Roma 9 - Mazu Otchena a Mulungu

Kumbanya undimuwa wa Pawulo zela aIzarayeli

^1-2 Miyo dihikana kumbanya undimuwa, dinnana zuzuma mmirimani mwaga zela abalaga mwasiwa aliwa Kiristu kinambalra. Dawongaga eno kannanama mbwenye nnawonga ibaribari muwari mwa Kiristu. Munemba Otchena unohidedela umboni mmirimani mwaga ira dihikana kumbanya undimuwa zela abalaga.

³ Abalaga nnaawonga miyo ba aIzarayeli. Tchoira aliwa eto kinna pandi na Kiristu. Yahawandeye, miyo derege kana yofunafuna nnga Mulugu aditembelrelre, nnga miyo dikumemo muwari mwa Kiristu ira aliwa kayemo.

⁴ Tchoira aliwa babehediwe ira kakale ahima a Mulugu. Moneya undimuwa wa Mulugu wawenda na aIzarayeli. Mulugu apanganne jopangana na aliwa. Zela pandi ya malamulo, Mulugu aavahedile aliwene. Muwari moawandela atu makalelo omutamalela, Mulugu aawandenle aliwa. Muwari moavaha mapangano, apanganne na aliwa.

⁵ Aliwa banno kakumile mwa makolo ehu a wanle. Eto Kiristu abaliwaga na maningo, abaliwe munlogoni mwa aIzarayeli. Kiristu eto gu Mulugu otonga jatene eto gwenno unateteliwa kala no kala. Ame!

⁶ Naona ira aIzarayeli adjindji kili na Kiristu, kahi ira Mulugu kakwakwanelihedile mazwaye. So inafwanela niiziwe ira kahi atene anabaliwa muzizani mwa aIzarayeli anafwanyeya kagali aIzarayeli.

⁷ Eto nne kahi ira atu atene kabaliwe mwa Abarahamu anafwanyeya kagali ana Abarahamu. Tchoira mMazuni munofwanyeya mazu Mulugu awongile liye na Abarahamu ira: <<Weyo nzina nawo nnoza nivweye mwa ahima unaabalege we muwari mwa Izaki.>>

⁸ Ku wonga ira kohokalawo ahima a nipangano eto kohokalawo ahima obaliwa muwari mwa maningo, kahavolowile muwari mwa nipangano. Mbwenye ahima obaliwa muwari mwa maningo kahi ahima a Mulugu. Ahima a Mulugu ba ale a nipangano. Anno mbwenye ba ana Abarahamu a ibaribari.

⁹ Tchoira mMazuni ananiwandela ira Mulugu ohonvaha Abarahamu nipangano ira: <<Yaka ya metchelo, mwedi nnga wenna miyo nnoza eto nnonfwanya muhiyanawo Sara aganna mwana wa mwanapongwe.>>

Mulugu kanaasakulra atwaye muwari mwa joira jiwa, mbwenye mofuna mwaye

¹⁰ Yeniyo inafwalrafwana nnga imuireyele nikolo nehu Izaki na muhiyanaye Rebeka. Rebeka aganna vambani, vambani vanna liye mwali ahima ambinli.

^11-12 Mulugu ira aonihede ira liye unamusakulra ule unanfuna liye, ahimale kahanabaliwe, kahanairena yengo yapama nne yabure, Mulugu ohovayela muwandela Rebeka ira: <<Murandji baliwa gunamulabege mung'onong'ono waye.>> Ku wonga ira Mulugu kanaasakulra atwaye muwari mwa joira jiwa, mbwenye unaasakulra mofuna mwaye bahi.

¹³ Jinafwalrafwana eto na mazu a Mulugu kalrembiwe wanle oira: <<Miyo dohomuziveliwa Jako eto Ezawu dohomuida.>>

¹⁴ Agamusakunlre mmohi, nnga nnafuna niirevo avi? Kodi nnafuna niwonge ira Mulugu kanatonga na makalelo apama? Nari, nne vang'ono!

¹⁵ Tchoira Mulugu ohowonga na Mozeji ira: <<Miyo nnomuwendela tangaranga mutu wenno unafuna miyo muwendela tangaranga. Eto miyo nnomuoniha upama mutu wenno unafuna miyo muoniha upama.>>

¹⁶ Eto fwanyeya ira sakulriwa na Mulugu kunazela muwari mwa mutu funa waye ira asakulriwe nari zela muwari mwa joira jaye. Sakulriwa na Mulugu unazela muwari mwa Mulugu wenno unaawendela atu tangaranga bahi.

