Roma 11 - Mazu Otchena a Mulungu

Mulugu ukana atwaye muwari mwa aIzarayeli

¹ Miyo nnafuna difuke eni. Kodi Mulugu umala ahiya atwaye aIzarayeli? Nari, nne vang'ono! Tchoira na miyene dili muIzarayeli, dibaliwe muibalini mwa Abarahamu, nlogo na Benjami. Mulugu kadihiyile.

² Ku wonga Mulugu kaahiyile atwaye anne aasakunlre liye wanle. Kodi mwire diwala mazu kalrembiwe wanle mMazuni, anno mulombwana Eliya awongile liye na Mulugu? Liye ohowonga zela makalelo abure a aIzarayeli eraga:

³ <<Nabwiya, aIzarayeli kohomala apa anamafiyiheda anne mwaarumile nyo eto kohomala bwanyula vibuwa denyu. Uhanle gu miyo meka eto aliwa anavenda jodipa eni.>>

⁴ Mulugu amuwakunle avi? Kwi: <<Nari kahi eno. Tchoira miyo dihikana atwaga daakoyile miyo, alombwana okwakwana 7.000 kahakokorenle ikwamutu yosema ineriwa Baali.>>

⁵ Kalaga nnga tempu ili hiyo ila. Mulugu ukana atwaye okumela mwa aIzarayeli a vang'ono, aasakunlre liye mwa sayi.

⁶ Sakulriwa na Mulugu unazela mwa sayi daye. Kunazela muwari mwa joira ja mutu. Tchoira sakulriwa wahazelege muwari mwa joira ja mutu, sayi dedo kadakala sayi.

⁷ Jeji jinatapulela nni? Tapulela ira aIzarayeli oindjiva tchawandile fwanya vulusiwa wavenda atu. AIzarayeli a vang'ono kasakulriwe kohofwanya vulusiwa, mbwenye afwiwa oindjiva kohomala ummihiwa mirima.

⁸ Zela ummihiwa wewa, unalingana na mazu a Mulugu kalrembiwe wanle oira: <<Mulugu uhadodomiha onelramo wewa, uhavaha meso ohowanda ona, na mabaru ohowanda vwa pakana siku na peno.>>

⁹ Eto Davi ohowonga ira: <<Nabwiya nnouvepani ira musakanye ira kazaga ira kadowe kadje vameza, kamange ngohi, kamange ratuwero. Musandutche udja wewa ukale nnga yengo yoagwiheda atu vati eto nnga yengo yoaweliheda atu kunyakunya.

¹⁰ Mutimihe meswiwa ira kahawande ona eto muummihe mitana dewa ira kakaleve oworamene.>>

AIzarayeli anoza kavolowe muwari mwa Kiristu

¹¹ Va nnafuna difuke eni. AIzarayeli gwagwaduwa ugwagwaduwile atu, kodi ali ira kakaleve ogwene? Nari, nne vang'ono! Ali ira muwari moviringaniha mwewa, vulusiwa ufiye wa atu ohokala aJudewu ira aIzarayeli kaaona, kasilrilrege.

¹² Akala viringaniha wa aIzarayeli uhazelana atu a mwilamboni ya vati rayela undimuwa eto akala viringaniha wewa uhazelana atu ohokala aJudewu rayela, ki nnga aIzarayeli atene viringaniha wewa wamala, kaza kavulusiwa, upama unafuna azela atu atene mwilamboni ya vati unaza ukale avi? Unaza ukale upama wohokala wa masika.

¹³ Eni nnouwandelani nyo atu ohokala aJudewu ira Mulugu udirumile ira dikale namarumiwa oulaleyani nyo. Eto muwari mwa emule, miyo nnoriheda mabasaga

¹⁴ ira aJudewu kauonani, kausilrilregeni ira muwari mwa aliba silrilra, amohi katwaruwe ira kavulusiwe.

¹⁵ Atu ohokala aJudewu kohowanda wandana na Mulugu mwasiwa aJudewu kohoruniha ja Mulugu. Ki eto aJudewu annya kaza karumelaga vulusiwa mwa Yesu, jengo jinaza jikale avi? Ale kakwile anoza kavahiwe ingumi.

¹⁶ Akala masa a vang'ono oroma munyiwa anavahiwa wa Mulugu botchena, ku wonga masa matene botchena. Eto akala mutchitchi gotchena, na tambi dene dipwetilemo totchena.

Mulugu ohabandihamo atu ohokala aJudewu mutengo mmohive mwali aJudewu

¹⁷ Ili nnga mutengo mmohi wa azeti unazaliwa vande. Mulugu gutukunle mutengo wapama ule, tambi dimohi diwa liye kotolawo, tatila. Dowa eto tukula mutengo wa azeti wa mukokolani, ohozaliwa, kotolawo tambi, liye za bandiha vamohi na tambi dihanle da mutengo wa vande ule. Evale tambi datene gumanela, datene kalagawo vamohi muwari mwa mahindje amohive anakumela nigodo nimohive na mutengole.

