Roma 4 - Mazu Otchena a Mulungu

Abarahamu ohorumeliwa na Mulugu muwari mwa nroromelo

¹ Kodi inafwanela niwonge ira nikolo nehu Abarahamu ira akalihiwe wapama vamentoni va Mulugu ali na mwasa wa mabasa alabile liye? Nari.

² Tchoira Abarahamu ahakale wapama muwari mwa joira jaye, erege wanda vititimiha. Mbwenye voira liye karumeliwele mwa joira jaye, nona kanawanda vititimiha vamentoni va Mulugu.

³ Kodi Mazu anawonga avi zela Abarahamu? Anawonga ira: <<Abarahamu ohomuroromela Mulugu. Nona Mulugu ohomuona nnga wapama mwasiwa liye ohomuroromela.>>

⁴ Zela mutu wenno unalaba, yotambilra yaye kahi yengo yovahiwa mbwenye tchi yengo yofwanela zela mabasa ulabile liye.

⁵ Mbwenye kala wapama vamentoni va Mulugu kunazela muwari motambilra zela mabasa nnalaba hiyo. Tchoira mutu wenno ahanalaba, mbwenye unamuroromela Mulugu wenno unaakaliha pama atu abure, mwa nroromelo naye neno bahi, Mulugu unomuona mutule ira gwapama.

⁶ Eto zela relihiwa wa mutu wenno Mulugu unamuona liye wapama hiya kala wapama mwa mabasa alabile liye, mulombwana Davi na liyene unawonga ira:

⁷ <<Orelihiwa gwenno unaleveleliwa joviringaniha jaira liye eto ahanafwanyeyana jotega mwasiwa jotega jaye jihimala kuneliwa.

⁸ Orelihiwa gwenno Nabwiya unatimiha liye jotega jaye.>>

⁹ Kodi zela relihiwa moleveleliwa jotega, anarelihiwa ba atu anne kaineliwe na makalelo awongile Mulugu bahi? Ale kahaineliwe kodi kinarelihiwa? Anorelihiwa, tchoira nihimala wonga ira Abarahamu ira liye akale wapama, amuroromenle Mulugu bahi, evale Mulugu ohomuona nnga mutu wapama.

¹⁰ Ira Mulugu amuone Abarahamu nnga mutu wapama ali moira avi? Kodi arumeliwe ahanaineliwe owu againeliwe? Kaali againeliwe mwasiwa Mulugu amuonne nnga mutu wapama ahanaineliwe.

¹¹ Mulugu amuwandelaga joineliwa, liye afwanyeya agalive wapama vamentoni vaye. Ineliwa ali ionihedo zela upama wanna liye momuroromela Mulugu. Liye ohoroma muroromela Mulugu ahanaineliwe.

¹² Mulugu anvulusile Abarahamu ahanaineliwe ira liye akale nnga babi wa atene ale kafuna za kalihiwa nnga atu apama momuroromela Mulugu ahali muwari moineliwa. Eto liye gu babi wa atene kaineliwe eto anawenda na makalelo omuroromela Mulugu nnga jairile liye wanle ahanaineliwe.

Tambilra jengo japama unazela muwari mwa nroromelo

¹³ Mulugu omuwandela mulombwana Abarahamu na ahimaye a musogolro nipangano naye ira jatene jene jinafwanyeya mwilamboni ya vati jinafuna jikale jewa. Nipangano nne, Mulugu kanvahile na mwasa oira Abarahamu okwakwaneliheda malamulo mbwenye anvahile moira liye okalihiwa wapama momuroromela Mulugu.

¹⁴ Tchoira hiyo atu ahakale nifunaga tambilra jengo japama muwari moharihamo malamulo, muroromela Mulugu kwakana mabasa eto nipangano napanganne Mulugu na Abarahamu nakalave eno, kanakana mabasa.

¹⁵ Tchoira malamulo anamuzelana mutu uwali wa Mulugu. Mbwenye wewo wahali malamulo, kuli viringaniha.

¹⁶ Mulugu opangana ira anvahe Abarahamu jatene muwari momuroromela ira ahimaye a musogolro kawande vahiwa jengo mwa sayi da Mulugu. Ahimiwa kahi so aJudewu anawendana malamulo bahi mbwenye tambe ba atu anno kahanawendana malamulo, malringana wenno unna nroromelo nnga na Abarahamu, wenno uli babi wa hiyo atu atene omuroromela Yesu.

¹⁷ Kalaga nnga ilrembiwe mMazuni ira: <<Miyo dihimala usakanya ira weyo ukale babi wa malogo oindjiva.>> Abarahamu agavwile nipangano nne, omuroromela mohowanganyeda Mulugu wenno unanvenyiha mutu mokwani eto unakalihawo yengo mowonga bahi yenno yali yahanakalewo.

¹⁸ Agali kaanna yodediha ira ambale mwana, liye ohororomela ira Mulugu unomukaliha baba wa malogo madjindji, nnga mwawandeliwele liye ira: <<Ahimawo anoza kakale oindjiva nnga nyenyedi.>>

¹⁹ Ora yenno Abarahamu okana wandamelana yaka 100 eto ohoiziwa ira: <<Miyo dihimala ulula, nnawenda okwene eto muhiyanaga Sara gu ngomwa.>> Mbwenye muwari mwa jatene ejo, liye amuroromelave Mulugu.

²⁰ Agavwile nipangano na Mulugu, kawanganyedile nne kakukumuwile. Liye alimbihave nroromelo naye amutitimihaga Mulugu

²¹ aganna ibaribari ira Mulugu ukana kopolo dokwakwaneliheda jatene jiwongile liye.

²² Muwari mwa nroromelo naye, pa evale vazile Mulugu muona Abarahamu nnga wapama.

Mulugu unaaona atu omuroromela Yesu nnga apama vamentoni vaye

²³ Mbwenye mazu kalrembiwe oira: <<Mulugu ohomuona Abarahamu nnga wapama.>>, kizenle para Abarahamu eka, nari.

²⁴ Mazu anno banno kafiyedile mwa hiyo atu omuroromela Mulugu wenno unvenyihile Nabwiya wehu Yesu mokwani.

²⁵ Yesu anikwenle ira joviringaniha jehu jileveleliwe eto ohovenyihiwa mokwani ira nikale apama vamentoni vaye.