Roma 3 - Mazu Otchena a Mulungu

Kala muJudewu unna mpindu otambilra mazu a Mulugu

¹ Akala ineliwa kunanvulusa mutu, nnga baliwa muJudewu unna mpindu nni? Kodi ineliwa na makalelo a aJudewu kunna mpindu?

² Ukana. Baliwa muJudewu ukana mpindu na makalelo madjindji. Tchoira voroma vene, Mulugu aavahedile aJudewu jowonga jaye ira jikale mmandani mwewa.

³ Eto fwanyeya ira aJudewu kagavahediwe mazu a Mulugu, amohiwa mbwenye mazwale kiharihilemo. Muwari mohowanda aharihamo mazwale, kodi ku wonga Mulugu gohororomeleya?

⁴ Nari, nne vang'ono! Inafwanela niiziwe ira masiki atu atene kakale atu onama, Mulugu mbwenye gwa ibaribari. Kalaga nnga ilrembiwe mMazuni ira: <<Nyo Mulugu mwawonga, gunafwanyeyana razawu. Nyo Mulugu munoagondjiha atene ofuna usumelani.>>

Yowonga ya Pawulo zela jonama jaumbuwela atu

⁵ Atu amohiwa anawonga ira: <<Akala ubure wehu unaoniha upama wa Mulugu, kodi Mulugu kanairana yengo yabure anitongaga mwa uwali?>>

⁶ Nari, nne vang'ono! Ahakale nnga Mulugu ahamutongaga mutu otega, liye kamutonga nne mutu mmohi wa mwilamboni.

⁷ Atu amohiwa aliwa podi wonga ira: <<Danama, pinaoneya pama ibaribari ya Mulugu eto muwari mwa yonama yaga atu anamutitimihege Mulugu. Nnga mwasiwa gwa nni danamaga Mulugu funaga jodimanga mulandu nnga mutu otega?>>

⁸ Kalaga nnga atu amohiwa ananinukeda ira: <<APawulo analaleya ira: <Ndoweni niiregena ubure ira uze upama.> >> Atene oninukeda eno, Mulugu unoza aatonge na matongelo a ibaribari.

Atu atene botega, masiki aJudewu nari atu ohokala aJudewu

⁹ Nera eno, nigomenleni avi? Kodi hiyo aJudewu nnafwanyeya nagali atu apama hiyanihana na atu ohokala aJudewu? Nari. Nne vang'ono. Nihimala ona ira atu atene, aJudewu nari atu ohokala aJudewu, atene nnafwanyeya nagali atu otega, atu ofwanela tongiwa zela jotega jehu.

¹⁰ Kalaga nnga ilrembiwe mMazuni ira: <<Kalivo mutu wapama, nne mmohi.

¹¹ Kalivo unaonelramo. Kalivo unafuna nvenda Mulugu.

¹² Atu atene kohomala peruwa peruwa, kinna mabasa. Kalivo unera upama, nne mutu mmohi.

¹³ Jowonga jiwa jinafwalrafwana na masiye kahavuheleliwe. Nlumi newa nnawonga joaxangela afwiwa. Mazu ewa anakala nnga luma wa ivili.

¹⁴ Muwano mwewa munakumela joatembelrelra afwiwa na jonyunya.

¹⁵ Aliwa manyalo ewa anatamangelana vuviha sangiri na afwiwa.

¹⁶ Mwatene munavira atu, munafwanyeya nongeya no segedeya.

¹⁷ Ndila yozana murendele kiiziwile.

¹⁸ Vamentoni vewa, Mulugu kahi yengo nne kinamuova.>>

Mabasa a malamulo

¹⁹ Hiyo nihiiziwa ira malamulo kohovahedeliwa atu anno katongiwe ira kaharihegemo malamulo ira kagaonne rutcha wa malamulo, kahakayena yowonga eto atu atene a ilambo ya vati kagwena mulandu vamentoni va Mulugu.

²⁰ Tchoira kavali mutu unakala wapama vamentoni va Mulugu muwari mohara malamulo. So malamulo anamuiziwiha kada mutu jotega jaye.

²¹ Mbwenye malambwala, kohooneya makalelo okala wapama vamentoni va Mulugu ahali mohara malamulo. So mbwenye malamulo a Mulugu na mazu kalrembiwe na anamafiyiheda anawonga ibaribari zela makalelo para mutu kala wapama.

²² Makaleluwa boira mutu unakala wapama vamentoni va Mulugu muwari momuroromela Yesu. Mutu uli watene unamuroromela Yesu Kiristu, gunakala wapama vamentoni vaye. Tchoira kavali hiyana mwa atu.

²³ Hiyo atu atene nihimala tega eto nnafwanyeya olapela wene na undimuwa wa Mulugu.

²⁴ Mbwenye Mulugu mwa sayi daye, mutu unowanda kala wapama muwari mwa Yesu Kiristu. Kala wapama muwari mwa hiyo atu tchi yengo yovahiwa muwari mowomboliwa wewo unafwanyeya muwari mwa Yesu Kiristu.

²⁵ Mulugu amurumile Yesu ira aze avuvihe sangiri naye ira mutu amuroromela, Yesu mwa sangiri naye amalihena uwali wanna Mulugu zela mutule. Mulugu ohoirana eno ira aonihe ira liye gowongowa, tchoira wanle Yesu ahanaze Mulugu movilevela mwaye, ohiya vammambalo jotega ja atu.

²⁶ Tempu ili hiyo ila, nagaonne ukwa wa Yesu vamalroni va hiyo atu, hiyo nnowanda ona ira Mulugu kahi mutu olramwisa jotega mbwenye Mulugu gowongowa. Muwari mwa ukwa wa Yesu, Mulugu unomukaliha pama mutu wenno unamuroromela Yesu.

Pawulo ohogwiha vitetela wa aJudewu

²⁷ Vitukulela wa hiyo aJudewu ugomenle avi? Eni umala. Mwasiwa gwa nni? Mwasiwa hiyo kannavulusiwela moharihamo malamulo anawendana hiyo. Vulusiwa wehu unazela momuroromela Yesu.

²⁸ Tchoira hiyo nihirumela ira mutu unakalihiwa wapama muwari momuroromela Yesu bahi, hiya moharihamo malamulo.

²⁹ Kodi Mulugu gwa aJudewu bahi? Kodi liye kahi Mulugu wa atu ohokala aJudewu? Mulugu mmohive gu Mulugu wa atu atene.

³⁰ Atu atene anafuna vulusiwa, anafuna kavulusiwe na makalelo mamohive. Nona Mulugu unamuona ule unamuroromela Yesu nnga mutu wapama vamentoni vaye malringana mutu uli watene, masiki muJudewu nari mutu ohokala muJudewu.

³¹ Kodi hiyo nawonga ira mutu unavulusiwa momuroromela Yesu, kanikwihile malamulo? Nari, nne vang'ono! Nihirumelela malamulo.