Titu 1 - Mazu Otchena a Mulungu

Pawulo unamulondjela Titu

¹ Unalremba gu miyo Pawulo, muzari wa Mulugu eto namarumiwa wa Yesu Kiristu ira ale kasakulriwe na Mulugu kakayena nroromelo eto ira kawande iziwa ibaribari zela jimohi jiwa eto kairegena japama

² muwari mokana yoing'anela ira nnoza nivahiwe ingumi yohomala yenno Mulugu wenno ahananama, alumbenle liye nivaha, romelave wanle ahanapandutche zulu na ilambo ya vati.

³ Evale tempu yagakwakwanne, liye ohoiziweyiha muwari mwa Mazu aye. Mazuwa banno mamohive dirumiwe miyo na Mulugu Nvulusi wehu ira dilaleye.

⁴ Nnoulrembela karta ni we Titu, mwanaga wa ibaribari muwari mokana nroromelo nimohive. Malondjelo anaurumiheda miyo ba ala. Difunne ira sayi na murendele okumela wa Mulugu Babihu na Nvulusi wehu Yesu Kiristu, jatene ejo jikale na weyo.

Makalelo ofwanela ira aansiyawu kakayena

⁵ Miyo ira duhiye muKereta, dauhiyele ira usakanyede jimohi jiwa jahalenle muwari mwa atu omuroromela Yesu eto waahambihe aansiyawu tatamo datene mwemo mwafwanyeya atu omuroromela Yesu. Uumbuwele mazu daurumile miyo ira

⁶ ansiyawu unafuna we muhambiha akale mutu ohokana imanya, akale mulombwana umutenle muhiyana mmohi bahi. Na ahimayene kakale omuroromela Yesu. Kikale ahima owenda ja uzimora nne ahima ohavwelela ababiwa.

⁷ Tchoira ansiyawu gu bixpu, gu mutu ovahediwa ira alabe mabasa a Mulugu. Nona inafwanela akale mutu ohokana imanya. Kakale mutu ovitukulela, kakale mutu ohorutcha takaleliwa, kakale mutu olrezelra, kakale mutu owaniha, kakale mutu oziveliwa kobiri.

⁸ Inafwanela akale mutu owanda awatchela alendo, akale mutu oziveliwa upama, akale mutu owanda viwendiha pama, akale mutu ohokana nsakulro, akale mutu okana mawendelo otchena, agalive mutu owanda vihiyiha jofuna ja maningo.

⁹ Akale eto mutu ohideda pama mazu a ibaribari afundjihiwe liye. Nnerela ira awandege afundjiha afwaye mafundjihelo a ibaribari anahara hiyo eto amuona maliba runiha, awande musumulula.

Inafwanela atu abure kasumululiwe

¹⁰ Mwasiwa unawongela miyo eni tchoira Kereta uli we wo, kohokalawo atu oindjiva ohofuna avwelela andimuwa, ba arambwe, ba atu oanyenga afwiwa. Makamaka anairana eji ti nikuru na atu anno anasimbwa hidedela joineliwa.

¹¹ Inafwanela aansiyawu kawande amiyaliha, mwasiwa aliwa anovenya roma nongaga mavande ompumbula, aliwa fundjihaga jengo johofwanela. Eto aliwa kafundjihaga, so anahara kobiri bahi.

¹² Malambo a mundulrimu, ohokala muKereta mmohi kamutetela atu nnga namafiyiheda. Liye ohowonga zela atwaye ira: <<Hiyo akuda Kereta nili atu onama, nili vinyama dabure da mukokolani, nili ayere oziveliwa udja bahi.>>

¹³ Miyo nnorumelela ira liye kanamile. Nona inafwanela waona jabure ejo muwari mwa atu omuroromela Yesu, uwandege asumulula mwa kopolo ira kakale olimba muwari mwa ibaribari inahara hiyo.

¹⁴ Waasumulule ira kahiye anatchitwa ohokana mabasa aJudewu anawongetcha atu na mangano anawonga atu amohiwa kahiyile ibaribari.

¹⁵ Mutu wenne uli wapama, para liye jatene jene jili japamave. Mbwenye mutu wenno uli otakala, ule ahanamuroromela Yesu, agarati, kilivo yengo ili yapama para liye. Jili mmirimani mwaye nari jili mmuruni mwaye jinafwanyeya jagali jotakalave.

¹⁶ Atu otakala ale, anawonga ira: <<Hiyo nihimuiziwa Mulugu.>> Mbwenye muwari mwa joira jiwa, anamuruna. Tchoira atu anne ba atu otakaletchetcha, ohonvwelela Mulugu. Kahi atu ofwanela ira kahindege yengo ili yatene yapama.