inafwanela waawandele afwihu omuroromela Yesu ira aliwa kafundje makalelo okala atu ozuzumela irana japama ira kaakamihedege atu anno anatabwa segedeya hiya kala atu ohohinda yengo.

¹⁵ Atu atene omuroromela Yesu dinna miyo veva anoulondjela. Waalondjele eto afwihu ananiziveliwa hiyo muwari mokala afwihu omuroromela Yesu. Sayi da Mulugu dikale na weyo vamohi na atu atene kali wewo. Kukala mazu a karta nalrembiwele Titu.