Roma 5 - Mazu Otchena a Mulungu

Hiyo nihiwandana na Mulugu muwari mwa Yesu Kiristu

¹ Nona, voira hiyo nihimala kalihiwa apama mwa nroromelo, hiyo peno nihiwandana na Mulugu muwari mwa Nabwiya wehu Yesu Kiristu.

² Muwari mwa liye eto muwari mwa nroromelo, nihiwanda volowa muwari mwa sayi da Mulugu dedo nnawendana hiyo. Eto ninna hagalala mwasiwa nihiiziwa ira vasogolro nnoza nione undimuwa wa Mulugu.

³ Eto hiya yennove bahi, hiyo nafwanyeyana makatamiho nnowanda hagalala, tchoira nihiiziwa ira vilela unazela muwari mwa makatamiho.

⁴ Eto vilela ule unozana wenda na makalelo ofwanela. Eto wenda na makalelo ofwanela unozana hiyo kala oing'anela ja sogolro.

⁵ Yoing'anela inna hiyo kinagomela nivaha manyazo mwasiwa Munemba Otchena Mulugu univahile liye unoniiziwiha hiyo mmirimani mwehu ira na ibaribari Mulugu unoniziveliwetchetcha.

⁶ Tchoira tempu yali hiyo ovuta na mwasa wa jotega jehu, tempu yagakwakwanne, tchi tempu yenno Kiristu azile liye nikwela hiyo atu abure.

⁷ Tchoira ili yorutcha mutu mukwela nfwaye owongowa. Mbwenye mutu afuna, podi za vilevela mukwela mutu wapama.

⁸ Mbwenye Mulugu unanioniheda nizivela waye ulukulu tchoira tempu yali hiyo otegene, tchi tempu yanikwenle Kiristu.

Yesu kaza aimwanana nivunela mwa uwali wa Mulugu unafuna za

⁹ Akala hiyo nikalihiwe apama muwari mwa sangiri na Yesu, Yesu kaza aimwanana nivulusa mwa uwali wa Mulugu unafuna za.

¹⁰ Tchoira akala ora yali hiyo amwidani a Mulugu, nihiwandanihiwa na Mulugu muwari mwa ukwa wa Mwanaye, kodi ora nili hiyo owandanene na Mulugu, Yesu unoza anihiye? Nari. Kaza anihiya. Yesu mwinnya unoza anivuluse mwasiwa liye na vanove ukalawo.

¹¹ Eto hiya yennove bahi, hiyo nnokana hagalala zela Mulugu muwari mwa Nabwiya wehu Yesu Kiristu wenno uniwandanihile na Mulugu.

Ukwa uvolowile muwari mwa Adawu, ingumi ivolowile muwari mwa Kiristu

¹² Tega uvolowaga mwilamboni ya vati, wazile volowa mwa mutu mmohi, mulombwana Adawu. Mutu wenno nomutegela Mulugu, ku za wa ukwa. Evale ukwa wohoroma mwadeya para atu atene mwasiwa atene kohotega.

¹³ Masiki malamulo kahanakalewo, tega mbwenye wohokalawo. Mbwenye Mulugu kanahela konta ya jotega wahali malamulo.

¹⁴ Eto kuma Adawu fiyeda tempu yawandeliwe Mozeji malamulo, atu atene kerave kwa. Masiki ale kategile na mategelo ohiyana na jairile Adawu, atene kohokwa. Adawu ali mbwiye airilena yengo ilukulu yofiyeda mwadeya mwa atu atene sawasawa nnga Mbwiye mmohiwa afuna za.

¹⁵ Mbwenye yengo yovahiwa yenno inavaha Mbwiye mmohiwa unairiwa Yesu Kiristu inohiyana na yoviringaniha ya mulombwana Adawu. Tchoira akala atu oindjiva kohokwa muwari mwa yotega ya mutu mmohi, oindjiva kohowanda vilringulriwa mwa sayi da Mulugu muwari mwa yovaha ya sayi inazela muwari mwa Yesu Kiristu.

¹⁶ Eto yovahiwa ile kinalingana na ukwa wewo unakumela yotega ya mutu mmohi. Tchoira yoviringaniha imohi yohozana mangiwa mulandu mbwenye muwari mwa yengo yovahiwa inavaha Yesu, mutu masiki agategile fendo didjindji, unowanda kalihiwa wapama vamentoni va Mulugu.

¹⁷ Akala muwari mwa yoviringaniha ya mutu mmohi, ukwa wohokana utongi muwari mwa yotega imohi yenne, inafwanela niiziwe ira ale anawatchela sayi dilukulu na yovaha ya sayi, anoza kakayena utongi ozela ingumi ya ibaribari muwari mwa mutu mmohi Yesu Kiristu.

¹⁸ Fwanyeya ira sawasawa nnga yotega imohi yerile mulombwana Adawu yokwakwana ira atu atene kamangiwe mulandu, yengo imohi yapama yerile Yesu yokwakwana ira atu atene kakale apama eto ira kakayena ingumi.

¹⁹ Na mwasa ohovwelela wa mutu mmohi, atu adjindji kohomala tega. Eto na mwasa ovwelela wa mutu mmohi, atu adjindji anokalihiwa apama.

²⁰ Malamulo kazile vari na vari ira jotega jiindjive. Mbwenye masiki jotega jagaindjivile, sayi dilukulu da Mulugu dihikwaranya jotega jile

²¹ ira na makalelo mamohive nnga jotega janna atu utongi ozela ukwa, sayi da Mulugu diwande kana eto utongi zela ingumi yohomala muwari mwa Nabwiya wehu Yesu Kiristu.