Roma 13 - Mazu Otchena a Mulungu

Zela nvwelela guverno

¹ Inafwanela mutu uli watene anvwelelege guverno wenno unamutonga. Tchoira kavali utongi wahanazela wa Mulugu. Unaruma ira mwilamboni mukale aguverno otonga gu Mulugu.

² Mutu wenno ahananvwelela guverno, kanavwelela utongi urumile Mulugu. Eto atu ohovwelela anadediha tongiwa.

³ Tchoira andimuwa kinamuzuzumiha mutu unerana yapama mbwenye anamuzuzumiha mutu unerana yabure. Wafunaga ira uwende pama mwilamboni muno na guverno mohoova, inafwanela uiregena japama. Waira eno, guverno unoutetela.

⁴ Tchoira andimuwa analaba mabasa a Mulugu ira we ukale pama. Mbwenye we waira yabure, waaovege. Tchoira andimuwa mwilamboni muno anawenda na masupada. Eto masupadale kinawendelana vasayi, mbwenye anawendana ira kalabegena. Aliwa ba anamalaba a Mulugu, ba aliba weliha kunyakunya daye, banamuoniha uwali wa Mulugu ule unera jabure.

⁵ Nona inafwanela mutu uli watene aavwelelege andimuwa. Kahi so ira ahakayena mulandu mbwenye ili eto ira ahakayena yokumbanya mmirimani mwaye.

⁶ Na mwasa mmohive, inafwanela kada mutu avelelege misoko. Tchoira anamasogolrelra kalabaga mabasiwa analaba mabasa a Mulugu.

⁷ Ninvahege kada mutu yaye. Akala misoko, ninvahege misoko, akala josokela, nikumihege. Nimurihedege mutu wenno unafwanela rihediwa eto nimutitimihege mutu wenno unafwanela titimihiwa.

Jokokomeza jimohi jiwa zela atu omuroromela Yesu

⁸ Kanikayena mangawa ali atene na mutu uli watene. So mangawa anafuna hiyo kana kakale mangawa ozivelana. Tchoira ule unamuzivela nfwaye gwenno uwandile kwakwaneliheda malamulo.

⁹ Malamulo oira: <<Kuraruwe, kumpe mutu, kube, kusilrilre.>> vamohi na malamulo amohiwa ira uwonge mogwada mwene ku wonga ira: <<Umuziveliwege mutu uli watene nnga munaviziveliwela we wa mwinnya.>>

¹⁰ Ule unamuziveliwa mutu kanampudja. Nona muziveliwa nfwawo ku kwakwaneliheda malamulo.

¹¹ Vamohive vevo nyo muhumala iziwa ira tempu ili hiyo ila kahi tempu yogona, tchi tempu yoira mutu arurumuwe. Tchoira vulusiwa wehu unnana nikwivela hiyaniha na siku naromile hiyo muroromela Yesu, mwasiwa va kada siku, malambwihu anagwadeyawo.

¹² Mahiyu anamala. Uhanle vang'ono ira unde utche. Nona ndoweni nihiye joira ja mahiyu, niwareni jowara ja anyakondo jomoneya.

¹³ Ndoweni niwendeni na mawendelo ofwanela nnga ha vini mutu awendaga na ntana. Kaniiregena makalelo matene abure, dowaga vamainelo, ng'waga, djaga bure, gayelagana, lrezelraga. Nne kaniiregena makalelo matene oraruwa, gonihanaga burebure. Nne kaniiregena makalelo matene okangana no kalelana nrima.

¹⁴ Kanibalreni jofuna ja maningo ira niiregena jofuna ejo. So mbwenye niwareni mawendelo a Nabwiya Yesu Kiristu.