Ruti 2 - Mazu Otchena a Mulungu

Ruti ohodowa dodela johala

¹ Nowemi ohokana mulombwana mmohi wenno ali wa muibalini mwa mamunaye Elimeleki. Mulombwanole nzina naye aitaniwa Bowazi. Bowazi ule ali mulombwana orayela eto mulombwana ovweya.

² Siku nimohi Ruti nkuda Mowabe ohowongaga na Nowemi eraga: <<Dera mudihiye didowe daone akala nnonfwanya mutu mmohi unafuna difwewela murima adirumelihe ira dimuharege mundulri mwaye davurulege johala jinahiya liye.>> Mwa enne Nowemi ohomuwakulaga eraga: <<Kadowa mwanaga!>>

³ Evale Ruti mohoiziwa yengo tchivi, ohodowa mmundani mwa mulombwana Bowazi wenno ali wa muibalini mwa Elimeleki, liye haraga mundulri mwa anamalabaye karenda, liye dodelaga johala jahiya atu.

⁴ Mwa eno, tchi tempu yakuma mulombwana Bowazi sidadi ya Beleme, liye fiya mmundani mule. Agazile ohalondjelaga anamalabaye anno karendaga ale eraga: <<Yehova akale na nyo!>> Aliwa kohomuwakulaga keraga: <<Na nyenne Yehova aureliheni.>>

⁵ Nomala eno, Bowazi ohonfukaga musogolrelri wa anamalabaye ale eraga: <<Nnga namwali ule bani?>>

⁶ Liye ohomuwakulaga eraga: <<Gu nkuda Mowabe wenne uzile na Nowemi kuma mwilamboni mwa Mowabe.

⁷ Liye wire divepa ira: <Nnavepa mudirumelihe diharege mundulri mwa anamarenda ala ira didodege johala jejo jinahiya atu.> Liye uromile laba mabebehi fiyeda ora yenna. So uvumile vang'onove bahi.>>

Tapanya wa Ruti na Bowazi

⁸ Nomala enne, Bowazi ohowongaga na Ruti eraga: <<Kadivuruwane mwanaga. Kudowe munda mmohiwa ira wadodelege johala, nne kususevo. So waawandamelege anamalabaga a ahiyana ala.

⁹ Eto uing'anege pama munarenda atu ira uwandege doda johala mundulri mwewa. Miyo dahawandela azombwe anarenda ale ira kahaumexeri. Wakana ntona, udowe wang'we mahindje anno karungile azombwale.>>

¹⁰ Evale Ruti ohokokoraga, aoramihaga kove yaye ante fiyiha vati eraga: <<Kodi mwasiwa gwa nni nyo difwewelaga murima, ante nyo fiyedaga dibalra na makalelo anna agali miyo dili mutu oza?!>>

¹¹ Bowazi ohorumelaga eraga: <<Miyo dihimala vwa jatene jene jimuirele we nijaliyo romela tempu ikwile mamunawo. Miyo dihiiziwa ira weyo uhumuhiya babawo na mmawo na ilambo ya waninyu, weyo za kalaga na atu wali we wahanaaiziwe.

¹² Yehova awande utambilriha jatene jiirile we eto Yehova Mulugu wa Izarayeli, wenno uzile we utawela mmapepeloni mwaye awande uvaha yotambilra yawo na mwasa wa jatene jiirile we.>>

¹³ Ruti ohowonga na Bowazi eraga: <<Mbwiyeni nyo muhudifwewela murima, tchoira muhuwanda dilimbiha eto muhuwonga na makalelo apama na miyo namalaba wenyu, masiki dahali muwari mwa anamalaba enyu.>>

¹⁴ Eto tempu yodja yagafiyile, mulombwana Bowazi ohowongaga na Ruti eraga: <<Kasuseda uno ira uwande dja pawu vamohi na hiyo eto uvodege mmusuzuni mwemo munavoda hiyo.>> Evale liye ohodowaga garati vamohi na anamalaba karenda ale, aliwa djaga vamohi. Bowazi eto ohonvaha tirigu owaringa. Evale liye ohodjaga liye rumbala, ante liye koya jodja jimohi ira adowena vande.

¹⁵ Kagamanle dja, Ruti ohovenyaga ira adodege johala. Mwa enne mulombwana Bowazi ohawandelaga anamalabaye ale eraga: <<Inafwanela mumurumelihe liye adowe adodege johala masiki mwemo munalaba nyo. Kammukukumule.

¹⁶ Inafwanela mukumihegemo mapitika a vang'ono, mmorihege ira liye adodege. Kammuhiyihege.>>

¹⁷ Mwa enne liye ohokalelaga doda mmundani mule fiyeda tchiguwo. Evale ohobubudaga jejo jadodilege liye. Fwanyeya ira agabubudile, ali wandamelana lanta nimohi na sevada.

¹⁸ Noira enne, ohopwatelaga, liye dowa musidadi mule. Agafiyile, nijaliye ule ohoonaga jejo jadodilege liye jile. Eto Ruti ohokumihaga jodja jakoyile liye agarumbanle, liye nvaha nijaliye Nowemi ule.

¹⁹ Mwa enne Nowemi ohonfukaga, liye ira: <<Peno walaba waani eto udodenle mmundani mwaani? Orelihiwa akale mulombwana wenno uwandile ubalra!>> Evale Ruti ohomuwandelaga zela munda wenno wadowile liye laba, liye ira: <<Peno miyo dilabile mmundani mwa mulombwana eni unaitaniwa Bowazi.>>

²⁰ Evale Nowemi ohowongaga na nijaliye Ruti ule eraga: <<Yehova amurelihe mulombwana wenno uwandile airela upama atu okalawo nari ale kakwile.>> Noira enne, Nowemi ohomuwandelagave nijaliye Ruti ule, liye kwi: <<Mulombwana wenno uwandile uhiya weyo udodelaga mmundani mwaye peno, gwa muibalini mwehu eto uli muwari mwa ale anawanda nihamba nyumba.>>

²¹ Evale Ruti, nkuda Mowabe ule ohowakulaga eraga: <<Mulombwana dalabana miyo peno, ohodiwandela ira: <Uzege, waaharege anamalabaga mundulri mwiwa malambo matene aliwa karendaga fiyeda tempu yorenda imale.> >>

²² Evale Nowemi ohowongaga na nijaliye Ruti ule eraga: <<Ili yapama mwanaga waaharege anamwali anno anarenda munda wa mulombwanole, tawiha ira unadowe mmindani mwa atu amohiwa, udowe kauirelege johofwanela.>>

²³ Mwa enne Ruti odowetcha gumanela na anamwali karenda munda wa Bowazi ira adodelege fiyeda magomelo wa marendelo a sevada na tirigu. Eto Ruti akalave vande vamohi na nijaliye wenne.