¹⁸ Nyo tambi dubandihileni Mulugu, kamuvitukulele zela tambi dikotoliwe dile. Mbwenye inafwanela muumbuwele ira unavaha nigodo nne ingumi kahi nyo, mbwenye nigodo tinouvahani ingumi nyo tambi.

¹⁹ Afwase munokanamo ira: <<Mulugu ukotolele tambi dile ira anibandihedemo hiyo.>>

²⁰ Mwera eno, muhukana ibaribari. Eto Mulugu akotonlewo tambi dedile na mwasa ohomuroromela Yesu. Nyo mbwenye tambi mubandihiwe muli apamene mwasiwa munomuroromela Yesu. Nona, kamukale ovitukulelene mbwenye ifwanele muovege.

²¹ Tchoira akala Mulugu owanda kotolawo tambi da mutengo wapama ule, unowanda ukotolani nyo mwahamuroromele.

²² Kaing'anani uwali wa Mulugu na tangaranga daye. Tangaranga daye unauwendelani nyo atu ohokala aJudewu eto uwali waye unaaoniha ale kagwile. Nona yali yapama muwendegeve na tangaranga da Mulugu. Tchoira mwahiya tangaranga daye, na nyenne Mulugu unougwadani.

²³ Vamohive vevo, aJudewu karoma muroromela Yesu, na aliwene anobandihiwa mwasiwa Mulugu ukana kopolo dowanda abandiha akoka.

²⁴ Nyo tambi dozawo dile, Mulugu uwanda ugwadani mukokolani, za ubandihani na mutengo wa azeti wa vande agali atu kinerana eno. Ki eto tambi daye da mutengole dakotonle liye atatila dile, era atukule, awelihedewo, kodi nnorutcha banda? Kannarutcha. Kalaga nnga aJudewu, na aliwene kera kawelihediwe nigodoni wakumihiwile atu, kinarutcha banda na nigodo niwa akoka.

²⁵ Abalaga miyo nnafuna muwande iziwa yengo yokoyeya ila tawiha ira munoza muvitukulele muwari mwa zelru denyu. Yengo yokoyeya inafuna nyo iziwa tchoira aIzarayeli oindjiva kohoummihiwa. Aliwa anokalave eno fiyeda numero na atu omuroromela Yesu ahali aJudewu nikwakwane.

²⁶ Numero na atu ohokala aJudewu nakwakwana, tchi tempu yenno aIzarayeli atene anafuna atu za vulusiwa. Kalaga nnga mazu a Mulugu kalrembiwe wanle oira: <<Nvuni unoza akumele mwa Siyawu. Liye aza unotamangihamo ubure watene unafwanyeya mwa Ana Jako.

²⁷ Dakurumuwela jotega jewa, tchi tempu yenno inafuna miyo sakanya yopangana yaga na aIzarayeli.>>

²⁸ Zela Muselu Wapama wa Yesu, aIzarayeli malambwala anaoneya kagalive amwidani a Mulugu. Para kala amwidani, ili ira vulusiwa udowe wafiye wa nyo atu ohokala aJudewu. Masiki eno, voira Mulugu ohasakulra aIzarayeli, liye unoaziveliwave na mwasa wa makolo ewa a malambo a mundulrimu.

²⁹ Tchoira Mulugu anvaha mutu yengo, umala nvaha. Mulugu amusakulra mutu, umala musakulra.

Tangaranga Mulugu daairele liye atu ohokala aJudewu, unoza eto aairele aIzarayeli

³⁰ Nyo atu ohokala aJudewu, wanle mwawenda na makalelo ohonvwelela Mulugu. Eto peno Mulugu agaonne uvuruvuru unera aIzarayeli, uuwendelani tangaranga.

³¹ Ku wonga Mulugu owanda uwendelani tangaranga ora yawenda nyo mwahanvwelelaga. Tangaranga dedo Mulugu unoza arungunutche, aawendele aIzarayeli anne kahananvwelela malambwala.

³² Fwanyeya ira Mulugu ohotonga ira atu atene kakale atu ohonvwelela ira aze aawendele atene tangaranga.

³³ Upama wa Mulugu, zelru daye, no iziwa waye kahi wa masika. Kalivo unawanda mariha iziwa matongelo a Mulugu. Nne jinera liye kalivo unawanda muruniha.

³⁴ Uiziwile jinaumbuwela Nabwiya bani? Uwandile muwelruza bani?

³⁵ Unvahile Mulugu yengo ira liye akayena mangawa na mutu bani? Kalivo.

³⁶ Tchoira jatene jiliwo jinakumela mwa liye. Jatene jinakalawo mwa liye. Eto jatene jiliwo jikalelewo ira Mulugu atitimihiwe. Mwa eno, Mulugu atitimihiwe kala no kala. Ame!