Roma 15 - Mazu Otchena a Mulungu

Inafwanela atu olimba mwa nroromelo kavilelege na afwiwa oholimba

¹ Inafwanela hiyo atu olimba niwande vilela zela jovuta ja afwihu oholimba eto kanikale atu oviziveliwiha okave bahi.

² Kada mutu inafwanela asakege makalelo omuirelana nfwaye upama ira nfwaye alimbihiwe.

³ Tchoira Kiristu na liyene kakukumuwile na jofuna jaye, nari. Liye avenda irana jofuna ja Nabwiya. Kalaga nnga mazu anafwanyeya mMazuni oira: <<Joruwana ja ale kauruwanani jihivira, jili na miyo.>>

Limbihiwa zela yoing'anela ya sogolro

⁴ Kodi zela mazu a Mulugu kalrembiwe wanle mMazuni, kalrembiwele nni? Kalrembiwele ira kanifundjihe ibaribari ira nivilele eto nilimbihiwe muwari mwa mazwale. Evale nnokala olimbene zela yoing'anela inna hiyo.

⁵ Mulugu wenno unavaha vilela no limba murima, awande gumaniha mirima denyu ira muwendege vamohi movwanana mofuna mwa Yesu Kiristu

⁶ ira muwandege mutitimiha Mulugu Baba wa Nabwiya wehu Yesu Kiristu nnga muli mutu mmohive.

⁷ Nona inafwanela niwatchelanege na makalelo amohive nnga Kiristu aniwatchenle liye hiyo ira Mulugu atitimihiwe.

Yesu azile ira aJudewu vamohi na atu ohokala aJudewu kavulusiwe eto kamutamalele Mulugu

⁸ Va miyo nnouwandelani ira Kiristu azaga, aalabaga aJudewu, ali na mwasa okwakwaneliheda mapangano asakanyile Mulugu na makolo a wanle. Ali ira Mulugu aoneye ira awonga yengo unoirana.

⁹ Vamohive vevo Kiristu azaga aalabaga aJudewu, ali ira atu ohokala aJudewu kamutitimihege Mulugu zela tangaranga daye. Kalaga nnga ilrembiwe mMazuni ira: <<Nona miyo nnoutitimihani, vari va atu ohokala aJudewu eto nnotetela nzina nenyu moimba.>>

¹⁰ Inakala nnga eto mazu a Mulugu kalrembiwe wanle oira: <<Na nyenne atu ohokala aJudewu, muhagalale vamohi na atu a Mulugu.>>

¹¹ Inakala nnga eto yenno ilrembiwe mMazuni ira: <<Nyo atu ohokala aJudewu atene mmutamalele Nabwiya. Nyo atu a malogo matene mmutetele.>>

¹² Inakala nnga eto mazu a Mulugu kalrembiwe na Izaiya oira: <<Muwari mwa mutchitchi wa Jese, munokuma mutu unafuna za atonga atu ohokala aJudewu. Atu ohokala aJudewu ale anoza kamuroromelege liye.>>

¹³ Mulugu wenno unavaha ing'anela ja sogolro awande uzalihani hagalala na murendele muwari momuroromela ira muwandege limbihiwa zela jinaing'anela nyo sogolro muwari mwa kopolo da Munemba Otchena.

¹⁴ Miyo abalaga dihiziveliwa makalelo munna nyo. Tchoira nyo muli atu ozaleliwa upama, ozaleliwa ibaribari yatene eto muli atu owanda fundjihana.

¹⁵ Mbwenye mazu matene dilrembile miyo ala, dilrembile muwari mohowanganyeda ira duwumbutchedeni miselu dimohi diwa. Eto nnalremba jeji muwari mwa sayi dedo Mulugu udivahile liye

¹⁶ ira diwande laba mabasa a Yesu Kiristu muwari mwa atu ohokala aJudewu. Miyo nnalaba muwari mwa atu ohokala aJudewu nnga namakuta ira aliwa katchenihiwe na Munemba Otchena ira kakale nnga yovelela yofwanela vamentoni va Mulugu.

¹⁷ Nona, miyo nnowanda vitukulela zela mabasa a Mulugu analaba miyo mwasiwa kannalaba na kopolo daga. Nnalaba na kopolo da Yesu Kiristu.

