Matewuji 9 - Mazu Otchena a Mulungu

Yesu ohonvulumutcha maliba hawenda sidadi ya Kafaranamu

¹ Noira enne, Yesu ohogwelaga mmwadeyani, liye lambuwa, fiya sidadi yakala liye.

² Evale kohomuzagana maliba hawenda mmohi eni agali ogonantene vamakani vaye. Yesu agamuing'anne murendole na atu kamuzilena ale, ohoona ira: <<Atwala kohokana nroromelo.>> Evale ohowongaga na maliba hawenda ule eraga: <<Mwanaga kukukumuwe. Mwasiwa jotega jawo jihimala kurumuweliwa!>>

³ Fwanyeya ira vevale vohokala anamafundjiha malamulo. Muwari mwa aliwa mohokalaga amohiwa karomilege umbuwela mmirimani mwiwa ira: <<Ii, mulombwanola unamululuviha Mulugu!>>

⁴ Mbwenye Yesu muwari moiziwa jejo jaumbuwela atu mmirimani mwiwa, ohowongaga eraga: <<Kodi mwasiwa gwa nni nyo umbuwelaga jabure mmirimani mwinyu?

⁵ Kodi yorutcha wonga na maliba hawenda ula tchivi? Ku wonga na liye ira: <Eni jotega jawo jihimala kurumuweliwa>, owu irutchile ku wonga ira: <Kavenya, uwende.>?

⁶ Mbwenye miyo nnafuna dinvulumutche murendola ira nyo muiziwe ira Mwana wa Mutu uhuvahiwa utongi mwilamboni ya vati ira akurumuwele jotega.>> Evale ohomuwongagana maliba hawenda ule eraga: <<Venya utukule makawo, udowege vande vawo!>>

⁷ Mobaranya murendole ohovenyaga, liye dowaga vande vaye.

⁸ Noira enne, anamwindji kafwanyeyaga evale kagaonne jejile, kohoromaga ova eto kohomutamalelaga Mulugu wenno awandile avaha atu kopolo dokala ha dedile.

Itaniwa wa Matewuji

⁹ Yesu agavenyile evale adowaga, ohomuonaga mulombwana mmohi eni agagaratile mwana nyumba yokosamo misoko, aitaniwa Matewuji. Yesu aganfwanyile, ohomuwongana eraga: <<Kadiharege!>> Evale liye ohovenyaga, liye roma muhara.

¹⁰ Kagafiyile vande va Matewuji, Yesu agali vameza, kohokalawo anamasokiha misoko na anamatega oindjivene kazilege garati vamohive vevale vafwanyeyaga Yesu vamohi na anamamuharaye.

¹¹ Mwa enne aFarizewu kagaonne enne, kohafukaga anamamuhara Yesu ale keraga: <<Kodi mwasiwa gwa nni namafundjiha wenyu ule djaga vamohi na aliba tega na anamasokiha misoko?>>

¹² Mbwenye Yesu agavwile, ohawakulaga eraga: <<Ngumi kanadowa wa mediku. Mbwenye murenda gunadowa wa mediku.

¹³ Mudowe mwafundje pama ira muiziwe yotapulela ya mazu a Mulugu oira: <Miyo nnafuna tangaranga hiya mikuto!> >> Yesu ohowongagave eraga: <<Mwasiwa miyo dizaga mwilamboni, kadizele aitana atu apama, mbwenye dizele aitana atu otega!>>

Anamamuhara a Juwawu kohonfuka Yesu zela jejuwari

¹⁴ Noira enne, anamamuhara a Juwawu Mbatizi kohozaga wa Yesu, aliwa nfuka keraga: <<Hiyo vamohi na aFarizewu nnojejuwari. Nnga mwasiwa gwa nni anamauharaninyu hajejuwarigi?>>

¹⁵ Yesu ohawakulaga eraga: <<Kodi aliba itaniwa vamateloni anokala okumbanyene agali namatela wa mulombwana uli vevale? Nari. So mbwenye anoza kafiye malambo anafuna kumihiwavo namatela ule. Agakumihiwevo, aliba itaniwa ale anerege jejuwari!>>

¹⁶ Evale Yesu ohowonga eraga: <<Kalivo mutu unatukula itchapa ixa, atchapelrana yowara yawale, mwasiwa airana eno itchapa ixele inokumavo eto kauwa uwa unerege simbwa.

