Roma 10 - Mazu Otchena a Mulungu

AIzarayeli tchafunne vwa zela vulusiwa muwari mwa Yesu

¹ Miyo abalaga, nnouwandelani ira yofuna yaga mmirimani mwaga, inanvepa miyo Mulugu, nnafuna nnga aJudewu kavulusiwe.

² Miyo nnoahidedela umboni aJudewu ira mwa ibaribari aliwa anozuzumela ja Mulugu. Mbwenye muwari mozuzumela ja Mulugu mule, kinna ibaribari.

³ Tchoira aliwa kiiziwile makalelo okala pama anno anakumela wa Mulugu. Muwari mohoiziwa makalelo Mulugu univahile liye ira nikale apama vamentoni vaye, anavenda jokunga makalelo ewene okala pama muwari mwa joira jiwa. Mwa enne aliwa kinawanda rumela makalelo Mulugu univahile liye.

⁴ Tchoira zela mutu uli watene unamuroromela, Kiristu gunakwiha makalelo ofuna kala pama muwari mwa malamulo.

⁵ Mozeji oholremba zela kala pama wewo unazela muwari mwa malamulo ira: <<Ule unakwakwaneliheda malamulo, liye gunafuna kana ingumi muwari mwa malamulo.>>

⁶ Mbwenye kala wapama muwari mwa nroromelo kunazela moharihamo malamulo. Tchoira Mozeji oholremba ira: <<Kuumbuwele mmirimani mwawo ira: <Unafuna gwela zulu bani?> >> Ku wonga kalivo mutu unafuna mudowela Kiristu zulu.

⁷ Mozeji eto ohowonga ira: <<Kuumbuwele mmirimani mwawo ira: <Unafuna tita dowa muliha odiha ohokana magomelo bani?> >> Ku wonga ira kalivo mutu unafuna mudowela Kiristu wewo uli atu kakwile.

⁸ Fwanyeya ira makalelo okala wapama kohonikwivela. Kalaga nnga mwawongele Mozeji ira: <<Mazu a Mulugu kohoukwivelani. Anafwanyeya vamulomoni venyu, eto anafwanyeya mmirimani mwenyu.>> Mazuwa kanikwivenle banno analaleya hiyo zela muselu omuroromela Yesu.

⁹ Muselu unalaleya hiyo, nnalaleya ira wenno unarumelela na wanoni waye ira: <<Yesu gu Mbwiye>>, wenno unaroromela na mmirimani mwaye ira Mulugu ohomuvenyiha mokwani, gwenno unafuna vulusiwa.

¹⁰ Tchoira mutu amuroromela Yesu na mmirimani mwaye unokalihiwa wapama. Arumelela na wanoni waye ira: <<Yesu gu Mbwiye.>> unovulusiwa.

¹¹ Vulusiwa momuroromela Yesu inakala nnga ilrembiwe mMazuni ira: <<Mutu wenne unaroromele nibwe nne, kaza anyaswa.>>

¹² Eto fwanyeya ira kavali hiyana mwa aJudewu na atu ohokala aJudewu. Nabwiya mmohive gu Nabwiya wa atu atene. Liye gunaavaha upama waye atene ananvepa.

¹³ Kalaga nnga ilrembiwe mMazuni ira: <<Mutu wenno unavepe na nzina na Nabwiya ira akamihediwe unovulusiwa.>>

¹⁴ Kodi aJudewu anowanda muitana ule kahamuroromenle atu? Nnga kodi anowanda muroromela wenno kahanvwile atu? Aliwa anavwe avi, agali kalivo udowile alaleya?

¹⁵ Eto maliba laleya aharumiwe, unawanda avi dowa laleya? Kalaga nnga mazu a Mulugu kalrembiwe wanle oira: <<Oriya ba manyalo a wenno unawenda avweyihaga Muselu Wapama.>>

¹⁶ Eto fwanyeya ira aJudewu kagavwile Muselu Wapama, kahi atene karumenle muselu kavwile atu. Kalaga nnga mazu Izaiya alrembile liye wanle oira: <<Nabwiya, kalivo uroromenle muselu nilaleyile hiyo!>>

¹⁷ Fwanyeya ira nroromelo nnakumela muwari movwa mazu. Mazuwa, ba mazu zela Kiristu.

¹⁸ Va nnafuna difuke. Kodi aJudewu kivwile Muselu Wapama zela Kiristu? Na ibaribari kohomala vwa. Nizu na anamalaleya nihimala vweya mwatene mwene. Kalaga nnga mulrembiwele atu mMazuni ira: <<Nizu newa nihimala vweya mwilamboni mwatene ya vati. Jowonga jewa jihimala fiya pakana magomo wa ilambo.>>

¹⁹ Eto nnafuna difukeve akoka. Kodi aIzarayeli tchaiziwile ibaribari zela Yesu? Kohoiziwa. Tchoira voroma Mozeji ohowonga mazu a Mulugu ira: <<Miyo Mulugu nnafuna disakanye makalelo ira nyo aIzarayeli mwaza muona makalelo anafuna miyo airela atu kahaoneya nnga yengo, mwaasilrilrege makalelo ewa. Nnafuna disakanye makalelo ira nyo aIzarayeli mwaza muona upama unafuna miyo airela atu ohokana zelru, mutakaleliwe.>>

²⁰ Eto fwanyeya ira Izaiya oholimbiha kopolo ira alrembe mazu a Mulugu oira: <<Ale kahadivendile badifwannye. Miyo dihivioneyiha vamentoni va atu anne kahadisakile.>>

²¹ Mbwenye zela aIzarayeli, Izaiya oholremba mazu a Mulugu oira: <<Miyo dihitapula mandaga siku nompumbula para atu ohovwelela, atu a uvuruvuru.>>