Roma 1 - Mazu Otchena a Mulungu

Malondjelo a Pawulo

¹ Unalremba gu miyo Pawulo, muzari wa Yesu Kiristu. Disakulriwe ira dikale namarumiwa. Divahiwe izo ira dilaleye Muselu Wapama okumela wa Mulugu.

^2-3 Muselu Wapama unalaleya miyo gu muselu wa Yesu, Mulugu Mwana. Liye gu Namatikeliwa wenno Mulugu amuwonga liye wanle na anamafiyiheda. Aliwa koholremba muwari mwa Mazu Otchena a Mulugu ira: <<Miyo nnolumbela ira ukala Namatikeliwa unafuna za.>> Namatikeliwa wenno uzile na maningo eto ubaliwe muzizani mwa Davi.

⁴ Nihikana eto ibaribari ira gu Mwana Mulugu tchoira liye agakwile, mwa kopolo da Munemba Otchena, ohovenya mokwani. Mutuwa gu Yesu Kiristu Nabwiya wehu.

⁵ Yesu wenno, na sayi daye, unirumile hiyo anamarumiwa ira nidowe naalaleye atu a malogo matene ira kamuroromele, amala kanvwelelege ira nzina na Yesu niteteliwe mwa atu a malogo matene.

⁶ Na nyenne muli atu osakulriwa ira mukale aye, munafwanyeya muwari mwa atu anamuroromela no nvwelela Yesu Kiristu.

⁷ Miyo nnoulrembelani nyo mwatene muli atu oziveliwiwa na Mulugu, muli atu osakulriwa ira mukale atwaye otchenihiwa vamentoni vaye, munafwanyeya Roma. Malondjelo anaurumihedani miyo ba ala. Difunne ira sayi na murendele okumela wa Mulugu Babihu na Nabwiya Yesu Kiristu, jatene ejo jikale na nyo.

⁸ Voroma, miyo nnomutamalela Mulugu waga muwari movira mwa Yesu Kiristu na mwasa wa nyo. Tchoira imala vweya mwilamboni yatene ya vati ira sidadi ya Roma kohokalawo atu okana nroromelo.

Pawulo unawonga zela funa waye ira aapande aRoma

^9-10 Miyo dinnana ulobelelani mohogoma ira fendo ila mbwenye Mulugu afuna, diwande upandani Roma uli nyo. Unadihidedela umboni zela ulobelelani waga gu Mulugu wenno unamulaba miyo na mmirimani mwaga mwatene muwari molaleya Muselu Wapama wa Mwanaye.

¹¹ Tchoira nnafuna nnga dagazile uonani, dulimbiheni muwari mwa yolemelela ya Munemba.

¹² Ku wonga ira nnafuna nnga dagazile, nyo mwagaonne nroromelo naga, miyo dagaonne nroromelo nenyu, atene nilimbiheye.

¹³ Abalaga nnafuna muiziwe ira dofunafuna fendo doindjiva dene nnga difiye wewo uli nyo. Mbwenye miyo nnahiyihiwa na vanove. Nnofuna nnga dagafiyile wa nyo ira dihande mwa nyo na makalelo nnga nnahanda miyo muwari mwa atu ohokala aJudewu atene.

¹⁴ Miyo dihikana mangawa ira daalaleye aGerego, nari atu ohokala aGerego, atu ofundja nari atu ohofundja.

¹⁵ Muwari mwa mangawa anna miyo, nnafuna nnga dagafiyile wa nyo akuda Roma ira dulaleyeni Muselu Wapama.

Pawulo kananyaswa zela laleya makalelo ovulusiwa

¹⁶ Muwari molaleya Muselu Wapama, kannanyaswa tchoira Muselu Wapama unafwanyeya agali kopolo Mulugu unaavulusana liye atu atene anne anamuroromela Yesu, roma aJudewu fiyeda atu ohokala aJudewu.

