Roma 8 - Mazu Otchena a Mulungu

Hiyo atene nnafwanyeya muwari mwa Kiristu kaninna mulandu

¹ Peno atu atene anafwanyeya muwari mwa Yesu Kiristu kinna mulandu uli watene.

² Tchoira hiyo muwari mokala muwari mwa Yesu Kiristu, malamulo ozela Munemba wa ingumi kohonikutcha mwa malamulo a jotega na ukwa.

^3-4 Tchoira Mulugu ohoirana yenno malamulo yahawandile atu irana. Malamulo tchawanda gondjiha jofuna jehu ja maningo ira hiyo niwandege irana joira japama. Mulugu mbwenye ohomuruma Mwanaye na maningo nnga mutu otega ira awatchele mmaningoni mwaye tongiwa wafuna hiyo tongiwa zela jotega jehu ira hiyo niiregena jengo japama jinafwanyeya mmalamuloni muwari mwa Munemba. Ale anawenda na maningo kinawanda irana jengo japama jinafwanyeya mmalamuloni. Anawanda irana gu hiyo atu owenda na Munemba.

⁵ Tchoira ale anawenda na maningo, joumbuwela jiwa jinalimbela pandi ya jofuna ja maningo. Mbwenye ale anawenda na Munemba, joumbuwela jiwa jinalimbela pandi ya jofuna ja Munemba.

⁶ Ale analimbela jofuna ja maningo, goma uwa ku ukwa. Ale analimbela jofuna ja Munemba, anagomela kana ingumi na murendele.

⁷ Tchoira ale analimbela jofuna ja maningo anamuida Mulugu. Atu anno kinavwelela malamulo a Mulugu, tchoira kinawanda.

⁸ Nona ale anawenda na jofuna ja maningo kiza eto kairana yengo yomuziveliha Mulugu.

⁹ Mbwenye akala Munemba wa Mulugu uli mmirimani mwawo, weyo kuli mutu owenda na kopolo da maningo. Uli mutu owenda na kopolo da Munemba. Eto ule ahanna Munemba wa Kiristu, Mulugu amuona, kahi waye.

¹⁰ Maningo anna hiyo bokwene na mwasa wa jotega jehu. Mbwenye voira Kiristu uli mmirimani mwehu, muzimu unna hiyo ukana ingumi. Nihikana ingumi mmuzimuni mwehu mwasiwa Mulugu aniona, unaniona nnga nili apama vamentoni vaye.

¹¹ Voira Munemba wa Mulugu wenno amuvenyihile Yesu mokwani uli mmirimani mwehu, hiyo nakwa, Mulugu mmohive amuvenyihile Yesu Kiristu mokwani unoza avenyihe mokwani maningo ehu okwene ala muwari mwa Munemba wenno uli mmirimani mwehu.

Inafwanela niiregena jofuna ja Munemba Otchena hiya jofuna ja maningo

¹² Nona abalaga nihikana mangawa ira niiregena jofuna ja Munemba. Mbwenye mangawa ninna hiyo kahi mangawa ira niwendegena jofuna ja maningo.

¹³ Tchoira ule unawenda na jofuna ja maningo unokwa. Mbwenye ule unakwiha jofuna ja maningo muwari mwa Munemba, liye kanakwa. Unokana ingumi.

¹⁴ Tchoira atu atene osogolrelriwa na Munemba wa Mulugu banafwanyeya kagali ahima a Mulugu aye.

¹⁵ Tchoira Munemba Otchena nimuwatchenle hiyo kahi munemba oira unonioviha no ova wanna hiyo muuzarini mwehu. Munemba Otchena nimutambinlre hiyo gu Munemba onibeheda nnga ahimaye. Muwari mwa Munemba, hiyo nnomuitana Mulugu: <<Aba! Baba!>>

¹⁶ Munemba mwinnya gunahidedela umboni mmirimani mwehu ira hiyo niiziwe ira nili ahima a Mulugu.

Upama wehu unazela muwari mwa goyi nnafuna hiyo kana

¹⁷ Muwari mokala ana Mulugu, hiyo nnoza nivahiwe upama unna Mulugu. Nnafuna nigane upama wenno Kiristu uvahiwe liye. Ira nivahiwe upama, unazela muwari mwa goyi nnaona hiyo, malringana nionihiwe goyi nnga goyi daonihiwe Yesu ira vasogolro nize nititimihiwe vamohi na liye.

¹⁸ Daira diumbuwele upama unafuna kuma muwari mwa goyi da malambwala, miyo nnoona ira goyi nnaona hiyo malambwala kahi yengo. Goyi nnaona hiyo dihiyana na upama Mulugu unafuna liye za nioniha sogolro.

Mulugu vasogolro unoza atchindje jatene jopandutchiwa ira jikale pama akoka

¹⁹ Vasogolro Mulugu ukana tempu inafuna liye aaoneyihe ahimaye ira iiziweye ira ahima a Mulugu ba ala. Eto fwanyeya ira jatene jopandutchiwa jinnana ing'anela zela tempu inaza Mulugu aaoneyihe ahimaye.

