Ruti 1 - Mazu Otchena a Mulungu

Tanda wa istoriya ya Ruti

¹ Tempu yali aIzarayeli kahanakayena mwene, tempu yatongiwa atu na anamasogolrelra, mwilamboni mohokala ndala. Na mwasa wenno ohokalawo mulombwana mmohi wa tatamo ya Beleme ilambo ya Juda avenyile vamohi na muhiyanaye na ahimaye ambinli a anapongwe, aliwa dowa ilambo ya Mowabe ira kakalege wewo mwa tempu ya vang'ono na mwasa wa ndala.

² Mulombwanole nzina naye aitaniwa Elimeleki, muhiyanaye aitaniwa Nowemi eto ahimaye ambinli ale, mmohi aitaniwa Malomi, mmohiwa aitaniwa Kiliyomi. Aliwa kali a nlogo na Efarata eto kakaletcha tatamo ya Beleme muwari mwa Juda. Evale kohovenya, aliwa dowa kala ilambo ya Mowabe ile.

³ Kagali wewule, Nowemi mamunaye Elimeleki ule ohokwa. Evale agakwile, Nowemi ahanlege na ahimaye ambinli bahi.

⁴ Noira enne, ahimaye ale kohatela ahiyana a mwilamboni mwa Mowabe mule. Mwana mmohi amutenle muhiyana mmohi aitaniwa Orufa. Mmohiwa amutenle muhiyana aitaniwa Ruti. Noira enne, kohokalaga mwilamboni mwa Mowabe mule wandamelana yaka kumi.

⁵ Noira eno, ahima ambinli ale Malomi na Kiliyomi kohokwa. Mwa enne, Nowemi ohokala eno ahanna mamunaye eto ahanna mwana.

^6-7 Siku nimohi Nowemi agalive Mowabe wafwanyeya liye ule, ohovwaga ira: <<Yehova uhakamiheda atwaye muwari moavaha jalo mmindani mwiwa!>> Mwa enne liye ohomaruwa akumaga ilambo ya Mowabe ile vamohi na ajaliye ambinli ale ira kawelele ilambo ya Juda. Mwa enne aliwa kagali mundila kadowaga,

⁸ Nowemi ohowonga na ajaliye ale eraga: <<Dowani, muwelele mmawaninyu mwakalege na amminyu. Eto Yehova auireleni upama na makalelo nnga nyo mwadiirela nyo upama miyo na ahimaga anno kakwile.

⁹ Yehova asakanye ira nyo muwande teliwa, kada mutu akayena murendele vande va mamunaye!>> Nomala enne, Nowemi ohalanyaga ajaliye ale na beju. Mbwenye aliwa kohotomolaga kuto, kanlaga mokuwa keraga:

¹⁰ <<Hehi, hiyo kannawelela wanihu. Nnerege uharani nyo ira nakalege na atwinyu.>>

¹¹ Mbwenye Nowemi ohawakulaga eraga: <<Nari anaga, inafwanela nyo muwelele mmavande mwinyu! Kodi mwasiwa gwa nni munafunele nyo ira mudowege vamohi na miyo? Tchoira miyo eni mbani mwaga muhugoma. Kadinna yoing'anela yokana ahima amohiwa ira kawande utelani.

¹² Welelani mmavande mwinyu, mwasiwa miyo kannawelela teliwa, tchoira dihimala ulula. Eto masiki ahakale miyo dikana yoing'anela ira nnoteliwa na mulombwana mahiyu vano ante difiyede kana ahima,

¹³ kodi nyo mogoadediha ante aliwa kafiyede ulukula? Mogokala eno ohoteliwene muwari moadediha aliwa? Anaga, na ibaribari kajakala jowandeya! Yehova uhumala dihiya. Na mwasa wenno miyo dili okumbanyene eto na nyenne munnana ona goyi.>>

¹⁴ Evale aliwa kohoromaga nla akoka mokuwa. Mwa enne Orufa ohomulanyaga nijaliye na beju, nomala eno liye welelaga waniwa. Mbwenye Ruti ohomukamelelaga nijaliye ule.

¹⁵ Mwa enne, Nowemi ohowongaga na Ruti eraga: <<Kaing'ana, otelawawo uhuwelela nlogo naye na wa amilugu aye. Inafwanela na wenne udowege waninyu nnga jiirile liye.>>

¹⁶ Mwa enne Ruti ohowakulaga eraga: <<Kamudikamelihe uharani, nne kamudivepe ira duhiyeni, mwasiwa wewo munaye nyo, miyo nnayege wewo. Vevo munakalege nyo, miyo eto nnakalege vevo. Atwinyu anakala atwaga. Mulugu wenyu unakala Mulugu waga.

¹⁷ Vevo vinakwele nyo, na miyene nnakwela vevo eto pa vevo vanafuna miyo koyiwa. Miyo damwalana na nyo ahali na mwasa wa ukwa, Yehova aditonge na makalelo anafuna liye!>>

¹⁸ Voira Nowemi ohoona ira na ibaribari Ruti ohofuna ira amuharege, mwa eno liye kawelenle wonga akoka zela ejo.

¹⁹ Aliwa kohodowa vamohi ante Beleme. Kagafiyile Beleme wewule, atu atene a sidadi yenne kohotikinaga na mwasa wa aliwa eto ahiyana a wewule kofukaga keraga: <<Ula kahi Nowemi?>>

²⁰ Mwa eno, liye owakula eraga: <<Kamudiitanege na nzina na Nowemi. Mbwenye mudiitanege Nyunya, mwasiwa Mulugu wa Kopolo Datene uhudivaha nyunya ulukulu.

²¹ Dikumaga uno didowaga, dohokana jatene mbwenye Yehova usakannye ira dize eni dahanna yengo. Nnga mwasiwa gwa nni nyo diitanaga Nowemi agali Yehova unnana ditonga eto Mulugu wa Kopolo Datene udivaha simela ulukulu?>>

²² Ala ba makalelo Nowemi akumile liye ilambo ya Mowabe na nijaliye Ruti wenno afwanyeya agali nkuda Mowabe, awelelaga mwilamboni mwakaletcha liye. Tempu yafiya atu ilambo ya Beleme, yali tempu yaroma atu renda sevada.