¹⁷ Muselu Wapama gunawanda oneyiha makalelo okala wapama vamentoni va Mulugu. Makaleluwa ti nroromelo bahi, maromelo ante magomelo. Kalaga nnga ilrembiwe mMazuni ira: <<Ule uli wapama unokana ingumi mowenda na nroromelo.>>

Atu kohomala gwana mulandu mwasiwa kinabalra ibaribari ya Mulugu

¹⁸ Eto malambwala takaleliwa wohokala wa masika wa Mulugu okumela zulu unooneyihiwa zela jotakala na jabure jinera atu. Muwari moirana jotakala mule, anakoya ibaribari ira afwiwa kahaiziwege.

¹⁹ Tchoira aliwa kohomala iziwa ejo jinawanda iziweya zela Mulugu mwasiwa Mulugu uhaiziwiha muwari mwa jopandutcha japandutchile liye.

²⁰ Mulugu nkalelo unna liye kanaoneya na meso mbwenye unaoneya pama mwa jengo jipandutchile liye. Tchoira kuma vapandutchile Mulugu ilambo yatene, mutu aing'ana jopandutcha japandutchile liye unoiziwa ira Mulugu gwa ibaribari eto gwa kopolo dohogoma. Eto muwari moiziwa ejo, aliwa Mulugu kinambalra. Nona kohomala gwana mulandu.

²¹ Tchoira atu a wanle muwari moiziwa ira Mulugu ukalawo, tchafunne mutitimiha nne mutamalelana zela jejo jaavahile liye. Mbwenye kohoroma umbuwela jengo johokala ejo. Uzimora wanna atu mmirimani mwewa wohodowave sogolro.

²² Kaviona ira nili atu a toto eto aliwa sanduwa kala azimora.

²³ Aliwa kohiya mutitimiha Mulugu wa ibaribari, Mulugu ohowanda kwa, aliwa tchindja ira katitimihege jengo jokwa jene, vikwamutu josema, jengo jasakannye atu jofwalrafwana na atu, mbalrame, vinyama, jomburunuwa vati, aliwa aya titimihaga ejo.

²⁴ Nona, Mulugu ohatonga atwale ira kairegenave jotakala na joraruwa jafunne atu mmirimani mwewa eto ira kavinonge maningwiwa okave.

²⁵ Mulugu aatongele atwale eno mwasiwa kohotchindja ibaribari yaye ira kaharege jonama, aliwa roma tamalelaga jengo jopandutchiwa hiya mutamalela Namapandutcha wenno unafuna tamaleliwa kala no kala! Ame!

²⁶ Na mwasa wenno Mulugu ohatonga atwale ira kairegenave jotakala jafuna atu irana. Pa evale varomile atu tchindja ibaribari yoira mulombwana inafwanela agumanege na muhiyanaye. Aliwa funaga jengo johofwanela, muhiyana mugonihaga muhiyana nfwaye,

²⁷ eto alombwana roma haraga jofuna jiwa, aliwa iragana ja manyazo, mulombwana mugonihaga mulombwana nfwaye. Goma uwa zela jabure jaira atu, kohotambilra ubure wofwanela zela ubure waira atu, aliwa vinonga maningwiwa.

²⁸ Muwari mokonda ira Mulugu ukalawo, evale Mulugu ohononga zelru dewa ira kairegena jengo johofwanela.

²⁹ Fiyeda malambwala, jotakala jinerana atu kahi ja masika. Jabure jatene annana iranave. Anafwanyeya kagali atu okalela nrima jengo ja afwiwa, atu oaida afwiwa. Anosilrilra, anoapa afwiwa, anoharaharana, anonyengana, anobubudana. Anowambana,

³⁰ anoanukeda afwiwa, anomuida Mulugu, anokangana, anoapeta afwiwa, anovitukulela. Anovenda makalelo maxa oirana jotakala. Kinaavwelela ababiwa.

³¹ Ba avuruvuru, atu owonga joxangaxanga, atu ohaabalra afwiwa okana makatamiho, atu oairela afwiwa ubure.

³² Muwari moiziwa ira Mulugu utonga ira ule unerana jabure unokwa, annana iranave jabure jile. Eto kaaona afwiwa kairagana jabure jimohive, aliwa aziveliwagana.