¹⁷ Eto kalivo unatukula vinyu muxa adowa ahela muwari mwa tembe mwaheliwe vinyu wanle. Mutu airana eno, tembe nne nnotweya mala nongeya eto vinyule unotatiya. Mbwenye vinyu muxa unaheliwetcha mutembeni muxa. Jaireya eno, kilivo inafuna nongeya, nne tembe, nne vinyu.>>

Yesu ohonvulumutcha muhiyana mmohi na namwali mmohi

¹⁸ Yesu awongagave enne na atwale, mobaranya ohofiya mundimuwa mmohi, liye mukokorela awongaga eraga: <<Mwanaga wa muhiyana dimuhiyile okwene. Nnouvepani ira mudowe mwamuhinde na ndanda nenyu, liye akalewo!>>

¹⁹ Evale Yesu ohovenyaga vamohi na anamamuharaye, aliwa muharaga mundimuwole.

²⁰ Fwanyeya ira ohokalawo muhiyana mmohi amanle yaka kumi na mbinli aganna urenda ohamba, kumaga sangiri malambo matene. Evale ohoromaga muhara Yesu, liye dowa muhinda magomo wa kapa.

²¹ Mwasiwa liye youmbuwela yaye azaga wa Yesu yali yoira: <<Miyo dadowa, damuhinda kapave bahi, nnovulumuwa!>>

²² Evale agamuhindile kapaye, Yesu ohorungunuwaga, liye muing'ana. Agamuing'anne, ohomuwandelaga eraga: <<Mwanaga kukukumuwe. Nroromelo nawo nuhuvulumutcha!>> Roma tempu imohive yenne muhiyanole ohovulumuwaga.

²³ Evale Yesu agafiyile vande va mundimuwole, ohafwanyaga aliba imba mafalauta na mwindji wa atu kafwanyeya dugu dugu dugu evale.

²⁴ Mwa enne Yesu ohawongagana eraga: <<Kakumanivo evano. Mwasiwa namwali ule kakwile, so unagona.>> Mwa enne aliwa kohoromaga muteya.

²⁵ Evale anamwindjale kagakumihiwevo, Yesu ohovolowaga mmba mule, liye muhinda mwanole na ndanda naye. Mwa enne namwali ule ohovenyaga.

²⁶ Nomala eno, jejile jaireyilege evale johoromaga vweya mwilamboni mwatene mwemule.

Yesu ohavulumutcha aliba haona ambinli

²⁷ Noira enne, Yesu ohomaruwaga, liye dowaga jaye. Adowaga kohokalawo alombwana ambinli ohoona, kamutamangelaga, kakuwaga keraga: <<Mwana Davi muniwendele tangaranga hiyo vano.>>

²⁸ Evale liye agavolowile mmba, aliba haona ale kohofiyaga valigi liye. Evale Yesu ohafukaga eraga: <<Kodi nyo munororomela ira miyo nnowanda uvulumutchani?>> Evale aliwa kohowakulaga keraga: <<He, Nabwiya, nnororomela!>>

²⁹ Evale liye ohosakwinyaga meso ewa eraga: <<Muiriwena mokwakwanela na nroromelo nenyu!>>

³⁰ Yesu agawongile enne meso ewa kohuleyaga. Evale Yesu ohakokomezaga mwa kopolo ira: <<Kakalevo mutu unafuna nyo muwandela zela jeji!>>

³¹ Aliwa mbwenye kohovuluvuliha mazu a Yesu, aliwa dowa, roma vweyihaga fiyeda jejo jaira Yesu mala vweya mwilamboni mwatene.

Vulumutchiwa wa mutu mmohi ohowanda wonga

³² Evale tempu yavenyagavo alombwana ambinli ale, mobaranya kohokalawo eto atu kamuzilegena mulombwana mmohi okana munemba wabure eto kawonga.

³³ Kagamufiyilena, Yesu ohomutamangihamo munemba wabure ule, evale mutule ohoromaga wonga. Mwa enne mwindji wa atu kohoromaga tikiniheya keraga: <<Kinarome ireya yengo yokala nnga ha yenna mwa aIzarayeli atene!>>

³⁴ Mbwenye aFarizewu kowongaga keraga: <<Ira liye awandege tamangiha minemba dabure, unanvaha kopolo diwa gu mundimuwa wa minemba dabure.>>

Yesu ohawendela tangaranga atu oindjiva

³⁵ Eto Yesu owenda sidadi datene na tatamo datene, afundjihaga munyumbani mwewa mwemo mwafundja atu mazu, alaleyaga Muselu Wapama wa muUmweneni eto avulumutchaga maurenda ali matene na jopa jili jatene.

³⁶ Evale Yesu agaaonne anamwindji a atu, ohawendelaga tangaranga mwasiwa aliwa kawenda okukumuwene eto tchanna mutu oakamiheda. Kakala nnga mabila ohokana namakumbuza.

³⁷ Evale Yesu ohawandelaga anamamuharaye ale eraga: <<Johanda jihisimbwa indjiva eto anamalaba kohoyeva.

³⁸ Nona inafwanela munvepe Mwinnya wa munda ira aarume anamalaba amohiwa ira kadowe mahandelo waye!>>