Roma 7 - Mazu Otchena a Mulungu

Malamulo analaba nnga muhiyana vabandjani vaye

¹ Abalaga, miyo nnowonga na nyo atu oiziwa malamulo. Ndoweni niumbuweleni zela malamulo makalelo analaba atu. Malamulo anamutonga mutu fiyeda ukwa waye.

^2-3 Tempu ili hiyo ila nkani zela malamulo unafwalrafwana nnga muhiyana oteliwa. Muhiyana agateliwe, malamulo anamutonga ira avwelelege bandja na mamunaye fiyeda ukwa waye. Mwa enne muhiyana amuhiya mamunaye vande, adowa akala na mulombwana mmohiwa, pa evale vanaitaniwa liye puta. Mbwenye muhiyanole mamunaye agakwile, voira liye gu mudiye, kuma evo malamulo kinamutongave ira anvwelelege mamunaye. Kavali nlamulo nnawendana liye. Evale avenya, ateliwa na mulombwana mmohiwa, kahi puta.

⁴ Kalaga nnga nyo abalaga, na nyenne muwari mwa mabasa alabile Kiristu na maningwaye, wenda na malamulo uhumala. Mulugu amalihaga tempu yowenda na malamulo ali ira hiyo niwande wenda na mutu wenno uvenyihiwe mokwani, niwande vaha misapo dapama ira Mulugu ateteliwe.

⁵ Tchoira tempu yawenda hiyo na jofuna ja maningo, jofuna janna hiyo josimbwa na mwasa wa malamulo, hiyo iragave simbwa irana jotega jile. Ora yenno misapo davaha hiyo dali misapo donikwiha.

⁶ Mbwenye peno nihimala kutchiwa zela wenda na malamulo, mwasiwa nihimala kwa zela yenno yanimangile. Mulugu unikutchele wenda na malamulo kalrembiwe wanle ira niwendegena makalelo maxa anafwanyeya mwa Munemba.

Malamulo kahi yengo yotega, mbwenye anamuoniha mutu jotega jaye

⁷ Nnga vire hiyo nikutchiwa zela wenda na malamulo, nnafuna niwonge avi? Kodi malamulo tchi yengo yotega? Nari, nne vang'ono! Tchoira dahaiziwa malamulo, miyo kadaiziwa jotega. Mwasiwa ahakala malamulo kawonga ira: <<Kusilrilre>>, miyo kadaiziwa ira silrilra tchi yengo yabure.

⁸ Mbwenye voira miyo dohokana jofuna ira diiregena jotega, jotega johotukula nlamulo noira <<kusilrilre>> nne, roma disimbwihagana. Miyo iragave simbwa silrilra, dowagave sogolro. Muwari mwa nlamulo, jotega joditabwiha. Mbwenye wahali malamulo, tega kuliwo.

⁹ Wanle tempu yali miyo dahanaiziwe malamulo, miyo daviona ira dili okalawene. Mbwenye vere miyo diiziwa malamulo, jofuna janna miyo joirana jotega johovenya. Novenya, miyo tega. Dagategile pazile miyo onelramo ira miyo nnawenda okwene.

¹⁰ Fwanyeya ira nlamulo neno nafuna divaha ingumi, tidizelena ukwa.

¹¹ Tchoira dagavwile nlamulo noira kusilrilre, jofuna janna miyo ira diiregena jotega jotukula nlamulo neno, dinyenga ira disilrilrege. Jofuna jaga jile aliwa mala dipa na nlamulo nne.

¹² Fwanyeya ira malamulo botchena. Kada nlamulo totchena, ta pama, towongowa.

¹³ Kodi yali yengo yapama tcheniyo idipile miyo? Nari, nne vang'ono! Kahi nlamulo nidipile miyo so jofuna jaga joirana jotega ti jejo jidipile muwari mwa yengo yapama. Muwari mwa nlamulo puzile oneya pama pama ira jotega jinna miyo ti jotega jotakala kwaranya. Ala ba mazu a Pawulo zela makalelo a mutu omuroromela Yesu owenda na kopolo daye hiya kopolo da Mulugu. Mutu na kopolo daye kanawanda irana joira japama. Masiki mutu agavulusiwe, funave ira airegena japama unokana, mbwenye mwa kopolo daye kanawanda irana yapama inafuna liye irana mwasiwa unokanave jofuna ira airegena jotega.

Zela Roma 7:14-25 Kalivo mutu unawanda irana japama mwa kopolo daye

¹⁴ Tchoira hiyo nihiiziwa ira malamulo tchi yengo ya Munemba. Miyo mbwenye dili na jofuna ja maningo. Miyo eto na kopolo daga dili nnga muzari owanda irana jofuna ja maningo bahi.

¹⁵ Inera miyo kadizi, tchoira yenno inafuna miyo irana, yengo yenno kannairana. Eto yenno inaida miyo, tchinairana miyo.

¹⁶ Akala miyo nnoirana jengo jahanafuna miyo irana, miyo nnorumela ira malamulo bapama.

¹⁷ Fwanyeya ira dairana yengo yahanafuna miyo irana, kahi miyo. Ti jotega jinna miyo mmaningoni mwaga.

¹⁸ Tchoira dihiiziwa ira muwari mwa miyo, mmaningoni mwaga mu, kamuli yengo yapama. Tchoira miyo nnofuna nnga diirena yengo yapama eto na mwasa wa jofuna ja maningo, kannawanda.

¹⁹ Miyo kannawanda irana japama jinafuna miyo irana. Mbwenye jabure jejo jahanafuna miyo irana, ti jejo jinerana miyo.

²⁰ Akala miyo nnoirana jahanafuna miyo irana, ku wonga kahi miyo. Ti jotega ejo jinafwanyeya muwari mwa miyo.

Inafwanela Mulugu atamaleliwe mwasiwa gu liyene unafuna nivuna mwa jotega jehu

²¹ Eto fwanyeya ira inaireya tchi ila. Ora inafuna miyo nnga diirena yengo yapama, ora yenno inadikwivela ku irana yabure.

²² Tchoira mmirimani mwaga, miyo nnoziveliwa malamulo a Mulugu.

²³ Eto mmaningoni mwaga, munafuna jotega. Jotega jile jinowana kondo na yengo yapama yafuna miyo irana mmirimani mwaga. Jotega jile jinodihinda miyo ira dikale muzari oirana jabure.

²⁴ Miyo dili mutu owendiha tangaranga! Nnga unafuna divuna mwa jofuna ja maningwaga bani?

²⁵ Unafuna divuna gu Mulugu! Nona Mulugu atamaleliwe mwa Nabwiya wehu, Yesu Kiristu! Fwanyeya ira miyo damwinnya na joumbuwela jaga, nnafuna diiregena makalelo a Mulugu. Eto zela jofuna ja maningwaga, miyo nnairana makalelo otega.