Titu 2 - Mazu Otchena a Mulungu

Mabasa a Titu oawandela atu ibaribari

¹ Weyo mbwenye mabasawo kakale mabasa ofundjiha ejo jinakumela mafundjihelo a ibaribari.

² Uwandege afundjiha alombwana a idadi yapama ira kakayena muru wapama, kakale atu okana makalelo ofwanela, atu owanda viwendiha pama. Kakaleve atu olimba muwari mwa nroromelo newa, kakale atu oaziveliwa afwiwa, atu olimbiheyene muwari mwa makatamiho anafwanyeyana atu.

³ Sawasawa inafwanela waawandele ahiyana a idadi ira kakale ahiyana okana mawendelo ofwanela vamentoni va Mulugu. Kikale atu owamba nne osimbwa ng'wa vinyu burebure, nari. Aliwa kakale atu oafundjiha ahiyana afwiwa jengo ja ibaribari.

⁴ Inafwanela ahiyana anna idadi kawande afundjiha anamwali ira kakale atu oaziveliwa amamuniwa na ahimiwa,

⁵ kakale atu oviwendiha pama, otchena, atu ohinda japama vande viwa sapa watene wene. Aliwa kakale atu oairela afwiwa upama eto oavwelela amamuniwa ira mazu a Mulugu kahaluluvihiwege.

⁶ Sawasawa eto waagumanana azombwe, inafwanela waakokomeze ira kakale azombwe owanda viwendiha pama.

⁷ Na wenne makalelo anera we, inafwanela ukale mutu oirana japama ira atu omuroromela Yesu kauona, kausazihege. Inafwanela eto waafundjihaga, waafundjihege yengo ya ibaribari na mmirimani mwawo mwatene

⁸ na jowonga japama ira atu kahakayena yengo inafuna atu ninukeda hiyo. Ineriha mwilamboni muno mukala atu ofuna joniharahara. Mbwenye weyo wakala mutu owonga pama, aliwa kinakana muselu ofuna ninukedana hiyo. Aliba niharahara anagomela nyaswa mwasiwa kinaonege yengo yabure yofuna nihindana hiyo.

⁹ Waawandele azari ira karumele tongiwa na apatarawuwa pama muwari mwa jatene. Inafwanela kalabe ira apatarawuwa kaaona, kaziveliwege jolaba jiwa. Kikale azari oaruniha apatarawuwa, nari.

¹⁰ Nne kikale azari owanda ruhavo ja apatarawuwa, nari. Mbwenye inafwanela kakale ororomeleya muwari mwa johinda jewa jatene ira joira jiwa jile jionihedege ibaribari zela Mulugu Nvulusi wehu.

¹¹ Tchoira sayi da Mulugu dihiza ira atu atene kavulusiwe

¹² eto sayi dimohive edo ti dedo nnawanda nifundjiha ira niwandege konda mawendelo abure na jofuna ja mwilamboni ira nitukule makalelo oviwendiha pama, niiregena jengo japama, jofwanelela ja Mulugu tempu inawenda hiyo ila.

¹³ Nihikana eto yodediheda yapama inaing'anela hiyo ira nnoza nione undimuwa wa Yesu Kiristu wenno uli Mulugu wehu Mundimuwa eto Nvulusi wehu.

¹⁴ Yesu ohovelela maningwaye na mwasa oniwombola hiyo ira niwande hiya makalelo oirana jinakondiha malamulo nazana hiyo eto ira anihuwe, nikale atwaye apama, otamangela sogolro niiragana japama.

¹⁵ Inafwanela waawandelege jatene eji afwihu omuroromela Yesu. Waakokomezege ira kairegena japama eto waahiyihege jabure jinera atu muwari mwa utongi uvahiwe we. Eto kakalevo unafuna ulramwisa.