^18-19 Tchoira kannawonga yengo ili yatene ilabile miyo mwa kopolo daga. Mbwenye nnawonga zela mabasa anno Kiristu alabile liye muwari mwa miyo. Kiristu gudivahile kopolo ira diwande wonga eto diwande irana jionihedo na jotikiniha muwari mwa kopolo da Munemba wa Mulugu. Jotikiniha ejo na jowonga jaga jalaba ira atu ohokala aJudewu kaona, kawande nvwelela Yesu. Muwari molaleya mazu, dihimala mabasa olaleya Muselu Wapama zela Kiristu kuma Jeruzalemu dowa ante ilambo ya Iliriya.

Pawulo kafunne laleya makalelo ovulusiwa mwemo mwalaleyiwa

²⁰ Nona miyo nnafuna dilaleye Muselu Wapama mbwenye muwari molaleya, kannafuna laleya mwemule munawongiwetcha nzina na Kiristu tawiha ira nnoza ninyingalegena na afwaga karomile laleya wewule.

²¹ Kalaga nnga ilrembiwe mMazuni ira: <<Kohokalawo atu kali kahanawandeliwe zela Namatikeliwa. Aliwa anoza kaone. Ale kali kahanavwe zela liye anoza kaonelremo.>>

²² Nona malambo a mundulrimu dahawandaga za wa nyo, tchoira laleya wewo wohodidibeliha.

²³ Mbwenye peno vilambo datene muvirile miyo, dihimala laleyamo, kadinna nimburo nimohiwa nnafuna miyo dowa laleya. Nona miyo dihikana ulrendo ira didowe Espanya dalaleye wewo. Voira dihimala yaka didjindji difunaga za upandani Roma uli nyo wo,

²⁴ dadowaga Espanya, nnafuna diperuwe wewo ira dize duoneni, dimale malambo mangasi mangasi na nyo dupandagani. Miyo eto nnafuna dagamanle walreda na nyo malambo mangasi mangasi, nyo mudikamihede ulrendo waga odowa Espanya.

²⁵ Eto miyo tchineneva dahanaze ira duoneni, dihikana ulrendo wodowa Jeruzalemu ira didowena kobiri, daavahe afwihu otchenihiwa.

²⁶ Tchoira afwihu omuroromela Yesu a Masedoniya vamohi na Akaya kohosoka kobiri mofuna mwewa ira kaavahe aJudewu otchenihiwa kasimenle anafwanyeya Jeruzalemu.

²⁷ Atu ohokala aJudewu ale kohoirana mofuna mwewa eto na ibaribari ihikala pama aliwa kaagawele aJudewu omuroromela Yesu ja ilambo ya vati janna atu mwasiwa afwiwale banno kaalaleyile mazu. Voira aliba laleya mazu kohowanda agawela afwiwa ja ilambo ya zulu, yofwanela ira na aliwene kaarelihe afwiwa kasimenle zela ja ilambo ya vati.

²⁸ Damala velela Jeruzalemu kobiri isokile atu a Masedoniya na Akaya, pa evale dadowaga Espanya vanafuna miyo peruwa wewo uli nyo wo.

²⁹ Daperuwa wewo, dihiiziwa ira muwari mogumana mwehu Kiristu unonireliha valukulu.

Pawulo ohavepa akuda Roma ira kamulobelele

³⁰ Miyo abalaga nnafuna duvepeni muwari mwa Nabwiya wehu Yesu Kiristu eto muwari mozivelana mwa Munemba Otchena ira muwanege vamohi na miyo muwari modilobelela, munvepege Mulugu

³¹ ira miyo dadowa Jeruzalemu, Mulugu adikoye mmandani mwa ale kahali atu omuroromela Yesu anafwanyeya Judeya eto mabasa anafuna miyo laba kakale mabasa oaziveliha atu otchenihiwa anafwanyeya Jeruzalemu wewo,

³² eto ira Mulugu afuna, diwande za wa nyo mohagalala eto muwari moupandani na miyene dilimbiheye.

³³ Mulugu wenno unavaha murendele ausogolrelreni nyo mwatene. Ame!