Roma 14 - Mazu Otchena a Mulungu

Wenda na aliba yeva nroromelo

¹ Zela atu omuroromela Yesu anne anna nroromelo noyeva, inafwanela naawatcheleni pama mbwenye kanikanganeleni zela jengo johooneya jozela funa wa kada mutu.

² Tchoira muwari mwa hiyo, ukalamo mutu unawanda dja jodja jatene. Ukalamo eto mmohiwa oholimba, unatunda nyama ili yatene ahadjaga. So unadja jalo bahi.

³ Yapamiwa inafwanela ule unadja nyama ili yatene ahamuteye nfwaye ahanadjole. Eto ule ahanadjole inafwanela ahamuugwihena mulandu nfwaye odjole. Mwasiwa hiyo atene, Mulugu umala niwatchela.

⁴ We uli ani ira umugwihena mulandu mutu ahali namalaba wawo, agali gu namalaba wa Nabwiya? Akala unafuna amangiwe mulandu, akala unafuna avahiwe razawu, mbwiyaye gunafuna iziwa ejo. Liye atongiwaga, unoza akayena razawu mwasiwa Nabwiya gunamulimbiha.

⁵ Imohiwa tchi ila. Ukalamo mutu mmohi unariheda siku nimohi kwaranya malambo amohiwa. Eto mmohiwa unariheda malambo matene na makalelo amohive. Inafwanela kada mutu akayena ibaribari mmirimani mwaye zela inafuna liye irana.

⁶ Ule unariheda siku nimohi, unariheda ira Nabwiya atitimihiwege. Eto ule unadja, unadjela ira Mulugu atitimihiwege. Tchoira liye unamutamalelana Mulugu muwari mwa jodja jinadja liye. Eto ule unavitundiha, na liyene unavitundihela muwari moira Mulugu atitimihiwege eto na liyene unamutamalelana Mulugu muwari mwa jodja jahanadja liye.

⁷ Tchoira hiyo atu omuroromela Yesu kanikalelewo ira nivititimihege eto nakwa, kannakwela ira nivititimihege.

⁸ Hiyo masiki nikwe, nnamutitimihegeve Nabwiya. Eto kanikwile, inafwanela nimutitimihege Nabwiya. Fwanyeya ira masiki nikwe, masiki nikalewo, mbwiyihu gu Nabwiya.

⁹ Mwasiwa Kiristu para liye za kwa no venya mokwani, ali ira akale Mbwiye wa ale kakwile na ale kaliwo.

Kakalevo mutu unafuna mukukumula mbalaye muwari mwa Kiristu

¹⁰ Nnga kodi weyo maliba dja jalo ve bahi mwasiwa gwa nni we mmangaga mulandu mbalawo wenno unadja jatene? Eto na wenne maliba dja nyama ili yatene, mwasiwa gwa nni we muteyaga nfwawo wenno ahanadja? Tchoira kada mutu unoza aimele ira atongiwe vamentoni va Mulugu.

¹¹ Tchoira mMazuni ihilrembiwa ira: <<Miyo Nabwiya nnolumbelela kalawo waga ira nibodo natene nnoza nidikokorelege miyo eto nlumi nili natene nnoza nilrapege vamentoni va Mulugu.>>

¹² Ku wonga ira mutu uli watene unoza awongege vamentoni va Mulugu yenno iirile liye.

¹³ Nona akala Mulugu gunafuna atonga atu atene, inafwanela nihiye makalelo otongana. Yapamiwa, hiyo nawendaga, niumbuwelege ira miyo kadisakanye yengo yoagwagwadutcha abalaga. Eto kadisakanye yengo yoatita wintoni wewa.

¹⁴ Miyo dihiiziwa eto dihikana ibaribari muwari mwa Nabwiya Yesu ira kavali yengo itakanle okave. So mbwenye mutu vali liye aumbuwela eka ira ila tchotakala, na ibaribari tchotakala zela wa liye.

¹⁵ Tchoira akala mbalawo unokukumuwa zela jinadja we, ku wonga weyo uhiya makalelo omuzivela. We kumunonge mbalawo wenno Kiristu umukwenle liye, muwari mwa jengo jinadja we.

¹⁶ Nona kamwahiye atu kawongege mazu oluluviha zela jengo jinaona nyo nnga japama na mwasa wa makalelo analabana nyo.

¹⁷ Wenda muUmweneni mwa Mulugu kahi kukumuwa na jodja jinadja we, nari jong'wa jinang'wa we mbwenye ilukuluwa ku irana jengo japama, no wenda pama na afwawo no kana hagalala mwa kopolo da Munemba Otchena.

¹⁸ Mutu wenne unamuhara Kiristu muwari moirana jatene eji, unosakanya pama vamentoni va Mulugu eto na atwene anoziveliwa.

¹⁹ Nona ndoweni niiregena jengo ejo jinanizelana murendele na afwihu ira hiyo atene nilimbihiwege.

Ili yapama kada mutu airegena jatene jinairana liye momuroromela Mulugu

²⁰ Mbwenye kaninongeni mabasa a Mulugu muwari mwa jodja jehu. Jodja jehu jatene ti jodja japama. Eto wamugwagwadutcha mbalawo muwari mwa yengo inadja we, tchi yengo yotega.

²¹ Yapama ku hadja nyama, ku hang'wa vinyu, ku hairana yengo ili yatene inangwagwadutcha mbalawo owu inafuna mutakaliha mbalawo owu inanvutiha mbalawo.

²² Akala weyo unowanda dja no ng'wa mwa nroromelo, uiziwe weyo weka na Mulugu, hiya irana ejo vamentoni va mbalawo. Orelihiwa gwenno unawanda irana jinerana liye mohowanganyeda.

²³ Mbwenye ule unadja mowanganyeda ugwana mulandu, mwasiwa liye kadjile muwari mwa nroromelo. Tchoira yengo ili yatene inera we muwari mohokana nroromelo tchotega.