Roma 2 - Mazu Otchena a Mulungu

Matongelo a ibaribari a Mulugu

¹ Kohokalawo atu amohiwa anaatonya afwiwa ira nyo muli anamatega ofwanela tongiwa na Mulugu. Eto fwanyeya ira muwari moatonya afwiwa, aliwa anavigwihana mulandu oka. Tchoira na aliwene ba anamatega, anaira jimohive nnga jinaagwihana atu mulandu afwiwa.

² Hiyo nihiiziwa ira Mulugu aatongaga atwale oatonya afwiwa, unosasanya pama.

³ Aliwa kaamangaga mulandu afwiwa eto amala kairagana jengo jimohive jejo jinaamanga atu mulandu afwiwa jile, kodi anaumbuwela ira anokana makalelo otawa matongelo a Mulugu?

⁴ Kagarati, kaona upama watene unaairela Mulugu eto kaona liye avilelaga, ahaatongaga mobaranya, anaumbuwela ira nili apamene eto kinawanda umbuwela ira Mulugu unaniirela upama ira nitwaruwe.

⁵ Aliwa muwari mokana mirima dovanda eto mohofuna twaruwa mule, anamukoyiha Mulugu jotega jiwa ira nafiya siku nivitanle liye ira aatonge atu na matongelo a ibaribari, kaze kaonihiwe takaleliwa wohokala wa masika wa Mulugu,

⁶ wenno unafuna aze amutonge kada mutu zela mabasa alabile liye.

⁷ Ale kavilenle irana joira japama muwari mofuna upama wa ibaribari, no titimihiwa na Mulugu, na ingumi yohokana goma uwa, Mulugu unoavaha ingumi yohomala.

⁸ Mbwenye ale anerana jofuna jiwa, ale kahanairana jengo ja ibaribari, ale anahara jotakala, aliwa mbwenye anagomela tambilra uwali no takaleliwa wohokala wa masika wa Mulugu.

⁹ Atene anairana jabure romana aJudewu, gomihedaga atu ohokala aJudewu, aliwa anaing'anela tambilra goyi no tabuwa.

¹⁰ Mbwenye atu atene oirana japama anoza katambilre upama no titimihiwa na murendele, romana aJudewu, gomihedaga atu ohokala aJudewu.

¹¹ Mwasiwa Mulugu kanna nsakulro.

Kada mutu unoza atongiwe zela malamulo aiziwile liye mmirimani mwaye

¹² Tchoira atu atene kategile muwari mohoiziwa malamulo, anotolowa muwari mohoiziwa malamulo. Eto kinatolowela zela malamulo kahaiziwile atu. Eto atene oiziwa malamulo, kamutegela Mulugu anoza katongiwe zela malamulo kaiziwile atu.

¹³ Tchoira ale anafuna kala apama vamentoni va Mulugu kahi ale anavuruwana malamulo, nari. Mbwenye anafuna kala apama vamentoni va Mulugu ba ale anaharihamo malamulo ale.

¹⁴ Atu ohokala aJudewu kali kahanavwe malamulo, aliwa koiziwa mmirimani mwewa jofuneya ja malamulo. Masiki kahanna malamulo, kawendaga anoiziwa upama na ubure unafwanyeya mmalamuloni.

¹⁵ Inaoneya ira aliwa kohokana malamulo mmirimani mwewa mwasiwa kairana yapama, mmirimani mwewa anowanda iziwa ira dihisakanya pama. Eto kairana yabure, mmirimani mwewa anowanda iziwa ira kadisakannye pama.

¹⁶ Jatene ejo jinoza jiireye nnga munalaleya miyo ira nafiya siku nivitanle Mulugu, liye unoza amurume Yesu Kiristu ira amutonge kada mutu zela malamulo aiziwile liye mmirimani mwaye na joumbuwela jokoyeya jaumbuwela liye mmirimani mwaye.

AJudewu amohi kohovinyenga kaumbuwelaga ira: <>

¹⁷ Kohokalawo eto aJudewu amohiwa anavititimiha ira: <<Nili aJudewu. Hiyo nnanyindela malamulo. Mulugu gwehu.

¹⁸ Hiyo nili atu oiziwa jofuna ja Mulugu. Hiyo nili atu owelruza na makalelo apama. Nili atu oiziwetchetcha malamulo.

¹⁹ Nili atu oameza aliba haona. Nili moneya zela ule unawenda muisini.

²⁰ Nili aliba awelruza atu ohokana toto eto nili anamafundjiha a ahima. Hiyo nnawenda na malamulo eto nihikana ibaribari na zelru dokwaranya zelru datene da ilambo ya vati.>>

²¹ Atu anne anawonga eno, anaafundjiha afwiwa eto aliwa kahawandaga vifundjiha. Analaleya ira kube eto na aliwene anoba.

²² Analaleya ira kuraruwe eto na aliwene anoraruwa. Analaleya ira ikwamutu yosema tchi yengo yotakala agali aliwa banavolowa munyumbani munatamalela atu vikwamutu josema jile, kabaga jengo jili emo.

²³ AJudewu ale anavititimiha zela harihamo wewa malamulo eto ba amohive anampetiha Mulugu moviringaniha malamulo!

²⁴ Muselu wa aJudewu ale unalandana na muselu ulrembiwe mMazuni oira: <<Atu ohokala aJudewu analuluviha nzina na Mulugu na mwasa oona joviringaniha jinera nyo.>>

Ibaribari zela kala muJudewu wa ibaribari

²⁵ Tchoira ineliwa unakana mabasa zela ule unawanda harihamo malamulo. Mbwenye wagamanle ineliwa, wanonga malamulo, ineliwa wawo kunna mabasa.

²⁶ Eto mutu ohoineliwa aharihamo jofuneya ja malamulo, kodi ikala inamuhalela na mwasa oira liye kaineliwe? Nari. Mulugu unamuonege nnga mutu oineliwa.

²⁷ Evale muwari mwa atu ambinli, mmohi oineliwa, mmohi ohoineliwa, oineliwa ule aiziwa malamulo eto ahawandege harihamo malamulo, ule ahaineliwe awanda harihamo malamulo, unoza amugwihena mulandu nfwaye oineliwa ule.

²⁸ Tchoira muJudewu wa ibaribari kahi wenno unavioniheda iJudewu yaye undeve bahi. Eto ineliwa wa ibaribari kahi yengo yooneya zela ing'ana maningo a mutu.

²⁹ Kala muJudewu wa ibaribari eto kala mutu uineliwe na ibaribari kuzenle muwari mwa malamulo. Ineliwa wa muJudewu wa ibaribari unaireya mmirimani mwaye muwari mwa Munemba Otchena. Eto unafuna za mutetela kahi mutu nfwaye mbwenye gu Mulugu.