¹⁷ Tchoira mMazuni munofwanyeya mazu awongile Mulugu na Farawu oira: <<Miyo ira duvenyihe ukale mwene oumma murima, doufunelena ira muwari mwa weyo, dautongaga na makalelo a uwali, kopolo daga dionihiwe ira nzina naga niwongiwe mwilamboni mwatene ya vati.>>

¹⁸ Ku wonga Mulugu unomuwendela tangaranga ule unafuna liye muwendela tangaranga. Eto Mulugu unomuummiha murima mutu wenno unafuna liye muummiha murima.

Yengo yowombiwa kinamuruniha ule uiwombile

¹⁹ Mwa eno, mutu unokana yofuka ira: <<Voira mutu kanawanda runiha yenno inafuna Mulugu, nnga Mulugu agamanle muummiha mutu murima, mutule airana yabure, unawanda avi eto welela mutonga?>>

²⁰ Mbwenye kavali wandeya ira mutu unonfuka Mulugu yengo mwasiwa yengo iwombiwe kinawanda nfuka maliba aiwombile ira: <<Udiwombele nni eni?>>

²¹ Kodi maliba womba ulongo kanna utongi ira atukule ulongo mmohive, asakanye yengo imohi yofuna laba mabasa oteteliwa na yengo imohiwa yofuna laba mabasa olramwisiwa? Utongi wenno ukana.

^22-23 Kalaga nnga Mulugu. Kohokalawo atu kawombiwe ira kaonihiwe uwali waye, katolotchiwe. Mulugu ukanamo atu amohiwa aasakunlre liye wanle ira kaonihiwe upama waye, kawendeliwe tangaranga dilukulu. Mulugu okana vilela undimuwa avilelaga na joira ja atu abure ale mwasiwa liye afuna ira atwaye kamuona aatolotchaga abure ale no takaleliwa waye wohokala wa masika na kopolo daye, kawande umbuwela upama undimuwa unna Mulugu.

²⁴ Atu anafuna za ona upama unna Mulugu liye aatolotchaga atu abure ale gu hiyo uniitanile liye. Hiyo atu oitaniwa, kanili aJudewu ve bahi, nari. Kohokalamo oitaniwa aJudewu, kohokalamo oitaniwa ohokala aJudewu.

²⁵ Kalaga nnga mazu Mulugu awongile liye muwari mwa Ozeya ira: <<Ale kahali atwaga, nnoza daaire: <Atwaga.> Eto nlogo neno dahaziveliwe miyo, nnoza dire: <Nlogo neni ti nlogo nnaziveliwa miyo.> >>

²⁶ Mulugu eto ohowonga ira: <<Atu anno kawandeliwe ira: <Nyo kamuli atwaga>, aliwa banafuna za itaniwa: <Ahima a Mulugu Okalawo.> >>

²⁷ Mbwenye zela Ana Izarayeli, namafiyiheda Izaiya ohokuwa ira: <<Masiki aIzarayeli kaindjive nnga miseva da mutcherelani mwa bara, anafuna za vulusiwa ba atu ohala a vang'ono.

²⁸ Mwasiwa Nabwiya unoza aatonge atu atene a ilambo ya vati mokwakwanela eto mohodibeliwa.>>

²⁹ Eto mulombwana Izaiya ohowonga zela yafuna za ireya sogolro eraga: <<Nabwiya wa Makuru Matene ahakale ahanihiyamo hiyo ahima a vang'ono, nakalave nnga akuda Sodoma, eto mwakoka mwene nnga Gomora, atene nagomela malamo.>>

Vulusiwa uli mwa nroromelo hiya mwa malamulo

³⁰ Nagavwile mazwala, jatene eji jinatapulela avi? Ku wonga atu ohokala aJudewu anne kahavendile kala apama banne kagomenle kala atu apama. Upama wewa uzenle mwa nroromelo.

³¹ Eto aIzarayeli kavendile kala apama muwari moharihamo malamulo tchawandile kala apama.

³² Mwasiwa wa nni? Mwasiwa aliwa tchavendile kala apama mwa nroromelo. Mbwenye kavendile kala apama muwari moharihamo malamulo. Fwanyeya ira aIzarayeli kohomala gwagwaduwa na nibwe noagwagwadutcha atu

³³ nnga mulrembele atu mMazuni wanle ira: <<Kaing'anani. Miyo nnohela nibwe muwari mwa Siyawu neno nnafuna gwagwaduwana atu eto nibwe noazuzumiha atu. Mutu wenne unaroromele nibwe nne, kaza anyaswa.>>