Roma 6 - Mazu Otchena a Mulungu

Hiyo atu niireliwe sayi, kanitegegeve ira sayi da Mulugu diindjivege

¹ Kodi nagavwile ira sayi da Mulugu dihikwaranya jotega, niire avi? Kodi inafwanela hiyo atu nitegegeve ira sayi da Mulugu diindjivegeve?

² Nari, nne vang'ono! Kodi vinawandeya avi ira hiyo niwendege motegani akoka agali hiyo nihimala kwa zela jotega?

³ Kodi kamuiziwile ira hiyo nibatiziwaga muwari mwa Yesu Kiristu, yafwalrafwaniha nnga nihikwa vamohi na Yesu?

⁴ Hiyo nibatiziwaga, yafwalrafwaniha nnga nibwinihiwe vamohi na Yesu mokwani ira mawendelo ehu a wanle kamale. Ali ira sawasawa nnga Kiristu agakwile, Baba na kopolo daye ohonvenyiha mokwani anvahaga ingumi ixa, na hiyene niwendegena ingumi ixa.

⁵ Tchoira muwari mogumanihiwa na Yesu, inakala nnga nihikwa ukwa nnga ukwile Yesu. Sawasawa nnga Mulugu ohonvenyiha Yesu mokwani, Mulugu univenyiha mokwani ira niwendege na makalelo maxa.

⁶ Hiyo nihiiziwa ira makalelo nawendana hiyo jotega malambo a mundulri, Mulugu utukula, liye komela vamuradini vamohi na Yesu ira jofuna ja maningo jikwe ira nahawendege nnga azari a jotega.

⁷ Tchoira ule ukwile umala kutchiwa mmandani mwa jotega.

⁸ Akala mawendelo ehu a wanle kohomala kwa vamohi na Kiristu, hiyo nnororomela ira nnokalawo vamohi na liye.

⁹ Hiyo nihiiziwa ira Kiristu muwari movenya mokwani kaza awelela kwa akoka. Ukwa eto kuza ukana utongi omugondjiha.

¹⁰ Tchoira kwa wakwile liye fendo imohive yenne bahi, walabile zela jotega. Mbwenye ingumi inna liye tchineneva, unna ingumi ira liye alabegenave jofuna ja Mulugu.

¹¹ Inafwanela muvibalre ira muhumala kwa zela jotega eto muhuvahiwa ingumi ixa mwa Yesu Kiristu ira muiregena jofuna ja Mulugu.

Yali yapama mutu avivelele wa Mulugu wenno unvahile ingumi

¹² Akala muhumala iziwa ira muhuvahiwa ingumi ixa, kamuhiye ira jotega jitongege maningo enyu okwa, nyo tukulaga jano jenyu labagana ira muiregena jotakala jinafuna maningo.

¹³ Eto nne kamutukule jano jenyu nyo labagana jotega. So mbwenye ili yapama mutu avivelele wa Mulugu wenno univahile ingumi hiyo okwene, avelele jano jaye wa Mulugu ira alabegena jengo japama.

Jotega kajinawanda nigondjiha mwasiwa nnawenda na sayi da Mulugu

¹⁴ Kavali wandeya ira jotega jiwande nigondjiha mwasiwa hiyo kannawenda na malamulo. Nnawenda na sayi da Mulugu.

¹⁵ Nnafuna nire avi? Kodi inafwanela nitegegeve na mwasa oira hiyo kannawenda na malamulo mbwenye nnawenda na sayi da Mulugu? Nari, nne vang'ono!

¹⁶ Kodi nyo kamuiziwile ira mutu gu muzari wa mutu wenno unanvwelela liye? Wairana jotega, we uli muzari wa jotega ejo jinahara we eto unagomela kwa. Mbwenye we wamukana wenno unanvwelela we unafwanyeya agali Mulugu, we uli muzari wa Mulugu wenno unamuhara we. Unagomela kana mawendelo apama.

¹⁷ Mbwenye Mulugu atamaleliwe, mwasiwa agali nyo wanle mwali azari ohara jotega, malambwala muli atu ovwelela na mmirimani mwenyu mwatene jejile jifundjihiwe nyo.

¹⁸ Mulugu atamaleliwe mwasiwa muhuwanda kutchiwa mwali nyo azari ohara jotega. Peno eni muli azari ohara joira japama.

¹⁹ Miyo nnawonga na makalelo nnga atu a mwilamboni mwasiwa muli orutcha onelramo. Nyo wanle mwatukula maningwinyu ira kakale azari olaba joraruwa na ejo jinakondiha malamulo. Mwadowave sogolro simbwagave irana jinakondiha malamulo. Peno va mofutukula inafwanela mutukule maningwinyu ira kakale azari olaba jengo japama. Mwairana eno, goma uwa, mawendelo enyu anotchenihiwa.

²⁰ Ora yali nyo azari olaba jotega, kilivo yengo yapama mwairana nyo.

²¹ Kodi tempu yairetcha nyo jejo jinaunyaswihani peno va, mwafwanyilemo mpindu guvi? Mpinduwa so ali ukwa bahi.

²² Mbwenye muhumala kutchiwa muuzarini mwa jotega mwafwanyeya nyo. Peno muli azari a Mulugu. Mbwenye mpindu zela kala azari a Mulugu, mawendelo enyu anotchenihiwa. Muwari motchenihiwa mule, goma uwa ku kana ingumi yohomala.

²³ Yotambilra ya yotega ku ukwa. Mbwenye mahala unavaha Mulugu muwari mwa Nabwiya wehu Yesu Kiristu anozana ingumi yohomala.