²⁰ Tchoira Mulugu aza aaoneyiha ahimaye, tchi tempu imohive inafuna liye za tchindja jatene jopandutchiwa. Wanle Mulugu ohotonga jatene jopandutchiwa ira jionihiwe goyi. Jengo jopandutchiwa kajasakunlre oka ira jikayena goyi mbwenye ali funa wa Mulugu modediha ira:

²¹ <<Malambwala jatene jopandutchiwa jihikana goyi. Mbwenye vasogolro miyo nnoza disakanye ira jengo jatene jopandutchiwa jihiye makalelo ovunda a malambwala.>> Mulugu aza atchindja jatene, pa evale vanafuna jatene jopandutchiwa jipwaseye na upama wenno unafuna ahima a Mulugu kakayena.

²² Tchoira hiyo nihiiziwa ira jatene jopandutchiwa na vanove jinodumbela nnga muhiyana afunaga bala.

²³ Eto kahi jopandutchiwave jinadumbela. Na hiyene atu olawiha japama ja Munemba, ninnana dumbela mmirimani mwehu niing'anelaga behediwa nnga ahima. Behediwa wewo ku womboliwa maningwihu.

²⁴ Tchoira kuma vavulusiwe hiyo, nnadedihave ira maningwihu ala kaze kawomboliwe. Fwanyeya ira dediha yengo inaona we, kahi dediheda. Tchoira kalivo unadediha yengo inna liye.

²⁵ Akala hiyo ninnave dediha yengo yahanaona hiyo, ku wonga ira nnadediha muwari movilela.

²⁶ Vamohive vevo muwari modediha, Munemba unonikamiheda hiyo tempu inavuta hiyo. Tchoira vamohi vuwa hiyo kannaiziwa pama makalelo ofwanelela ira hiyo nilobele mbwenye ora yenno Munemba unokala vari va hiyo na Mulugu, anilobelelaga, adumbelaga na makalelo ohoiziweya, anno uiziwile liye ekave.

²⁷ Mulugu wenno unaiziwa jinafwanyeya mmirimani mwa kada mutu, unoiziwa joumbuwela ja Munemba. Tchoira Munemba wenno unanilobelela vari va hiyo atu otchenihiwa na Mulugu, unalobela nnga mwemo munafunela Mulugu.

Jatene jinaireya jinokana mpindu zela atu anne anamuziveliwa Mulugu

²⁸ Hiyo nihiiziwa ira jatene jinaireya, Mulugu unosakanya ira jiwande awendela pama atu anne anamuzivela Mulugu eto anno uaitanne liye mofuna mwaye.

²⁹ Tchoira ale aasakunlre Mulugu wanle, banno aafunnena liye ira katukule makalelo a Mwanaye Yesu ira Yesu akale Mwana Murandji, aakayena abalaye oindjiva owenda na makalelo aye.

³⁰ Ale aafunne Mulugu ira katukule makalelo a Mwanaye, banno aaitanile liye. Ale aaitanile liye, banno aakalihile liye apama. Ale aakalihile liye apama, banno aatitimihile liye.

³¹ Kodi nnafuna niwonge avi muwari mwa jatene eji? Akala Mulugu gunanisogolrelra, kodi bani unafuna nigondjiha?

³² Tchoira Mulugu kamupoparile Mwanaye. Amurumile Mwanaye Yesu ira aze apiwe ira hiyo nikale pama. Akala Mulugu univahile Mwanaye Yesu ira nikale pama, kodi agamanle nivaha Yesu, Mulugu na sayi daye kananivaha jengo jili jatene? Unonivaha.

³³ Kodi mutu guvi unawanda musumela mutu umusakunlre Mulugu? Kalivo. Tchoira Mulugu gunamukaliha wapama.

³⁴ Nnga kodi bani unafuna mmanga mulandu? Kalivo. Mwasiwa Yesu Kiristu wenno akwile eto avenyihiwa mokwani, gunanilobelela vari va hiyo na Mulugu. Liye unafwanyeya agali muwononi odjana wa Mulugu.

Kilivo yengo inawanda nimwalaniha no niziveliwa wa Kiristu

³⁵ Kodi mutu guvi unafuna nimwalaniha hiyo no nizivela wa Kiristu? Kodi segedeya nari zuzumihiwa nari harahariwa nari ndala nari usiwa nari jowopiha nari piwa na supada, kodi ejo jinowanda nimwalaniha no nizivela wa Kiristu? Nari.

³⁶ Inakala nnga mazu kalrembiwe wanle oira: <<Nabwiya, hiyo ninnana piwa malambo matene zela nzina nenyu. Ananiwesa nnga nili mabila ofwanela piwa.>>

³⁷ Mbwenye muwari mwa jabure jatene eji, hiyo ninnana gondjiha eto nihikwaranya vogondjiha, muwari mwa wenno unizivenle.

³⁸ Mwasiwa miyo dihikana ibaribari ira kilivo yengo ili yatene inawanda nimwalaniha hiyo no nizivela wa Mulugu. Nne ukwa, nne ingumi, nne angelro, nne minemba dabure, nne jengo ja tempu ili hiyo ila, nne jengo ja tempu inafuna za, nne kopolo dili datene,

³⁹ nne gwela zulu, nne masiki dowa vati, masiki yengo ili yatene inafwanyeya mwatene mwene mupandutchile Mulugu, kilivo yengo ili yatene inawanda nimwalaniha hiyo no niziveliwa wa Mulugu, wewo unafwanyeya muwari mwa Nabwiya wehu Yesu Kiristu.